पानी आयो, अब बुहारी आउँछिन्

A+ A A-

प्युठान जिल्लाको स्वर्गद्वारी नगरपालिका– ७ रानीटारमा २०२२ सालमा विवाह गरेर आएकी भूमि बि.क.ले खोलाबाट पानी बोकेरै २ दशक बिताइन् । खानेपानीकै लागि रातदिन नभनी ठाडोखोला र पँधेरी खोला धाएकी ६६ वर्षीया भूमि अहिले घरघरमा पानी आएपछि भने खुसी भएको बताउँछिन् ।

‘हामीले दुःख गर्‍यौँ । अहिलेका बुहारीलाई सुख भयो । बुहारीलाई सुख भएपछि हामीलाई पनि भयो’, भूमिले भनिन्, ‘म मर्ने बेला हुँदा बल्ल बुहारीलाई सजिलो भयो ।’

पानी अभावकै कारण कुनै समय रानीटार र तापका युवालाई छोरी दिनसमेत अभिभावक हिच्किचाउँथे । कारण, त्यहाँ खानेपानी थिएन ।

खानेपानीकै लागि रानीटारका मानिस २ घण्टा लगाएर एक गाग्री पानी ल्याउन ठाडोखोला र पँधेरी खोलामा पुग्नुपथ्र्यो । २ घण्टा लगाएर ल्याएको पानी पर्याप्त चलाउन पनि हात खुम्च्याउनुपथ्र्यो ।

६० वर्षीया पद्माकुमारी अधिकारीले पैसा तिरेरै भए पनि पानी पिउन पाउँदा खुसी लागेको बताइन् । उनका अनुसार २ घण्टा लगाएर ल्याएको एक गाग्री पानी उतिखेरै सकिन्थ्यो । एक जनाको काम दिनभर खोलाबाट पानी बोक्न नै ठिक्क हुन्थ्यो ।

विगतका भोगेको दुःख सम्झिए पनि अहिले घरको ढोकामै धारा जोडिएपछि भने उनी दंग छन् । उनी भन्छिन्, ‘गाउँमा पानी नहुँदा नुहाउन खोलामा जानुपर्ने बाध्यता थियो । बाहिर नुहाउँदा समस्या हुने गथ्र्यो तर अहिले त्यो समस्या हटेको छ । कुनै बेला छोरी दिन नमान्ने यस गाउँमा अहिले पानी आउँदा धेरै खुसी पनि लागेको छ, पानी आयो अव बुहारी सजिलैआउँछिन् ।’

लिफ्टिङ गरेर खानेपानी योजना

रानीटार र तापमा खानेपानीको चरम समस्या भएपछि अहिले त्यहाँ लिफ्टिङ गरी खानेपानी आयोजना लगिएको छ । खानेपानी योजना गाउँमा पुगेपछि स्थानीय खुसी भएका त छन् नै, पहिले २ घण्टा लगाएर ठाडोखोला र पँधेरी खोलाबाट एक गाग्री पानी ल्याउने दिन अब स्मरणमा सीमित भएका छन् ।

अहिले पानी घरमा आउँदा विगतका दिनहरू भुल्दै गएको रानीटारकै ६० वर्षीय यमी अधिकारी बताउँछिन् । खानेपानी सरसफाइ डिभिजन कार्यालय प्युठानले अहिले रानीटार र तापलाई लक्षित गरेर तत्कालीन बेलवासले ५–८ आयोजना अगाडि बढाएको छ ।

२ स्किम रहेको आयोजनाअन्तर्गत पहिलो चरणमा १ सय ५० धाराहरू जडान गरिएको कार्यालयले बताएको छ । दङ्गल खोलाबाट ल्याएको पानीलाई पहिलो चरणमा १ सय ५० धारामा जडान गरिएको र दोस्रो चरणमा ६ सय ७७ घरधुरीलाई खानेपानी वितरण गरिने आयोजना प्रमुख इन्जिनियर आबेद हुसेनले बताए ।

दोस्रो चरणमा बेलवास लिफ्टिङ आयोजनाअन्तर्गत माडी खोलाबाट पानी ल्याउनका लागि पाइपहरू बिच्छ्याइसकिएको र हालसम्म आयोजनाको ८० प्रतिशत काम सम्पन्न भएको उनले बताए ।

यो आर्थिक वर्षभित्र आयोजना सम्पन्न गर्ने गरी काम भइरहेको र लिफ्टिङको पानी वितरणमध्ये करिव ४ सय घरमा मात्र धारा जडान बाँकी रहेको उनले बताए ।

२ करोड ४९ लाख ३० हजार ६ सय २४ रुपैयाँ लागतको निर्माण भइरहेको आयोजना उपभोक्ता समितिको २० प्रतिशत श्रमदान रहेको छ ।

वडा ७ का अध्यक्ष पदम भट्टराई प्रदेश सरकारको सहयोगमा स्वर्गद्वारीका साविकका ५ वडामध्ये वडा नं. ५, ६, ७ र ८ वडालाई माडी खोलाबाट लिफ्टिङ गरी खानेपानी वितरण गरिरहेको बताउँछन् ।

लिफ्टिङ गरिएको पानी १३ सय मिटर माथि राख्नका लागि १४–१४ घनमिटरका २ वटा ट्याङ्की निर्माण गरिएको छ । खोलाबाट ल्याइएको पानी प्रति सेकेण्ड ६.६ लिटरका दरले ट्याङ्कीमा झर्ने भएकाले खानेपानी वितरणमा समस्या नहुने वडा अध्यक्ष भटट्राईले बताए ।

खानेपानी आयोजनालाई दिगो बनाउन ८ हजार लिटरलाई न्यूनत्तम मानेर कम्तीमा १ सय देखि १ सय ५० रुपैयाँसम्म शुल्क निर्धारण गरेको छ । त्यसका अलावा उपभोक्ताले खपत गरेको अनुपातका आधारमा प्रति युनिट (१ हजार लिटर) २० देखि २५ रुपैयाँसम्म महसुल शुल्क राखिएको छ ।

प्रकाशित मिति: शुक्रबार, फागुन ९, २०७६ १४:३६