कोरियाका नेपाली कामदार भन्छन्, 'सरकारले सान्त्वनासमेत दिएन'

A+ A A-

दक्षिण कोरियामा रोजगारीमा कार्यरत पाँचथरका किरण योङहाङ कोरोनाको त्रासमा छन् । कोरियामा फैलिएको कोरोना भाइरसका कारण उनी हाल काम गर्न जान पनि डराउँछन् ।

कोरियामा कोरोना भाइरसको सङ्क्रमण बढ्न थालेपछि अन्य देशका त्यहाँ कार्यरत श्रमिक भने फर्कन थालेको र कतिपयलाई सम्बन्धित देशको सरकारले फर्काउन थालेको किरणले बताए ।

‘कोरियामा कार्यरत सबै नेपाली श्रमिक कोरोनाको त्रासमा छन् । स्वदेश फर्कन खोज्ने धेरै छन् तर फर्कन सक्ने अवस्था छैन । कोरोना भाइरस लाग्यो भने कम्पनीले उपचार गरिदियो भने राम्रो होला नत्र के हुन्छ, थाहा छैन’, उनले भने, ‘अन्य देशले आफ्ना देशका नागरिकको अवस्था बुझ्न कम्पनीमा पत्राचार गरिरहेका छन् । नेपाल सरकारले कोरियामा रहेका नेपालीको अवस्था बुझ्नका लागि कोरियामा रहेको नेपाली दूतावास बाहिर निस्कएको छैन ।’

जस्तोसुकै त्रास भए पनि काम त गर्नै पर्ने उनको भनाइ छ ।

चीनको वुहानबाट सुरु भएको कोभिड कोरोना भाइरसको सङ्क्रमण दक्षिण कोरियामा बढ्दो छ । यसको त्रास कोरियामा कार्यरत नेपाली श्रमिकमा पर्न थालेको छ । कोरियामा करिब ५० हजार नेपाली रहेको सरकारी अनुमान छ । तीमध्ये कोरियामा हाल ४२ हजार नेपाली श्रमिक रोजगारीमा कार्यरत रहेको रोजगार विभागअन्तर्गतको ईपीएस शाखाले जनाएको छ ।

कोरियामा रहेका नेपाली श्रमिक कोरोना भाइरसको त्रासका कारण काममा जान नै छाडेको बताउँछन् ।

पाँचथरकी खिमा योङहाङ कोरियाको एक कम्पनीमा कार्यरत छन् । खिमाले अहिले कोरोना भाइरसका कारण कम्पनीभन्दा बाहिर हिँडडुल नगर्ने गरेको बताइन् ।

‘कोरियामा कार्यरत अन्य देशका नागरिक कोरिना भाइरसको सङ्क्रमण फैलिन थालेपछि कम्पनी नै छाडेर भाग्न थालेका छन् । कतिपय देशले कोरियामा कार्यरत श्रमिकको स्वास्थ्य परीक्षणका लागि डाक्टरको व्यवस्था नै गरिसकेका छन्’, उनले भनिन्, ‘नेपाली दूतावासमा फोन गरेँ तर उठ्दैन । कोरियामा कार्यरत नेपाली श्रमिकलाई कोरोना भए सरकारले उद्धार त के उपचारका लागि पहल गर्न सक्दैन होला ।’

कोरियामा रहेका नेपाली श्रमिकले कोरोना लाग्यो भने मरिन्छ होला मात्र भन्ने गरेको उनको भनाइ छ ।

कोरियाबाट उद्धार गर्नुपर्ने अवस्था आए समस्या हुन सक्ने देखिन्छ । कोरियाका रोजगारदाता कम्पनीले आफ्नै देशका नागरिक जस्तो उपचार गर्ने आश्वासन दिएको झापाका राज आचार्यले कोरियाबाट बताए । सरकारले यति ठूलो संख्यामा रहेका नेपाली श्रमिक उद्धार गर्न नसक्ने उनको भनाइ छ ।

‘सरकारले श्रमिक रोजगारीमा पठाउनमा मात्र जानेको छ । समस्या आए उद्धार गर्ने विषयमा सोचेको हुँदैन । यसका कारण कोरोना भाइरस जस्ता महामारीले भेटाएमा उपचार कम्पनीले गरेन भने ज्यान नै जोखिममा हुन्छ’, उनले भने, ‘यस्तो बेला कोरियामा रहेका राजदूतवासले सान्त्वना पनि दिन सकेको छैन । कोरोनाका कारण नेपाली श्रमिकको अवस्था कस्तो छ भने बुझ्नका लागि कम्पनीसँग जानकारीसमेत लिएको छैन ।’

अहिलेसम्म कुनै मुलुकले आफ्ना नागरिकलाई स्वदेश फर्काउनुपर्ने अवस्था नआएको श्रम, रोजगार तथा सामाजिक सुरक्षा मन्त्रालयले जनाएको छ । नेपाली श्रमिक कार्यरत देशमा कति नेपालीलाई कोरोना लाग्यो भनेर तथ्याङ्कसमेत लिन सकेको छैन । नेपालमा एक मात्र अन्तर्राष्ट्रिय विमानस्थलमा पनि कोरोना भाइरसको कडा जाँच नहुने गरेको पाइएको छ ।

नेपाली श्रमिकको मुख्य रोजगारदाता देशका कम्पनीले कोरोना भाइरसको कडा स्वास्थ्य जाँच गरेर मात्र श्रमिक रोजगारीका लागि पठाउन कूटनीतिक नियोगमार्फत् आग्रह गरिरहेकका छन् ।

दक्षिण कोरियामा कोरोना (कोभिड– १९) बाट सङ्क्रमित संख्या करिब २ हजार पुगेको अन्तर्राष्ट्रिय सञ्चार माध्यमले जनाएका छन् । त्यससमा १५ जनाको मृत्यु भइसकेको छ । अवस्था हेरी केही दिनमै आपतकाल घोषणा गर्ने कोरिया सरकारको तयारी रहेको विदेशी सञ्चार माध्यमले जनाएका छन् ।

मलेसिया, कतार, ओमान, यूएई, जापान र चीनसँग सीमा जोडिएका देशका रोजगारदाता कम्पनीले तत्काल श्रमिक नपठाउन त्यहाँ रहेका नेपाली दूतावासलाई पत्राचार गर्न थालेका छन् ।

यी देशमा समेत कोरोना भाइरसको सङ्क्रमणका कारण नेपाली श्रमिकले त्रासका बीच काम गरिरहेको उनीहरू बताउँछन् । हाल कोरोना भाइरस ५० वटा देशमा फैलिएको विश्व स्वास्थ्य सङ्गठनले पुष्टि गरिसकेको छ । चीनलगायत कतिपय देशले स्वास्थ्य सङ्कटकालको घोषणासमेत गरिसकेका छन् ।

प्रकाशित मिति: आइतबार, फागुन १८, २०७६ १६:५८