मनाङ आहा रारा गाेल्डकपकाे सेमिफाइनलमा

A+ A A-

झापा ११ लाई पराजित गर्दै मनाङ मर्स्याङ्दी क्लब पोखरामा जारी आहा रारा गोल्डकपकाे सेमिफाइनलमा प्रवेश गरेको छ । १८औं संस्करण आहा रारा गोल्डकपमा अन्तिम चारको स्थान पक्का गर्न मनाङका अन्जन विष्टको गोल निर्णायक रह्यो ।

पहिलो हाफ गोलरहित बराबरीमा टुंगिएकाे थियाे । यद्यपि, ७५औं मिनेटमा नेपाल आयल निगम मनाङ मर्स्याङ्दीले सफलता प्राप्त गर्‍याे । दयान्द सिंहको पासमा अनमार्क बसेका विष्टले बल कन्ट्रोल गर्दै डिबक्सभित्रबाट हानेको पावर सट सेकेण्ड बार च्याप्दै गोलपोष्टमा छिर्‍याे । झापा ११ माथि १–० गोलले पराजित गर्दा अन्जन विष्ट म्यान अफ दि म्याचको हकदार बने ।

पहिलो हाफमा दुवै टिमले निकै संघर्ष गरे । दुवैतर्फबाट पाएका अवसर खासै सदुपयोग हुन सकेनन् । पहिलो हाफको इन्जुरी समयमा विशाल दोर्जीको थ्रो बल कलेक्ट गर्दै सुनिल खड्काले हिर्काएको बललाई मनाङका गोलकिपरले पञ्च गर्दै बचाए ।

मनाङले फ्रि किक पनि पाएको थियो । डिबक्स लाइन नजिकै पाएका दुई वटा फ्रि किकलाई सदुपयोग गर्नबाट चुकेपछि मनाङले जितको लागि लामो संघर्ष गनुपर्‍याे ।

पोखराको मैदानमा मनाङ र झापा ११ बीच चार वर्षपछि भेट भएको थियो । पाँच पटकको आहा रारा गोल्डकप च्याम्पियन र सेमिफाइनलिस्ट टोली झापा ११ बीच १८ औं संस्करणको गोल्डकपमा पनि भेट भएकाे थियाे ।

झापा र मनाङबीच १४औं संस्करणमा पहिलो पटक भेट भएको थियो । दुइ क्लबले सेमिफाइनलमा प्रतिस्पर्धा गरेका थिए । अहिलेको संस्करणमा भने दोस्रो क्वाटरफाइनलमा भेट हुन पुग्यो ।

नेपाल पुलिस क्लबलाई पराजित गर्दै झापा ११ ले चार वर्षअघि सेमिफाइनल समीकरण पूरा गरेको थियो । मनाङले भने भारतीय गोर्खा ब्रिगेडलाई पराजित गरेको थियो । ४–० गोलले पराजित गर्दै मनाङले फाइनल यात्रा तय गरेको थियो । झापा ११ ले सशस्त्र प्रहरी बलको एपीएफ क्लबलाई पेनाल्टी सुटआउटमा पराजित गर्दै क्वाईटरफाइनल यात्रा तय गरेको थियो ।

मनाङमा विगतको सेट टिम भने थिएन । त्यसैले पनि मनाङलाई जित निकाल्न निकै सकस परेको देखिन्थ्याे ।

सहारा क्लबको आयोजना तथा हिमश्री फुड्सको मुख्य प्रायोजनमा आयोजित गोल्डकपको तेस्रो क्वाटरफाइनल खेल रुस्लान थ्रीस्टारले भारतीय टोली गान्तोक फुटबल क्लबसँग खेल्ने छ ।

प्रकाशित मिति: आइतबार, फागुन २५, २०७६ १७:५८