प्रदेश ५ मा एसईई परीक्षाको तयारी अन्तिम चरणमा

A+ A A-

६ चैतदेखि सुरु हुन लागेको एसईई परीक्षाको तयारी प्रदेश ५ मा अन्तिम चरणमा पुगेको छ । १२ वटै जिल्लामा प्रश्नपत्रको व्यवस्थापन राष्ट्रिय परीक्षा बोर्ड र अन्य व्यवस्थापनको जिम्मा प्रदेश सरकारले गरिरहेका छन् ।

शुक्रबार सामाजिक विकास मन्त्रालयले एक कार्यक्रमको आयोजना गरी १७ चैतसम्म हुने एसईई परीक्षालाई व्यवस्थित र मर्यादित बनाउने गरी तयारी अन्तिम चरणमा पुगेको जानकारी दिएको हो ।

सामाजिक विकासमन्त्री सुदर्शन बरालले प्रश्नपत्र परीक्षा बोर्डबाटै आउने र १२ वटै जिल्लामा केन्द्राध्यक्ष, सह–केन्द्राध्यक्ष, निरीक्षक, परीक्षा सहायक, कार्यालय सहायक र सुरक्षाकर्मीको व्यवस्थापन प्रदेश सरकारले गरेको बताए ।

यस वर्ष प्रदेश ५ बाट ८१ हजार ४ सय १ जना विद्यार्थी एसईईमा सहभागी हुँदै छन् । ३ सय २१ परीक्षा केन्द्रबाट प्राविधिक नियमिततर्फ २ हजार १ सय ३१, साधारण नियमिततर्फ ७६ हजार ६ सय १८ र ग्रेड वृद्धिका २ हजार ६ सय ५२ गरी सो संख्यामा विद्यार्थी सहभागी हुन लागेको मन्त्री बरालले बताए ।

त्यस्तै, सामुदायिकतर्फ १ हजार ७ विद्यालयका ६० हजार ५ सय ५५ र संस्थागततर्फका ६ सय ६१ विद्यालयका २० हजार ८ सय ४७ विद्यार्थी परीक्षामा सहभागी हुन लागेका छन् ।

यस पटकको एसईई परीक्षामा कुल विद्यार्थीमध्ये ९ जना दृष्टिविहीन छात्रछात्रा, १३ जना बहिरा छात्रछात्रा, २ जना शारीरिक अपाङ्गता भएका छात्रछात्रा गरी २४ जना अपाङ्गता भएका विद्यार्थीहरू सहभागी हुन लागेको मन्त्रालयले जनाएको छ ।

यस पटकको परीक्षा सञ्चालनका लागि प्रदेश ५ मा कुल १२ हजार ५९ जना जनशक्ति खटाउन लागिएको छ । १२ वटै जिल्लामा केन्द्राअध्यक्ष ३ सय २१, सहायक केन्द्राध्यक्ष ४ सय ११ जना, निरीक्षक ४ हजार ७० जना, परीक्षा सहायक ८ सय १४ जना र सुरक्षाकर्मी ४ हजार ८ सय १५ जना जनशक्ति परिचालन गर्न लागिएको हो ।

जिल्ला स्तरमा परीक्षालाई मर्यादित, अनुशासित र व्यवस्थित गर्न प्रमुख जिल्ला अधिकारीको अध्यक्षतामा समितिसमेत गठन गरिएको बताइएको छ ।