पहिले कोरोनामुक्त, अहिले पर्यटकसँगै सतर्क

A+ A A-

नेपाललाई कोरोनाको जोखिमबाट बचाउनका लागि राज्यका तीनै अंगको सक्रियता बढेको छ । सदनमा सांसदले कोरोनाको जोखिमबाट बच्नका लागि सबै तयारी गर्न सरकारको ध्यानाकर्षण गराएका छन् ।

सरकारले आवश्‍यक सतर्कताका लागि केही काम अघि बढाएको छ भने केही महत्त्वपूर्ण कार्यक्रमसमेत स्थगित गरेको छ । यसैबीचमा न्यायालयले जोखिमबाट बच्न गर्नुपर्ने सबै कामका विषयमा सरकारका नाममा अन्तरिम आदेश पनि जारी गरिसकेको छ ।

यस्तो सतर्कता नेपाल सरकारले मात्र देखाएको छैन । संसारभर नै सम्बन्धित देशका सरकारले आफ्ना नागरिकलाई सतर्क गराएका छन् । अहिलेसम्म कोरोनाको सङ्क्रमण फेलिएकै देशमा १७ लाखभन्दा बढी नेपाली रहेका कारण पनि नेपालीमा पनि त्रास बढी भएको देखिएको छ । यद्यपि, विभिन्न देशका सीमित ठाउँमा मात्रै सङ्क्रमण देखिएको हो, सबै ठाउँमा होइन ।

नेपाल सरकारका लागि सन् २०२० विशेष वर्ष रहेको थियो किनकि यो वर्षलाई नेपालले नेपाल भ्रमण वर्षको रूपमा घोषणा गरेको छ । भ्रमण वर्षका लागि भन्दै ४० करोड रुपैयाँभन्दा बढी बजेट छुट्याइएको छ । तामझामका साथ भ्रमण वर्ष उद्‍घाटन गरेको संस्कृति पर्यटन तथा नागरिक उड्ययन मन्त्रालयले र मातहतका निकायले विदेशमा पनि भ्रमण वर्ष प्रचारको कार्यक्रमलाई तीव्रता दिँदै थियो ।

तर, भ्रमण वर्षको पहिलो दिनदेखि नै सरकारको अपेक्षाअनुसारको परिणाम भने देखिएन । भ्रमण वर्ष उद्घाटनमा ४० देशका पर्यटनमन्त्रीलाई निम्ता गरिएकामा २ देशका मन्त्री मात्रै आए । रसियाका राष्ट्रपतिदेखि अमेरिकी राष्ट्पतिसम्म भ्रमण वर्षको उद्घाटनमा बोलाउने चर्चा भएको थियो, यद्यपि त्यसो हुन सकेन ।

भ्रमण वर्षको उद्घाटन कार्यक्रमअन्तर्गत नै विदेशमा गएका संस्कृति, पर्यटन तथा नागरिक उड्डयनमन्त्री योगेश भट्टराई उतै विवादमा परे । डढेलोले आक्रान्त बनेको अस्ट्रेलियामा भ्रमण वर्षको कार्यक्रममअन्तर्गत निकालिएको र्‍याली रोकिएको थियो ।

पछिल्लो समय कोरोनाका कारण भ्रमण वर्ष प्रभावित भएपछि मन्त्रिपरिषद् बैठकले भ्रमण वर्षलाई नै स्थगित गरेको छ । भ्रमण वर्ष सफल बनाउने होइन, कोरोनाको जोखिम घटाउनेमा ध्यान जान जरुरी थियो । अहिले राज्यका तीनै अंग कोरोना जोखिम घटाउन केन्द्रित भएका देख्न सकिन्छ । तर, केही ढिला भएको भने टिप्पणी हुने गरेको छ ।

कोरोना र सरकार

कोरोनामुक्त नेपाल

गत ६ फागुनमा संस्कृति, पर्यटन तथा नागरिक उड्‍डयनमन्त्री योगेश भट्टराईले नेपाललाई कोरोनामुक्त देशको रूपमा घोषणा गरे । उनले विदेशस्थित नियोगहरू तीन दिनभित्र प्रचार गर्नका लागि पनि निर्देशन गरेका थिए ।

हालसम्म नेपालमा एक जनालाई कोरोना लागेको पुष्टि भए पनि उनी अहिले मुक्त भएको र अर्को केस नदेखिएकाले नेपाल कोरोनामुक्त रहेको उनको दाबी थियो । नेपाल कोरोनामुक्त क्षेत्र हो भनेर विश्वभर यसको प्रचार गर्न उनले मातहतका निकायलाई निर्देशन पनि दिए ।

