शुद्धीकरण विभागले २१ म्यानपावरकाे सम्पति तान्दै, ६३ को छानबिन हुँदै (सूचीसहित)

शुद्धीकरण विभागले २१ म्यानपावरकाे सम्पति तान्दै, ६३ को छानबिन हुँदै (सूचीसहित)

A+ A A-

सम्पति शुद्धीकरण अनुसन्धान विभागले वैदेशिक रोजगारीमा श्रमिक आपूर्ति गर्दै आएका २१ वटा म्यानपावर कम्पनीको सम्पति तान्ने भएको छ ।

विभागले यी म्यानपावर कम्पनीले वैदेशिक रोजगारीमा कामदार पठाएवापत अकुत सम्पति कमाए पनि विवरण नदेखाएका कारण उनीहरू सम्पति तान्न लागिएको जानकारी दिएको छ । २१ वटा म्यानपावर कप्पनीको सम्पतिमाथि २ वर्षदेखि अनुसन्धान चलिरहेको थियो ।

विभागले अकुत सम्पति आर्जन गरेको आशंकामा ६३ वटा म्यानपावर कम्पनी र तिनीहरूको सञ्चालकहरूमाथि अनुसन्धान अगाडि बढाएको समेत जानकारी दिएको छ । शंकास्पद ६३ वटा म्यानपावर कम्पनीमाथि अनुसन्धान भइरहेको विभागका एक कर्मचारीले बताए ।

विभागले वैदेशिक रोजगारीमा कामदार पठाउने नाममा तथा कर छली गरी अकुत सम्पति आर्जन गरेको आरोपमा ती म्यानपावरलाई अनुसन्धानको दायरामा ल्याई छानबिन भइरहेको जनाएको छ ।

यी हुन् सम्पति तानिने म्यानपावर

विभागले २१ म्यानपावरको सम्पति, कर र आयस्रोतका बारेमा अध्ययन गरेर सम्पति तान्न लागेको हो ।

लाइफ इन्टरनेसनल ओभरसज प्रालि, ट्रष्ट नेपाल ओभरसिज प्रालि, पल्ही ओभरसिज प्रालि, स्काई अफ दि म्यानपावर प्रालि, दित्या इन्टरनेसनल प्रालि, अलहाय एचआर सोलुसन प्रालि, शिखर इन्टरनेसनल म्यानपावर सर्भिसेज प्रालि, वियस ओभरसिर्ज प्रालि, वाइढ स्पेश इन्टरनेशनल प्रालि, अन्जली ओभरसिज प्रालि, अल्फासिम्मा प्रालि, गौतम ओभरसिज प्रालि, अल्फा सिम्मा ह्युमन रिसोर्सेज म्यानेजमेन्ट प्रालि, आरबी ओभरसिज प्रालि, अलसेक्युर रिक्युमेन्ट प्रालि, न्यू ग्लोवल म्यानपावर प्रालि, स्काई वे म्यानेजमेन्ट प्रालि, होम इन्टरनेसनल प्रालि, खोजी रिक्युमेन्ट सभिर्सेस प्रालि, रसुवा ओभरसिज प्रालि, डीडी ओभरसिज प्रालि र स्काई वे म्यानेजमेन्ट प्रालि गरी २१ वटा म्यानपावरको सम्पति छानबिन गर्न तान्न लागिएको विभागका एक कर्मचारी जानकारी दिए ।

२१ वटा म्यानपावरको ८० करोडदेखि ३ अर्ब रुपैयाँसम्म सम्पतिको आयस्रोत भने नखुलेको विभागले जनाएको छ । सम्पति तान्न लागिएका म्यानपावरले धेरै सम्पति आर्जन गरेको, कर छली गरेको, सम्पति आयस्रोतको विवरण देखाउन नसकेको विभागले बताएको छ ।

म्यानपावर कम्पनीलाई मानव बेचबिखन र कर छली गरी २ तरिकाबाट अनुसन्धान अघि बढाइएको समेत विभागका कर्मचारीले जानकारी दिएका छन् । सरकारले मलेसियालगायत खाडी मुलुकहरूमा वैदेशिक रोजगारीमा जानका लागि शून्य लागत निर्धारण गरे पनि म्यानपावर कम्पनीहरूले उच्च शुल्क लिँदै आएका थिए ।

कामदारलाई १० हजार रुपैयाँ तिरेको रसिद दिए पनि रोजगारीमा जाने कामदारसँग उच्च रकम लिई ती म्यानपावरले अकुत सम्पति आर्जन गरेको समेत स्रोतको दाबी छ ।

साथै, अकुत सम्पति आर्जन गर्ने म्यानपावर कम्पनीको छानबिनको क्रममा सरकारलाई आम्दानीवापतको कुनै कर नतिरेको तथा उक्त सम्पति कुन स्रोतबाट आएको हो भन्नेसमेत नखुलेको विभागका एक कर्मचारीले जानकारी दिए ।

प्रकाशित मिति: बुधबार, फागुन २१, २०७६ १६:४५