कर्णाली प्रदेश अस्पतालबाट प्रसूति सेवा लिनेको संख्या बढ्दाे

A+ A A-

कर्णाली प्रदेश अस्पताल सुर्खेतबाट प्रसूति सेवा (डेलिभरी) गराउने महिलाको संख्या बढ्दै गएको पाइएको छ । अस्पतालले दिएको ४ वर्षको तथ्याङ्कअनुसार प्रसूति सेवा लिनेको संख्या वर्षेनि बढ्दै गएको छ ।

कर्णाली प्रदेश अस्पतालका अनुसार आर्थिक वर्ष २०७३/०७४ देखि हालसम्म कुल १४ हजार ३ सय २४ जना महिलाले अस्पतालबाट प्रसूति सेवा लिएका छन् ।

कुन वर्षमा कतिले लिए प्रसूति सेवा ?

आर्थिक वर्ष प्रसूति सेवा लिनेको संख्या

२०७३/०७४ ३४६६

२०७४/०७५ ३९९५

२०७५/०७६ ४४१९

२०७६/०७७ को पुस मसान्तसम्म २ हजार ४ सय ४४

चालू आर्थिक वर्षको ६ महिनाको तथ्याङ्कलाई हेर्दा बाँकी ६ महिनामा त्यो संख्या बढेर ५ हजार पुग्ने अस्पतालले दाबी गरेको छ ।

कर्णाली प्रदेश अस्पतालका निर्देशक डा. डम्बर खड्काले आव २०७३/०७४ यता ५ हजार ९ सय ५८ वटा मेजर अप्रेसन गरिएको जानकारी दिए । मेजर अप्रेसन आव २०७३/०७४ मा १३ सय १३ वटा, आव २०७४/०७५ मा १४ सय ७० वटा, २०७५/०७६ मा २ हजार ९३ वटा र चालू आवको पुस मसान्तसम्म १ हजार ८२ वटा मेजर अप्रेसन गरिएको छ ।

साढे ३ वर्षको अवधिमा इमर्जेन्सी र ओपीडीतर्फ गरेर २ लाख ४८ हजार १ सय ४४ बिरामीले सेवा लिएको उनको भनाइ छ । जसमा इमर्जेन्सीतर्फ २८ हजार ३ सय ८२ जना र ओपीडीतर्फ २ लाख १९ हजार ७ सय ६२ जना सेवाग्राही रहेका छन् । यस्तै, साढे ३ वर्षको अवधिमा ७ लाख ९८ हजार ५ सय ५३ बिरामीले ल्याव सेवा लिएका उनको भनाइ छ ।

यस्तै, अस्पतालले गएको आव २०७५/०७६ बाट सुरु गरेको सिटी स्क्यान सेवाबाट गत आवमा ६ सय ५४ र चालू आवको ६ महिनामा ७ सय ७८ गरेर १४ सय ३२ जना बिरामीले सेवा लिएको निर्देशक डा.खड्काको भनाइ छ ।

प्रदेश राजधानी तथा प्रदेश सरकारमातहतमा आएपछि गतआव २०७५/०७६ यता अस्पतालको आम्दानी भारी मात्रामा वृद्धि हुँदै गएको उनको भनाइ छ । सो आवमा कुल आय १६ करोड १२ लाख ६५ हजार ३३ रुपैयाँ ५० पैसा भएको छ भने त्यसबाट ५ करोड ८२ लाख ४९ हजार १ सय २३ रुपैयाँ ७५ पैसा खर्च भएर १० करोड ३० लाख १५ हजार ९ सय ९ रुपैयाँ ७० पैसा बचत भएको निर्देशक खड्काले बताए ।

नेपाल सरकारका स्वास्थ्य तथा जनसंख्या राज्यमन्त्री नवराज रावतले विगतको तुलनामा अस्पताल सुधार हुँदै गएकाले देशकै उत्कृष्ट अस्पतालको रूपमा विकास गर्नुपर्ने बताए । अस्पताल सञ्चालन गर्दै गर्दा आउने नीतिगत समस्याहरू समाधानका लागि आफू तयार भएको भन्दै उनले अस्पताललाई चाहिने आवश्यक सामग्री किन्न सहयोग गर्ने प्रतिवद्धता व्यक्त गरे ।

कार्यक्रममा कर्णाली प्रदेशका सामाजिक विकासमन्त्री दल रावलले कर्णालीको स्वास्थ्यलाई प्रदेश र केन्द्र सरकारले प्राथमिकतामा राखेकाले प्रदेश अस्पताल प्रदेशकै गौरव अस्पतालको रूपमा विकास हुने बताए । कर्णाली काम गर्न आउने कर्मचारीलाई कुुनै पनि विभेद नहुने भन्दै उनले दुर्गम ठाउँका लागि प्रोत्साहन भत्ता उपलब्ध गराउनेसमेत बताए ।

प्रदेश अस्पताललाई २०७७ वैशाखबाट नयाँ भवनबाट विशेषज्ञ सेवासहितको प्रदेश अस्पतालको रूपमा सञ्चालनमा ल्याउने अस्पतालका अध्यक्ष श्याम कँडेलले जानकारी दिए । साथै, उनले संघीय सरकारको सबै प्रदेशमा मेडिकल कलेज बनाउने योजनाअनुसार प्रदेश अस्पताललाई शिक्षण अस्पतालको रूपमा विकास गरिने बताए ।

२०१९ सालमा सुर्खेतको पुरानो सदरमुकाम गोठिकाँडामा स्वास्थ्य केन्द्रको रूपमा स्थापना भएको उक्त अस्पताल २०२४ सालमा उपत्यकामा स्थानन्तरणहुँदै २०६२ साल फागुन ७ गतेबाट ५० शय्याको मध्यपश्चिमाञ्चल क्षेत्रीय अस्पतालको रूपमा स्तरोन्नति भएको थियो । यो अस्पताल २०७५ कात्तिकमा प्रदेश सरकारमातहतमा आएर प्रदेश अस्पतालको रूपमा विकास भएको हो ।

प्रकाशित मिति: बिहीबार, फागुन ८, २०७६ १५:२५