आहा रारा गोल्ड कपको सम्पूर्ण तयारी पूरा

A+ A A-

१८औँ संस्करणको आहा रारा गोल्ड कपको सम्पूर्ण तयारी पूरा भएको छ । २२ फागुनदेखि सुरु भई आगामी १ चैतसम्म हुने कपको आवश्यक तयारी पूरा भएको सहारा क्लब पोखराले जनाएको छ ।

सहाराले आहा रारा खेलको पहिलो दिन आयोजक सहारा क्लब र ब्रिगेड व्वाइज क्लब काठमाडौंबीच उद्घाटन खेल हुने जनाएको छ ।

खेल तालिकाअनुसार सहभागी १० टिममध्ये विभागीय नेपाल टोली, नेपाल पुलिस क्लब र मनाङ–मस्र्याङ्दी क्लब सोझै वाई पाएर क्वार्टरफाइनलमा भिड्नेछन् । त्यस्तै, २३ फागुनमा नेपाल एपीएफ क्लब र झापा ११ का बीच खेल हुनेछ । २४ गते नेपाल पुलिसले सहारा र ब्रिगेडका विजेतामध्ये एकसँग खेल खेल्नेछ ।

२५ फागुनमा नेपाल एपीफ र झापा ११ को विजेतामध्येको एक टिमसँग मनाङ–मस्र्याङ्दी क्लबबीच खेल हुनेछ । त्यसैगरी २६ फागुनमा गान्तोक सिटी क्लब भारत र नेपालको ए डिभिजनबीच रोचक खेल हुनेछ ।

पहिलो चरणको अन्तिम खेल २७ फागुनमा सङ्कटा र विभागीय टिम त्रिभुवन आर्मी क्लबका बीच हुनेछ ।

२८–२९ फागुनमा सेमिफाइनल र १ चैतमा फाइनल खेल हुने सहारा क्लबका अध्यक्ष केशवबहादुर थापाले बताए । उनका अनुसार प्रतियोगितामा उपाधि विजेता हुने टिमलाई १० लाख १ हजार रुपैयाँ र उपविजेता टिमलाई ५ लाख १ हजार रुपैयाँ प्रदान गरिनेछ ।

प्रतियोगिताको अनुमानित आम्दानी १ करोड १८ लाख १ हजार रुपैयाँ रहेको छ भने अनुमानित खर्च ९९ लाख ३८ हजार ५ सय रुपैयाँ हुने क्लबले बताएको छ । प्रतियोगितामा बचत भएको रकम क्लबले सञ्चालन गरेको सहारा एकेडेमीमा खर्च गरिने अध्यक्ष थापाले बताए ।

क्लबले असाहाय बालबालिकाहरूको संरक्षण गर्दै आएको छ । हाल ऐकेडेमीमा १४ जिल्लाका २४ जना बालकहरू आश्रित छन् ।

क्लबले यस वर्ष फुटबलका राष्ट्रिय खेलाडी सुजल श्रेष्ठलाई सवोत्कृष्ट राष्ट्रिय फुटबल खेलाडी सम्मान, २०७६ बाट सम्मान गर्ने भएको छ । सहाराले हरेक वर्ष फुटबल खेलाडीलाई सम्मान गर्दै आएको छ । उनलाई ३५ हजार नगद, प्रमाणपत्र र दोसल्लाले सम्मान गरिनेछ ।

सम्मान गरिने सुजल १३औँ दक्षिण एसियाली खेलकुद (साग)मा नेपाली टिम सम्हालेका ए डिभिजनको क्लब मछिन्द्रका टिम कप्तान हुन् । उनकै कप्तानीमा १३औँ सागमा नेपालले फुटबलमा स्वर्ण पदक जितेको थियो ।

क्लबले प्रतियोगिताको टिकट दरसमेत निर्धारण गरेको जनाएको छ । प्रतियोगिताको प्रिक्वार्टर अर्थात् पहिलो चरणका खेलका लागि १ सय, क्वार्टर फाइनलका लागि १ सय ५०, सेमिफाइनलका लागि २ सय र फाइनल खेलका लागि २ सय ५० रुपैयाँ टिकट दर कायम गरेको छ । यस्तै, सिजनल टिकटका लागि १ हजार ५ सय रुपैयाँ तोकिएको छ ।

प्रकाशित मिति: मंगलबार, फागुन २०, २०७६ १७:३३