दलीय स्वार्थका कारण विद्यालय ७ महिनादेखि अध्यक्षविहीन

A+ A A-

रुपन्देहीको बुटवल उपमहानगरपालिका– ५ स्थित ज्ञानोदय माध्यमिक विद्यालय ७ महिनादेखि अध्यक्षविहीन बनेको छ । बुटवल उपमहानगरपालिका र विद्यालयबीच व्यवस्थापन समिति गठन गर्ने विषयमा असमझदारी भएपछि विद्यालय अध्यक्षविहीन भएको हो ।

शिक्षा ऐन २०७१ को नवौँ संशोधनअनुसार विद्यालय व्यवस्थापन समितिका अध्यक्षको पदावधि सकिनुअघि नै अध्यक्ष चयन हुनुपर्ने प्रावधान रहे पनि वडा अध्यक्षको व्यक्तिगत स्वार्थकै कारण हालसम्म विद्यालय अध्यक्षविहीन बनेको छ ।

गत १ भदौदेखि विद्यालय व्यवस्थापन समितिका अध्यक्ष रामबहादुर कार्कीको म्याद सकिएको हो । तर कार्कीको म्याद सकिएको ७ महिना बितिसक्दा पनि राजनीतिक स्वार्थका कारण विद्यालय व्यवस्थापन समिति चयन हुन नसकेको विद्यालयका प्राचार्य टीकाराम शर्मा पौड्यालले बताए ।

शिक्षा नियमावलीअनुसार प्रत्येक ३/३ वर्षमा नयाँ विद्यालय व्यवस्थापन समिति गठन गरिनुपर्दछ । महिनौँदेखि विद्यालय अध्यक्षविहीन भएपछि गत १६ माघमा विद्यालय व्यवस्थापन समिति गठन सहजीकरण समितिको बैठक बसेर अभिभावक भेला बोलाउने निर्णय पनि गरियो ।

विद्यालय निरीक्षक टीकाराम पन्थीको संयोजकत्वको सो समितिले २ फागुनमा अभिभावकको नामावली प्रकाशन गर्ने र ११ फागुनमा अभिभावक भेला गर्ने निर्णय गरेको थियो । तर, वडा अध्यक्ष तेजप्रसाद सुनारले आफ्ना कार्यकर्तालाई विद्यालय व्यवस्थापन समितिको अध्यक्ष र सदस्य बनाउन खोज्दा विद्यालयमा विवाद उत्पन्न भएको छ । सुनार नेकपानिकट हुन् । नेकपा र नेपाली कांग्रेसले आफूनिकटका अभिभावक राख्न खोज्दा विवाद भएको हो ।

अध्यक्ष सुनारले आफ्ना कार्यकर्ता राख्ने मनशायले २ फागुनमा प्रकाशित अभिभावकको नामावलीमा फोन नम्बर नभएको र विद्यार्थीहरूको नाम प्रकाशित लिष्टमा नभएको भन्दै ४ जना अभिभावकको नाम थपेर विद्यालयले ८ फागुनमा पुनः अभिभावकको नामावली प्रकाशनसमेत गरेको थियो ।

एक अभिभावकले भने, ‘बोल्न नजान्ने अभिभावकलाई समेत वडा अध्यक्षले समितिमा राख्ने प्रयासमा हुनुहुन्थ्यो । आफ्ना मान्छे नभएपछि भेला स्थगनका लागि पत्र पठाउनुभयो ।’

विद्यालयमा कुल ३ सय ५६ अभिभावकमध्ये अभिभावक भेलामा २ सय १० जना आएका थिए । भेलाले टेकमान रोका, धिरज कार्की, रेखा श्रेष्ठ र जुना तिवारीलाई निर्विरोध निर्वाचित गरेको छ । बाँकी २ सदस्य निर्वाचित सदस्यले मनोनय गर्नेछन् र अध्यक्ष चयन हुनेछ ।

स्रोतका अनुसार अध्यक्ष सुनारले विद्यालय व्यवस्थापन समितिको अध्यक्षमा जलिल मियालाई ल्याउन खोजेको तर नमिलेपछि अध्यक्षले भेला स्थगन गरेका हुन् । बुटवल उपमहानगरपालिकाका शिक्षा महाशाखा प्रमुख मित्रमणि खनालले वडा अध्यक्ष र उपमहानगरपालिकाको प्रतिनिधिविनाको भेलाले गरेको निर्णय मान्य नहुने बताए ।

वडा अध्यक्ष सुनारले भने, ‘अभिभावकहरूको नामावली प्रष्ट नखुलाएको र कैयौँ अभिभावकले भेलाको जानकारी नपाएको गुनासो आएपछि तत्कालका लागि भेला स्थगन गरिएको जानकारी दिन पत्राचार गरिएको हो ।’

विद्यालय व्यवस्थापन समितिमा अध्यक्ष चयन नहुँदा त्यसको प्रत्यक्ष असर शिक्षक नियुक्तिदेखि पूर्वाधार विकाससम्ममा परेको छ । प्राचार्य पौड्यालले समिति गठन नहुँदा २ जना रिक्त दरबन्दीमा शिक्षक ल्याउन नसकिएको र भौतिक सुधारका लागि आवश्यक रकम लिन पनि अप्ठयारो भएको बताए ।

प्रकाशित मिति: मंगलबार, फागुन १३, २०७६ १६:५८