असन्तुष्ट फकाउँदै देउवा : १३ विभाग गठन, पौडेल पक्षको आपत्ति

A+ A A-

नेपाली कांग्रेसका सभापति शेरबहादुर देउवाले पार्टीको महाधिवेशन घोषणा गरेपछि पार्टीका १३ विभाग गठन गरेकाेमा असन्तुष्ट पक्षले आपत्ति जनाएको छ ।

सभापति देउवाले पार्टी उपसभापति विमलेन्द्र निधिको सल्लाहमा शनिबार असन्तुष्ट नेताहरूको सहमतिविना नै १३ विभाग गठन गरेका हुन् ।

सभापति देउवाले पार्टीे विधानको धारा ३७ (१) (ग)बमोजिम पार्टी केन्द्रीय कार्यसमितिका १३ जनालाई केन्द्रीय विभागहरूको प्रमुखमा मनोनयन गरी विभाग गठनको प्रक्रिया अघि बढाएका हुन् ।

शनिबार साँझ १३ केन्द्रीय विभाग गठन गरेकामा पार्टी नेता रामचन्द्र पौडेलले आपत्ति जनाउँदै महाधिवेशन घोषणा भइसकेको अवस्थामा विभाग गठन गर्नु आचारसंहिताविपरीत भएको दाबी गरेका छन् ।

पार्टी महामन्त्री डा. शशांक कोइरालालाई लिएर वीरगञ्ज पुगेका पौडेलले पार्टी कार्यकर्ता प्रशिक्षण कार्यक्रममा सरकारको सर्वसत्तावादी चरित्र र एकाधिकारकाविरुद्ध एकजुट भएर लाग्नुपर्ने अवस्थामा सभापति देउवाले आफूअनुकूल विभाग गठन गरेको आरोप लगाएका हुन् ।

देउवाले असन्तुष्ट नेता पौडेललगायतले बहिष्कार गरेपछि २६ मंसिरदेखि केन्द्रीय कार्यसमिति बैठक बोलाउँदै ११ पुसमा पार्टी विधानको विभिन्न धारा निलम्बन गरी केन्द्रीय विभागको संख्या ४७ बनाउने निर्णय गरेको थियो ।

पार्टीको पुरानो विधानअनुसार महाधिवेशन भएको २ महिनाभित्र र नयाँ विधानअनुसार ६ महिनाभित्र त्यस्ता विभाग गठन गरिसक्नुपर्छ । सभापति देउवाले १४औँ महाधिवेशन आगामी ७–१० फागुन २०७७ मा गर्ने प्रस्ताव गरी केन्द्रीय कार्यसमितिबाट निर्णय गराइसकेका छन् ।

असन्तुष्ट पक्षको सहमतिविना नै सभापति देउवाले १३ केन्द्रीय सदस्यलाई विभागीय जिम्मेवारी सुम्पिएका हुन् । विभाग गठन गर्न विभाग संयोजकमा बस्ने केन्द्रीय सदस्यको नाम दिन देउवाले गरेको आग्रहलाई पौडेल र अर्का नेता कृष्णप्रसाद सिटौलाले अस्वीकार गरेका थिए ।

महाधिवेशनको मुखमा आएर भए पनि सभापति देउवा असन्तुष्ट पक्षलाई किनारा लगाउन र कमजोर बनाउन पार्टीका सबै विभाग र निकायलाई पूर्णता दिने योजनामा छन् ।

केन्द्रीय कार्यसमितिले संशोधन गरेको विधानअनुसार ४७ वटा विभाग गठन गरिए पार्टीका २ हजार ३ सय ५० जनाले अवसर पाउनेछन् । सभापति देउवाले विधानअनुसार ७ प्रदेशमा प्रदेश कार्यसमिति भने गठन गर्ने योजना बनाएका छैनन् ।

यता, सभापति देउवाले महाधिवेशनमा आफ्नो प्रभाव देखाउन पौडेल, कोइराला र सिटौला समूहका असन्तुष्ट नेतालाई धमाधम पार्टीमा अवसर दिने रणनीति बनाएका छन् ।

देउवाले शनिबार १३ विभागीय प्रमुखमा नियुक्त भएका ३ केन्द्रीय सदस्यहरू संस्थापनइतरका हुन् ।

संस्थापनइतर अर्थात् रामचन्द्र पौडेल पक्षबाट केन्द्रीय सदस्यमा निर्वाचित गोविन्द भट्टराई र चीनकाजी श्रेष्ठलाई क्रमशः नेपाल जनसम्पर्क समिति समन्वय विभाग र उद्योग व्यापार विभाग संयोजकमा नियुक्त गरेका हुन् ।

त्यस्तै, नेता कृष्णप्रसाद सिटौलाको सिफारिसमा केन्द्रीय सदस्य मनोनीत भएका शिवप्रसाद हुमागाईंलाई श्रमिक तथा ट्रेड युनियन विभागको जिम्मेवारी दिइएको छ ।

१३औँ महाधिवेशको मुखैमा पुरानो संस्थापन कोइराला गुट छाडेका अर्जुनप्रसाद जोशी, आनन्दप्रसाद ढुंगाना र फरमुल्लाह मन्सुरलाई पनि विभागीय प्रमुख दिइएको छ । जोशीलाई स्थानीय तह समन्वय, जोशीलाई वित्तीय तथा सहकारी संस्था समन्वय र मन्सुरलाई मुस्लिम विभागको जिम्मेवारी दिइएको छ ।

देउवाले पार्टीमा सबैभन्दा महत्त्वपूर्ण मानिएको सङ्गठन विभागको जिम्मेवारी पार्टीका पुराना नेता गोपालमान श्रेष्ठलाई दिएका छन् । त्यस्तै, केन्द्रीय सदस्य रमेश रिजाललाई संघीय मामिला तथा प्रदेश समन्वय र अजयकुमार चौरसियालाई तराई–मधेस समन्वय विभागको संयोजक तोकिएको छ ।

यस्तै, महेन्द्र यादवलाई यातायात व्यवसायी समन्वय, शङ्कर भण्डारीलाई तरुण, सीता गुरुङलाई आदिवासी जनजाति र प्रवक्ता विश्वप्रकाश शर्मालाई सूचना, सञ्चार तथा प्रचार विभागको संयोजकको जिम्मेवारी दिइएको छ ।

मनोनीत १३ मध्ये उपसभापति निधिनिकटका ५ जना परेका छन् । धनुषाका ढुंगाना र यादव, बाराका मन्सुर, बाराका चौरसिया र तनहुँका भट्टराई निधिनिकटका हुन् ।

पार्टी सङ्गठनमा प्रभाव देखाउन देउवाले विधान तथा नियमावलीको व्यवस्थाबमोजिम केन्द्रीय कार्यसमितिको आमन्त्रित सदस्यमा दाङका पूर्वसांसद कृष्णकिशोर घिमिरे, झापाका गोपालकुमार बस्नेत र सुधीरकुमार शिवाकोटी, धनकुटाका मनोहरनारायण श्रेष्ठ र तनहुँका धु्रव वाग्लेलाई मनोनयन गरेका छन् ।

घिमिरे नेता पौडेलनिकटका हुन् भने शिवाकोटी सिटौलानिकटका हुन् । देउवाले पार्टीका आमन्त्रित केन्द्रीय सदस्यमा हालसम्म आधा दर्जनलाई मनोनयन गरिसकेका छन् ।

प्रकाशित मिति: आइतबार, फागुन १८, २०७६ १३:४२