प्रदेश ५ को बजेट खर्चको अवस्था सुध्रिएन

A+ A A-

प्रदेश ५ का मुख्यमन्त्री शंकर पोखरेलले हरेक कार्यक्रममा बजेट कार्यान्वयनको अवस्था सुधार भएको बताउँदै आएका छन् । अघिल्लो वर्षको तुलनामा बजेट कार्यान्वयनका लागि माताहतका मन्त्रालयलाई मुख्यमन्त्रीले ताकेता गरे पनि बजेट खर्चको अवस्था भने सुध्रने सङ्केत देखिएको छैन ।

प्रदेश सरकारले चालू आर्थिक वर्षको ७ महिनामा जम्मा २२.७२ प्रतिशत बजेट खर्च गरेको छ । माघ मसान्तसम्म ३० प्रतिशत बजेट खर्च गर्ने दाबी गरे पनि जम्मा २२ प्रतिशत मात्र बजेट खर्च भएको प्रदेश लेखा नियन्त्रकको कार्यालयले बताएको छ ।

पछिल्लो ६ महिनामा १८ प्रतिशत मात्र खर्च गरेको सरकारले १ महिनाको अवधिमा ४ प्रतिशत मात्र खर्च गरेको हो ।

सबैभन्दा बढी बजेट उद्योग, पर्यटन, वन तथा वातावरण मन्त्रालयले गरेको छ भने सबैभन्दा कम बजेट खर्च भूमि व्यवस्था, कृषि तथा सहकारी मन्त्रालयले गरेको तथ्याङ्कमा उल्लेख छ ।

उद्योग, पर्यटन, वन तथा वातावरण मन्त्रालयले २५ प्रतिशत बजेट खर्च गर्न सफल भएको छ । चालू आर्थिक वर्षका लागि २ अर्ब ८८ करोड ८१ लाख ११ हजार रुपैयाँ छुट्याइएकामा ७२ करोड ४५ लाख ९५ हजार ८ सय ५७ रुपैयाँ खर्च गरेको छ ।

त्यस्तै, सबैभन्दा कम बजेट खर्च गर्ने भूमि व्यवस्था, कृषि तथा सहकारी मन्त्रालयले ७ प्रतिशत बजेट खर्च गरेको छ ।

कूल ४ अर्ब ७ करोड ६५ लाख ८९ हजार रुपैयाँमध्ये माघ मसान्तसम्म जम्मा २९ करोड ५२ लाख ८१ हजार ५ सय २९ रुपैयाँ मात्र खर्च गरेको छ । पुस मसान्तसम्ममा ६.२९ प्रतिशत बजेट खर्च गरेको यस मन्त्रालयले १ महिनाको अवधिमा १ प्रतिशत मात्र बजेट खर्च गरेको हो ।

त्यस्तै, भौतिक पूर्वाधार विकास मन्त्रालयले २९ प्रतिशत बजेट खर्च गरेको छ । मन्त्रालयले चालू आर्थिक वर्षमा १५ अर्ब ८४ करोड १९ लाख ९ हजार रुपैयाँ बजेटमध्ये ७ महिनाको अवधिमा ३ अर्ब ६९ करोड ८२ लाख रुपैयाँ खर्च गरेको छ ।

त्यस्तै, सामाजिक विकास मन्त्रालयले ७ महिनामा ९९ करोड ८४ लाख ६३ हजार रुपैयाँ खर्च गरेको छ । कूल ४ अर्ब ३९ २२ लाख रुपैयाँ बजेटमध्ये उक्त रकम २२ प्रतिशत हुन आउँछ ।

आर्थिक मामिला तथा कानुन मन्त्रालयले ९ प्रतिशत बजेट खर्च गर्दा आर्थिक मामिला तथा योजना मन्त्रालयले भने १५ प्रतिशत बजेट खर्च गरेको छ । आर्थिक मामिलाले ७ महिनामा ७ करोड ८४ लाख रुपैयाँ र आर्थिक मामिला तथा योजना मन्त्रालयले १५ करोड ९६ लाख २ हजार रुपैयाँ बजेटमध्ये २ करोड ४७ लाख ८१ हजार ८८ रुपैयाँ खर्च गरेको छ ।

मुख्यमन्त्री तथा मन्त्रिपरिषद्को कार्यालयले चालू र पूँजीगततर्फ २५.८५ प्रतिशत बजेट खर्च गरेको छ ।

प्रदेशको कूल विकास बजेट १८ अर्ब १२ करोड २१ लाख रुपैयाँमध्ये हालसम्म ३ अर्ब २९ करोड ८ लाख रुपैयाँ खर्च भएको अर्थ मन्त्रालयले जनाएको छ । बाँकी ५ महिनामा पुँजीगततर्फको कूल बजेटमध्ये ७७ प्रतिशत बजेट खर्च गर्नुपर्ने सरकारलाई चुनौती छ ।

प्रदेश ५ को १८ अर्ब ५७ करोड ६४ लाख ७९ हजार रुपैयाँमध्ये आगामी ५ महिनामा १४ अर्ब ३८ करोड ६ लाख ५२ हजार ३ सय १३ रुपैयाँ खर्च गर्नुपर्नेछ । यता, प्रदेश ५ का प्रवक्ता बैजनाथ चौधरी बजेट खर्च गत वर्षको तुलनामा धेरै सुधार हुने बताउँछन् ।

प्रकाशित मिति: बुधबार, फागुन २१, २०७६ १०:१४