‘जानी नजानी’ मा जम्लिन त ‘चन्द्र नन्दनी’ की चाँद

A+ A A-

शुक्रबारदेखि ‘जानी नजानी’की नायिका निरिशा बस्नेत नेपाली सिनेनगरीमा पाइला टेक्दै छिन् । यसबारे उनी एकदमै उत्साहित पनि छन् । उत्साहसँगै उनको मनमा चिन्ता पनि छ ।

सिनेमाको ट्रेलर सार्वजनिक हुँदासम्म उनी ढुक्क थिइन् । भर्खरै रिलिज भएको गीतमा दर्शकको प्रतिक्रियाले उनलाई झनै उत्साहित बनाएको निरिशा बताउँछिन् । ‘सामाजिक सञ्जालमा आएका प्रतिक्रिया हेर्न र पढ्न व्यस्त छु, हाम्रो टीमले सबैको सकरात्मक प्रतिक्रिया मात्रै पाइरहेको छ,’ निरिशाले भनिन् ।

उनले दर्शकको मन जित्न सक्ने अपेक्षा लिएकी छिन् ‘जानी नजानी’ बाट । नेपाली सिनेमामा डेब्यु भएर पनि मनमा केही चिन्ता लाग्छ उनलाई । उनी भन्छिन्, ‘मनमा चिन्ता हुदो रहेछ । कलाकार भए पनि जिम्मेवारी थपिएको महसुस हुँदोरहेछ ।’

उनलाई लाग्छ, दर्शकको माया पाउँदा अर्काे खालको मजा आउँदो रहेछ । सिनेमा रिलिजको मिति नजिकिदा उनलाई उत्साहित महसुस भएको छ । कहिले रिलिज होला भन्ने प्रतिक्षामा छिन् उनी ।

भारतीय टेलिभिजन च्यानल ‘सोनी’बाट प्रसारण हुन ‘चन्द्र नन्दनी’ जस्ता टेलिशृङ्खलाको मुख्य भूमिकामा अभिनय गरेकी निरिशा केही समय उतै व्यस्त थिइन् । आफ्नो पढाईसँगै अभिनयको पहिलो खुड्किलो चढ्दै थिइन मुम्बईमा ।

निर्देशक बसन्त बस्नेत ‘जानी नजानी’का लागि सुहाँउदो ‘क्यारेक्टर’ को खोजीमा थिए । निरिशाका पिता विश्व बस्नेतसँगको चिनजानले नै बसन्तले उनलाई भेटेका थिए । उनले काम गरिसकेको र सुहाउदो क्यारेक्टर भेटेकाले बसन्तले उनलाई फाइनल गरे ।

‘बसन्त सर (बस्नेत) ले ‘स्क्रिप्ट’ सुनाउनु भयो, मैले खोजेको जस्तो ‘स्क्रिप्ट’ पाएँ । ‘स्क्रिप्ट’मा जस्तो आफू क्यारेक्टर पनि उस्तै पाए । त्यसैले क्यारेक्टरलाई निर्धक्क न्याय गर्न सक्छु भन्ने आत्मविश्वास बढ्यो’, उनले भनिन् ।

‘नेपाली फिल्म उद्योग ‘सिस्टमेटिक’ बनेको छ, यो हुनु नै नेपाली सिनेमाको विकास हुनु हो,’ उनी भन्छिन् । हिरोइनको नाम लेखाउनको लागि मात्रै आफूले सो फिल्ममा काम नगरेको निरिशाको दाबी छ ।

‘हिरोइन बन्नको लागि मात्रै सिनेमामा काम गरेको होइन, कथा र क्यारेक्टर चित्त बुझेर काम गरेको हूँ,’ उनले भनिन् । सुटिङ्मा उनलाई खासै गाह्रो भएन । क्योरक्टर सुहाउँदो भएकोले उनलाई चालै नपाई सुटिङ सकिए जस्तो भयो ।

‘यसैमा रमाउन चाह्यो भने अभिनय साधारण काम हो, यो जटिल पनि छ, संवेदनालाई प्रस्तुत गर्न सक्यो भने राम्रो तर सकेन भने दर्शकले नसकेको कुरा नोटिस् गर्नुहुन्छ,’ निरिशाले थपिन् ।

निरिशालाई यो आफ्नो पहिलो सिनेमा भएकाले अभिनय राम्रो भनुन् भन्ने अपेक्षा छ । यो सिनेमाकोे कामबाट अर्काे सिनेमामा काम पाउनु नै आफ्नो कमाइ हुने उनी बताउछिन् । ‘दर्शकले राम्रो भनेको सुन्नेसँगै आगामी दिनमा वायोपिक सिनेमा गर्ने इच्छा छ, त्यस्ता सिनेमामा लागि नाई नास्ती गर्दिन्’, उनले भनिन् ।

सानै उमेरदेखि अभिनयमा रुचि थियो निरिशाको । आफ्ना पिता विश्व बस्नेतले सिनेमाको विभिन्न कार्यक्रमको अवार्ड पाउदा उनलाई आफू पनि कहिले अभिनय गर्ने भन्ने सोंच आउथ्यो । कलाकारिता बुझेको परिवार भएपनि आमा शारदालाई भने नेपाली कलाकारिताम छोरी असुरक्षित लाग्थ्यो ।

‘तर अहिले ममी ‘कन्भिन्स्’ हुनुहुन्छ, मेरो कामलाई ‘अप्रिसियट’ गर्नुहुन्छ, अहिले मेरो कामप्रति कसैको रोकतोक छैन्, सबैको सपोर्ट छ,’ निरिशाले भनिन् ।

सिनेमा अभिनय गर्ने पाउनु पिताको कारण र चिनजानले हो भन्छिन् उनी । र, आगामी दिनमा नेपाली सिने नगरीमा आफ्नो बेग्लै पहिचान बनाउन खोज्ने निरिशा बताउँछिन् ।

पछिल्लो समय नेपाली सिनेनगरी धेरै ‘चेन्ज’ देख्छिन् उनी । नेपाली सिनेमा हेर्ने दर्शक हलमा तान्न आफू जस्ता नयाँ पुस्ता आउनु पर्छ भन्ने निरिशाको बुझाइ छ । उनी दर्शकहरुले ‘जानी नजानी’को कथा र ‘सिनेम्याटोग्राफी’ धेरै मन पराउने उनको विश्वास छ ।

‘जानी नजानी दर्शकको मनमा बस्छ, नेपालको ढाका उद्योगलाई लिएर फिल्म निर्माण भएको छ, यसमा ‘स्वीट रोमान्स’ छ । रोमान्स सँगै रमाइलो छ पनि छ,’ आफ्नो पहिलो फिल्मको कथा बारे उनले केही खुलाउँदै भनिन् ।

सिनेमामा निरिशा र मनिष श्रेष्ठ सन्नी सिंह, नम्रता श्रेष्ठ, प्रकाश अधिकारीको पनि अभिनय देख्न सकिन्छ ।