चर्को मूल्यमा मास्क बेच्ने २ औषधि पसलमा लगाइयो ताला

A+ A A-

कोरोना भाइरसको सन्त्रास फैलिएको मौका पारेर कृत्रिम अभाव सिर्जना गरी चर्को मूल्यमा मास्क बिक्रीवितरण गर्ने २ औषधि पसलमा ताला लगाइएको छ । पोखराको महेन्द्र पुलमा रहेको स्याङ्जा औषधि पसल र हस्पिटल चोकस्थित परी फार्मेसीमा प्रशासनले तालाबन्दी गरिएको हो ।

व्यापारीले चर्को मूल्यमा मास्क बिक्री गरेको र कृत्रिम अभाव सिर्जना गरेको गुनासो आएपछि उद्योग वाणिज्य उपभोक्ता हित संरक्षण निर्देशनालयको संयोजनमा बिहीबार गरिएको बजार अनुगमनका क्रममा ती २ फार्मेसीलाई अनुगमन टोलीले कारबाही गरेको हो ।

बजारमा अस्वाभावविक रूपमा सामान्य मेडिकल मास्कलाई चर्को मूल्यमा बिनाबिल बिक्री गरेको भेटिएपछि अनुगमनका क्रममा पोखराका २ औषधि पसलमा तालाबन्दी गरी प्रशासनमा बोलाइएको उद्योग वाणिज्य उपभोक्ता हित संरक्षण निर्देशनालयका निर्देशक गोकुल शर्मा पौडेलले जानकारी दिए ।

उनले हस्पिटल चोकमा रहेको परी फार्मेसीले सामान्य माक्सलाई ३० रुपैयाँमा बिक्रीवितरण गरेको र स्याङजा फार्मेसीले के.एन.९५ मास्क ४ सय ५० रुपैयाँमा बिक्री गरेको भेटिएपछि खरिद बिलसहित उपस्थित हुन निर्देशन दिइएको बताए ।

‘अनुगमनका क्रममा टोलीले खरिद बिल माग्दा दुवै पसलले उपलब्ध गराउन सकेनन्,’ उनले भने, ‘बिक्री गरिएका मास्कको मूल्य नै अस्वाभाविक हो । दुवै पसलले बिक्री गरेका मास्कको खरिद मूल्य त्यति धेरै हुनै सक्दैन । यो सरासर कालो बजारी हो ।’

निर्देशक पौडेलले निर्देशनालयले पोखरालगायतका क्षेत्रमा निरन्तर बजार अनुगमन गरिरहेको बताए । उनले बजारमा कुनै पनि वस्तुको अस्वाभाविक कृत्रिम अभाव सिर्जना गर्ने र चर्को मूल्य असुलेर उपभोक्तालाई ठगी गर्ने व्यवसायीलाई कडा कारबाही गरिने बताए । निर्देशक पौडेलले निरन्तर बजार अनुगमन भइरहने बताए ।

पोखरा क्षेत्रमा ३ रुपैयाँमा खरिद गरिँदै आएको सामान्य माक्सलाई व्यवसायीहरूले अभावको मौका छोपेर ३० देखि ५० रुपैयाँसम्ममा बिक्री गर्दै आएका छन् । के.एन.९५ मास्क सामान्यतया १ सयदेखि १ सय ५० रुपैयाँ होलसेल मूल्यमा पाइने भए पनि केही व्यवसायीहरूले ४ सयदेखि ६ सय रुपैयाँसम्ममा बिक्री वितरण गरिरहेका छन् ।

अनुगमन टोलीले हस्पिटल चोकमा रहेको निर्देश फर्माबाट करिब १ सय स्थान मास्क जफत गरेको छ । पसलमा मास्क राखेर आफ्ना अनुकूलका व्यक्तिलाई मात्र बिक्री गरेको जनगुनासो आएपछि निर्देश फर्मालाई समेत कारबाहीस्वरुप मास्क जफत गरिएको उपभोक्ता मञ्च गण्डकीका अध्यक्ष कपिलनाथ कोइरालाले बताए ।

पोखराका विभिन्न ठाउँमा मास्कको अनुगमन गर्दा धेरै पसलमा मास्क नभेटिएको टोलीमा सहभागी कास्कीका सहायक प्रमुख जिल्ला अधिकारी गुरुदत्त ढकालले बताए । ‘धेरै पसलमा अनुगमन ग¥यौँ, धेरै पसलमा मास्क भेटिएनन्,’ उनले भने, ‘पोखरामा केही सीमित पसलले अस्वाभाविक मूल्यमा मास्क बेचेका हुन सक्छन् ।’

टोलीमा गण्डकी प्रदेश स्वास्थ्य निर्देशनालयका निर्देशक डा. विनोद विन्दु शर्मासहितका अन्य व्यक्तिहरूको सहभागिता रहेको थियो ।

प्रकाशित मिति: बिहीबार, फागुन २२, २०७६ १८:५३