साँच्चै सुन्दर छ्यौ तिमी

A+ A A-

लाग्छन् सुन्दर ओठ ती किनभने हाँस्छ्यौ तिमी सुन्दर
आँखा सुन्दर लाग्दछन् किनभने हेर्छ्यौ तिमी सुन्दर
लाग्छन् सुन्दर हात ती किनभने गर्छ्यौ तिमी उद्यम
राम्री छ्यौ सँगिनी तिमी किनभने गर्छ्यौ असाध्यै श्रम ।

तिम्रा निर्मल भावमा म भविता देखूँ सधैँ लाग्दछ
तिम्रै सुन्दर हातमा म कविता लेखूँ सधैँ लाग्दछ
बग्छन् सुन्दर भावना मनसँगै तिम्रा कुरामा पनि
बज्छन् सुन्दर रागिनी श्रमसँगै तिम्रा चुरामा पनि ।

लाली ओठ दली बनेर नकली जाली बनी मातिनौ
छाडा भोगविलासनिम्ति सुनका औँठी चुरा मागिनौ
मेरो माइत उच्च, यो घर त खै ? गर्दै खिसी हाँसिनौ
मेरा सङ्कट दूर गर्न मसँगै नाच्यौ, रुँदै भागिनौ ।

बारीमा पसिना बगाउन तिमी हुन्छ्यौ सधैँ तत्पर
टारीमा सृजना फलाउन तिमी बन्छ्यौ सधैँ उर्वर
गर्छ्यौ काम खटी निमेष नबसी पार्दै उज्यालो घर
बच्चाको परिवारको र घरको बन्छ्यौ तिमी नै भर ।

पीडामा पनि धैर्यपूर्वक तिमी सम्हाल्दछ्यौ जीवन
फाटो पार्न गरून् प्रपन्च जति नै भाँडिन्न तिम्रो मन
तिम्रै धैर्य विवेक सन्तुलनले चल्दै छ हाम्रो घर
मेरानिम्ति तिमी समान सँगिनी ? छैनन् कुनै सुन्दर ।

ठान्छन् सुन्दर रूप जो लहसिँदै देखेर गोरो तन
जान्छन् सुन्दर रूपमा बहकिँदै हेर्दै नहेरी मन
आँखा ओठ कपोल नाक उरमा सौन्दर्य के हुन्छ र !
आस्थाको श्रमको विचार मनको सौन्दर्य पो सुन्दर !

आँखा हैन रहेछ सुन्दर सखी ! ठानेछु मैले तर
बाँचेको भ्रममा रहेछु सँगिनी ! काया भनी सुन्दर
हेर्दा सुन्दर लाग्दछन् कति कुरा लोभिन्छ मान्छे तर
मैले बल्ल बुझेँ रहेछ श्रमको सौन्दर्य नै सुन्दर ।

तिम्रो दृष्टिविना बिहान सविता मैले कुनै देखिनँ
तिम्रो सुन्दरता समान कविता मैले कुनै लेखिनँ
आस्थाले श्रमले उदात्त मनले सत्कर्मले चेतले
साँच्चै सुन्दर छ्यौ तिमी प्रियतमा ! आदर्श सन्देशले ।

प्रकाशित मिति: आइतबार, फागुन २५, २०७६ १५:०८