सहमति लत्याउँदै, असन्तुष्ट चिढ्याउँदै, स्वेच्छाचारी बन्दै देउवा

A+ A A-

नेपाली कांग्रेसका सभापाति शेरबहादुर देउवाले पार्टीका असन्तुष्ट नेतासँग गत माघमा गरेको सहमतिविपरीत पार्टीका विभाग र जेष्ठ राजनीतिज्ञसभा गठन गर्न थालेका छन् ।

पार्टीको १३औँ महाधिवेशनबाट ४ वर्षका लागि सभापतिमा निर्वाचित सभापति देउवाको कार्यकाल आगामी २५ फागुनमा सकिँदै छ । तर, पद र प्रतिष्ठाको स्वाद चाखिसकेका देउवाका लागि पद त्यागको अवस्था त्यति रुचिकर लाग्ने गरेको छैन ।

त्यसैले देउवाले आफ्नो कार्यकाल सकिनु १ महिनाअघि नै संघीय संरचनाबमोजिम सबै साङ्गठनिक निकायलाई लैजाने प्रक्रिया सुुरु गर्दा निर्धारित समयमा महाधिवेशन गर्न सम्भव नभएको कारण देखाउँदै विधानबमोजिम १ वर्ष कार्यकाल थप गर्ने निर्णय केन्द्रीय कार्यसमितिबाट गराइसकेका छन् ।

मुलुकको कार्यकारी प्रमुखको रूपमा ४ पटक प्रधानमन्त्री भएका कांग्रेस सभपाति देउवाले आफूअनुकूल केन्द्रीय कार्यसमितिबाट निर्णय गराउन खोज्दा असन्तुष्ट नेता रामचन्द्र पौडेल र कृष्णप्रसाद सिटौलाहरूले असहयोग गरेका थिए ।

असन्तुष्ट नेताले बहिस्कार गरे पनि केन्द्रीय कार्यसमितिबाट आफूअनुकूल निर्णय गर्न थालेपछि बहुसंख्यक जिल्ला सभापति लिएर बसेको असन्तुष्ट केन्द्रीय तहका नेताले जिल्ला सभापतिको भेला काठमाडौंमा बोलाएर सभापतिले बहुमतको आधारमा एकलौटी ढंगले गरेको निर्णय कार्यान्वयन नगर्ने चेतावनी दिएका थिए ।

पौडेल, सिटौला र महामन्त्री डा. शशांक कोइरालालगायतको बहिस्कारको बाबजुद २६ मंसिरदेखि बसेको केन्द्रीय कार्यसमितिको बैठकलाई लम्ब्याउँदै देउवाले ११ पुसको बैठकबाट विधानका १ दर्जन दफा निलम्बन गर्दै महाधिवेशनको मिति तोकेको थियो ।

एकलौटी निर्णय गरेपछि असन्तुष्ट नेताहरूले जिल्ला सभापतिको भेलामार्फत् निर्णय कार्यान्वयन नगर्ने चेतावनीपछि तर्सिएका देउवाले सहमतिकै आधारमा महाधिवेशनको मिति घोषणा गर्ने र अन्य निर्णय गर्दै जाने सहमति गरेका थिए । तर, सहमति गरेको १ महिना नबित्दै देउवाले एकलौटी निर्णय गरेका हुन् ।

असन्तुष्ट नेता पौडेलको समूह वीरगञ्ज, हेटौँडा र सिटौला सप्तरीदेखि झापाका कार्यक्रममा सहभागी भइरहेका बेला देउवाले १७ फागुनमा १३ विभागका प्रमुख नियुक्त गरेका हुन् ।

सहमतिमा गर्नुपर्ने महाधिवेशनलाई विवादमा पुर्‍याउने र महाधिवेशन नगर्ने दाउमा देउवा रहेको असन्तुष्ट पक्षधर नेताहरूले बताएका छन् । देउवाले सहमतिअनुसार सबै काम गर्ने भने पनि विभाग गठन गर्ने र आमन्त्रित केन्द्रीय सदस्य मनोनीत गर्ने कार्य भने एकलौटी रूपमा गरेका छन् ।

देउवाले केन्द्रीय विभाग गठनका लागि पौडेल र सिटौलालाई आग्रह गरे पनि उनीहरूले महाधिवेशन घोषणा भएपछि विभाग गठन गर्न नहुने बताएका थिए । तर, देउवाले अन्य असन्तुष्ट नेताको कुरा नसुनी उपसभापति विमलेन्द्र निधिको सल्लाह र इसारामा विभाग गठन गरेको स्रोतले बतायो ।

देउवाले १७ फागुनमा १३ जनालाई केन्द्रीय सदस्य र ५ जनालाई आमन्त्रित केन्द्रीय सदस्यमा मनोनीत गरे । उनले असन्तुष्ट नेताको विरोध र असहमतिलाई वास्ता नगरी पुनः १९ फागुन (सोमबार) ७ केन्द्रीय सदस्यलाई विभागको प्रमुखमा नियुक्त गरेका छन् ।

