पर्वतीय विज्ञान तथा प्रविधि विश्वविद्यालय बन्ने

A+ A A-

कर्णाली प्रदेश सरकारको मन्त्रिपरिषद् बैठकले कर्णालीमा पर्वतीय विज्ञान तथा प्रविधि विश्वविद्यालय बनाउन विधेयकको सैद्धान्तिक सहमति दिएको छ ।

पर्वतीय विज्ञान तथा प्रविधि विश्वविद्यालय बनाउन विधेयकको सैद्धान्तिक सहमति दिएपछि सामाजिक विकास मन्त्रालयले विश्वविद्यालय बनाउनका लागि विधेयक तथा ऐनको मस्यौदा तयार गर्न तीव्र तयारी गरेको हो ।

कर्णाली प्रदेशमा पर्यापर्यटन, जल, जङ्गल र जडिबुटी अध्ययन तथा अध्यापन गराउनका लागि पर्वतीय विज्ञान तथा प्रविधि विश्वविद्यालय बनाउन लागिएको हो ।

यस विश्वविद्यालयको अवधारणाका विषयमा व्यापक छलफल गरिने सामाजिक विकास मन्त्रालयका प्रवक्ता विष्णुप्रसाद अधिकारीले बताए । ‘गत आर्थिक वर्षमा नै पर्वतीय विज्ञान तथा प्रविधि विश्वविद्यालय बनाउने भनेर मन्त्रालयले तयारी थालेको थियो’, उनले भने, ‘अहिले मन्त्रिपरिषद्को बैठकले विधेयकका लागि सैद्धान्तिक सहमति दिएपछि तीव्र तयारी थालिएको छ ।’

विधेयकका लागि मन्त्रालयले एउटा कार्यदल नै बनाएर काम गरिरहेको प्रवक्ता अधिकारीले बताए । ‘कार्यदल बनाएर अहिले पर्वतीय विज्ञान तथा प्रविधि विश्वविद्यालयका विषयमा राय, सुझाव र छलफल गरिइरहएिको छ’, उनले भने, ‘केही दिनमा विज्ञ समूह तथा अन्य सरोकारवाला निकायसँग छलफल गरेर विधेयक, कार्यविधि र ऐन बनाउँछौँ ।’

विधेयक तयारी गरेर मन्त्रिपरिषद्‍मा पठाउने र चालू हिउँदे अधिवेशनमा प्रदेशसभामा पेस गरिने प्रवक्ता केसीले जानकारी दिए ।

पर्वतीय विज्ञान तथा प्रविधि विश्वविद्यालयमा हाई अल्टिच्युड म्याराथुन, खेलकुद, पर्यटन गाइड, पर्यटन नेचर, कृषिसँग सम्बन्धित विषयहरू अध्ययन, अनुसन्धान, जलसँग सम्बन्धित हाइड्रो इन्जिनियरिङ, उत्पादन, जडिबुटीको प्रशोधन, उत्पादन र आयुर्वेदिक औषधिको उत्पादनसम्मका विषय अध्ययन तथा अध्यापन गराउन सकिने सामाजिक विकास मन्त्रालयले जनाएको छ ।

सामाजिक विकास मन्त्रालयले गत आर्थिक वर्षमा नै पर्वतीय विज्ञान तथा प्रविधि विश्वविद्यालय स्थापना गर्ने तयारी स्वरूप बजेट विनियोजन गरेको थियो ।

गत आर्थिक वर्षमा नै पर्वतीय विज्ञान तथा प्रविधि विश्वविद्यालयका लागि बजेट विनियोजन गरेर विश्वविद्यालयका प्राविधिक, अवधारणाका विषयमा अध्ययन, अनुन्धान गरिएको सामाजिक मन्त्रालयले जनाएको छ ।

प्रकाशित मिति: बुधबार, फागुन १४, २०७६ ११:४२