कोरोनामुक्त क्षेत्र भएको बारे अन्तर्राष्ट्रिय सञ्चार माध्यम, सामाजिक सञ्जाल तथा फार्म ट्रिपको माध्यमबाट संसारभर फैलाउन उनको निर्देशन थियो । यो काम पर्यटन बोर्ड, भिजिट नेपाल, २०२० को सचिवालयलाई गर्न उनले निर्देशन दिएका हुन् ।

त्यति मात्र होइन, अंग्रेजी तथा चिनियाँ भाषामा यस्तो खबर संसारभर फैलाउने र त्यसका लागि विदेशमा रहेका नेपाली कूटनीतिक नियोग र नेपालस्थित कूटनीतिक नियोगलाई प्रयोग गर्न उनले निर्देशन दिए । यसको अर्थ चीनबाट पनि कोरोनाबाट बच्न नेपाल आ‌‍‍औँ भन्ने भएको भन्दै पर्यटनमन्त्रीको तीब्र आलोचनासमेत भयो ।

प्रचारचाहिँ नगरौँ

कोरोनामुक्त घोषणा गरेको ११औँ दिनमा भने पर्यटनमन्त्रीलाई प्रचार गर्न आवश्‍यक नरहेको लाग्यो । त्यसै कारणले होला, विदेशमा नेपाल भ्रमण वर्ष, २०२० को प्रवर्द्धनात्मक प्रचार स्थगित गरिएको जानकारी गराए । कोरोनामुक्त भएको घोषणा पर्यटन मन्त्रालयले आधिकारिक निर्णय गरेर गरेको भए पनि स्थगितको विषय भने बौद्ध चामुण्डा हेरिटेज वाक कार्यक्रममा मन्त्री भट्टराईले जानकारी गराएका थिए । त्यस दिन अब देशभित्रकै पर्यटन प्रवर्द्धनमा जोड दिने उनले बताए ।

नेपालभित्रै पनि सतर्क

पर्यटनमन्त्रीले नेपालभित्र प्रवर्द्धनका कार्यक्रमलाई जोड दिन सन्देश दिएको अर्को दिन स्वास्थ्य मन्त्रालयले भने नेपालभित्र पनि सचेत रहन नागरिकलाई आह्‍वान गर्‍यो । यसबीचमा विश्‍व स्वास्थ्य सङ्गठनले नेपाल पनि उच्च जोखिममा रहेको भन्दै आवश्‍यक तयारी गर्न आग्रह गरेको थियो ।

१८ फागुन अर्थात् आइतबार स्वास्थ्यमन्त्री भानुभक्त ढकालले मन्त्रालयमा पत्रकार सम्मेलन गरेर तत्कालका लागि ठूला सभा, सम्मेलन, भोजभतेरसहितका कार्यक्रम नगर्न आह्वान गरे । उनले भीडभाड हुने कार्यक्रम नगर्न आमसर्वसाधारणलाई आग्रहसमेत गरे ।

बोल्यो मन्त्रिपरिषद्

कोरोना भाइरसबाट आवश्‍यक सावधानी अपनाउन आइतबार बसेको मन्त्रिपरिषद् बैठकले पनि केही निर्णय लियो । मन्त्रिपरिषद् बैठकले भ्रमण वर्ष, २०२० लाई नै स्थगित गरिदियो भने सगरमाथा संवाद पनि रोक्ने निर्णय लियो ।

सोमबार अध्यागमन विभागले कोरोना सङ्क्रमित ५ देशको अनअराइभल भिसामा रोक लगाउने निर्णय लियो । विमानस्थल कार्यालयले अनावश्‍यक विमानस्थल नआउनका लागि सर्वसाधरणलाई अपिल पनि गर्‍यो ।

सर्वोच्च पनि सक्रिय

सर्वोच्च अदालतले समेत आवश्‍यक सावधानी र पूर्वाधार निर्माणका लागि आदेश जारी गरेको छ । आइतबार अधिवक्ता पूर्ण राजवंशीले हालेको रिटमा सोमबार नै न्यायाधीश तेजबहादुर केसीको एकल इजालसले विषयको गाम्भीर्यलाई बुझेर ५ देशसँगको उडान रोक्न र ती देशका नागरिकको आगमनमा तीब्र निगरानी राख्न आदेश दिएको छ । कोरोना सङ्क्रमण नहुँदै गर्नुपर्ने र सङ्क्रमणपछि गर्ने कामको विषयमा समेत सर्वोच्चले सुझाएको देखिन्छ ।

प्रकाशित मिति: सोमबार, फागुन १९, २०७६ १९:१८