सोमबार ७ केन्द्रीय सदस्यलाई केन्द्रीय विभागको प्रमुखमा नियुक्त गरेको २ घण्टापछि देउवाले पार्टी कार्यालयका मुख्य सचिव कृष्णप्रसाद पौडेललाई विज्ञप्ति जारी गर्न लगाएर २०७४ सालको प्रदेशसभा र संघीय संसदको निर्वाचनअघि अन्य पार्टीबाट आएकामध्ये २ जनालाई केन्द्रीय सदस्य मनोनीत गरेको जानकारी दिएका छन् ।

देउवाले ६ जनालाई आमन्त्रित केन्द्रीय सदस्यमा मनोनीत गरे भने असन्तुष्ट नेतालाई चिढ्याउने उद्देश्यले ३० सदस्यीय जेष्ठ राजनीतिज्ञसभा गठन गरेका छन् । सभामा मनोनीत गरिएकाहरू सबै सभापति देउवा पक्षधर छन् ।

केही भने कोइराला परिवारका सदस्य नजिक भए पनि असन्तुष्टहरूलाई चयन गरिएको छ । जेष्ठ राजनीतिज्ञसभामा सबैभन्दा धेरै झापाबाट ४ जनालाई मनोनीत गरिएको छ, जसमा पूर्वमहामन्त्री कृष्णप्रसाद सिटौलाका जेठा दाजु डिल्लीप्रसाद पनि परेका छन् ।

पार्टीको हरेक सङ्गठनात्मक निकायमा महाधिवेशन भएको २ महिनाभित्र नियुक्त गरिसक्नुपर्ने वैधानिक व्यवस्थालाई लत्याएर महाधिवेशन घोषणा गरेपछि यस्ता निकाय गठन गर्नु महाधिवेशन कब्जा गर्ने रणनीति भएको नेता प्रदीप पौडेल बताउँछन् ।

देउवाले केन्द्रीय सदस्यमा सोमबार नियुक्त गरेका सर्लाहीका जंगीलाल राय राष्ट्रिय जनता पार्टी (राजपा) नेपाका महामन्त्रीबाट कांग्रेस प्रवेश गरेका थिए ।

यस्तै, डोल्पाका कर्णबहादुर बुढा राप्रपाका केन्द्रीय सदस्य थिए । आमन्त्रित केन्द्रीय सदस्यमा मनोनीत कैलालीका मोहनसिंह राठौर एमाले र सर्लाहीका शम्भुलाल श्रेष्ठ माओवादीको तर्फबाट राज्यमन्त्री थिए ।

कपिलवस्तुका अभिषेकप्रताप शाह तत्कालीन मधेसी जनअधिकार फोरमबाट, लमजुङका दयाराम पाण्डे खस क्षेत्री पार्टीबाट आएका थिए ।

३० सदस्यीय जेष्ठ राजनीतिज्ञसभामा पूर्वमन्त्री तथा पूर्व केन्द्रीय सदस्य ढुण्डीराज शास्त्री, पूर्वसांसद सूर्यमान गुरुङ, ताप्लेजुङका लक्ष्मीप्रसाद ताल्चाभडेल, झापाका पूर्णानन्द शर्मा, डिल्लीप्रसाद सिटौला, केदार ढकाल र प्रमेश न्यौपाने र तेह्रथुमका तेजमान तुम्बाहाम्फेलाई नियुक्त गरिएको छ ।

मुख्य सचिव पौडेलले सभामा दाङका छविकुमार शर्मा र तीर्थराज ज्ञवाली ‘चैतु’, सोलुखुम्बूका देवीध्वज बस्नेत र केशरबाबु थुलुङ राई, महोत्तरीका हरिशंकर मिश्र र रामचन्द्र सिंह, काभ्रेका राजेन्द्र खरेल, कास्कीका खेमराज पौडेल, चितवनका बाबुराम पुरी, देवेन्द्रप्रसाद उपाध्याय र तोपमान गुरुङलाई नियुक्त गरेको जनाएका छन् ।

त्यस्तै, स्याङ्जाका सूर्यप्रसाद रेग्मी र तारापति सुवेदी, धादिङका भरतप्रसाद उप्रेती, गोरखाका चन्द्रप्रसाद न्यौपाने, जुम्लाका लाल हमाल, रूपन्देहीका सूर्यदत्त जोशी र भगवती सिंह, कञ्चनपुरका अन्तराम भट्ट, मदन चन्द र धनकुटाका अजितनारायण थापालाई पनि जेष्ठ राजनीतिज्ञसभामा मनोनीत गरेका छन् ।

प्रकाशित मिति: मंगलबार, फागुन २०, २०७६ १४:५६