शिवरात्रिका लागि झकिझकाउ हुँदै सिद्धबाबा

A+ A A-

शिवरात्रिलाई लक्षित गर्दै धार्मिक एवम् पर्यटकीय दृष्टिले महत्त्वपूर्ण गन्तव्य मानिएको तिनाउ गाउँपालिका– ३ स्थित उपल्लो सिद्धबाबा झकिझकाउ भएको छ ।

महाशिवरात्रिको अवसरमा आउने भक्तजनहरूलाई लक्षित गरेर व्यवस्थाकीय तयारीको काम भइरहेको छ भने मन्दिरलाई आकर्षित बनाउन रङरोगनको काम पनि पूरा भएको छ ।

महाशिवरात्रि पर्व ९ फागुनमा मनाइँदै छ । महाशिवरात्रिको अवसरमा मन्दिरको सरसफाइ, रङरोगन, यातायात, पार्किङस्थललगायतका आवश्यक तयारी पूरा गरिएको प्रचार प्रसार समिति संयोजक तोया लम्सालले जानकारी दिए ।

यस वर्षको महाशिवरात्रिको अवसरमा मन्दिरमा २००६ सालमा भक्तजनबाट चढाइएको घण्ट प्रदर्शन गरिने, अखण्ड भजनकीर्तन, १ सय ८ पीपल र शिवलिङ्ग र गौशाला निर्माणको काम सम्पन्न भइसकेको मन्दिर व्यवस्थापन समितिका अध्यक्ष दलबहादुर गुरुङ जानकारी दिए ।

शिवरात्रिको अवसरमा बुटवलबाट ५ वटा बसहरू सञ्चालन हुने बताइएको छ । बिहानै ३ बजेदेखि भक्तजनको भीड बढ्ने भएकाले उक्त भीडलाई मध्यनजर गर्दै २ वटा लाइन बनाएर मन्दिरको दर्शन छिटो गर्ने गरी व्यवस्था मिलाइएको उनले बताए ।

शिवरात्रिलाई व्यवस्थापन गर्न भन्दै अध्यक्ष गुरुङको संयोजकत्वमा १६ वटा उपसमिति निर्माण पनि गरिएको छ ।

गत वर्ष महाशिवरात्रिको अवसरमा २५ हजार दर्शनार्थीले मन्दिरको दर्शन गरेकामा यस वर्ष ५० हजारभन्दा बढीले मन्दिरको दर्शन गर्ने अपेक्षा समितिले गरेको छ । महाशिवरात्रिकै अवसरमा बुटवलका पङ्कज कोदार नेतृत्वको टोलीले मन्दिरमा ५ लाख रुपैयाँभन्दा बढीको रङरोगनको कामसमेत गरेका छन् भने तिनाउका टिपर व्यवसायीहरूले १ सय टिपर मिस्कट निःशुल्क उपलब्ध गराएर बाटो मर्मतको समेत काम गरिसकेका छन् । मन्दिरमा १० वटा साना मन्दिरहरू रहेका छन् ।

रामापिथेकससँग जोडिएको सिद्धबाबा

धार्मिक एवम् पर्यटकीय क्षेत्र सिद्धबाबा रामापिथेकससँग जोडिएको छ । १ करोड १० लाख वर्ष पुरानो रामापिथेकसको बङ्गाराको जीवाश्म भेट्टाएको नजिकै सिद्धबाबा मन्दिर रहेको छ ।

विक्रमको सातौँ शताब्दीमा राजकाजबाट बैराग्य जागेपछि उज्जैनका सम्राट भर्तृहरि गोरखपुर आई गुरु गोरखनाथसँग दीक्षित भई हिमाल र तराई देखिने तिलोत्तमा नदीको किनारस्थित कुइरेभिरमा कठोर तपस्या गरी सिद्ध भएकाले सिद्धबाबा भनिएको बताइन्छ ।

२०२८–२०२९ सालतिर राजमार्ग बन्ने क्रममा बाटोसँगै ससाना मन्दिरहरू स्थापना गरेर पूजा गर्ने परम्पराको सुरुवात गरिएको र तत्कालीन पुरोहितले पूजापाठ गरेर दानबाट मन्दिरको संरक्षण गर्दै आइएको बताइन्छ ।

तर, २०५५ सालमा मानबहादुर श्रेष्ठको नेतृत्वमा मन्दिर विकास समिति बनेपछि विधान तयार गरी जिल्ला प्रशासन कार्यालय पाल्पाबाट वैधानिक तरिकाले मन्दिर सञ्चालन गरिएको हो ।

मन्दिरको निःशुल्क बस

बुटवलबाट ३ किलोमिटरको दूरीमा रहेको सिद्धबाबा पुग्नलाई मन्दिर व्यवस्थापन समितिले निःशुल्क बस सञ्चालनमा ल्याएको छ । १ वर्षअघि सञ्चालनमा ल्याइएको उक्त बस तिलोत्तमा नगरपालिकास्थित ड्राइभरटोलबाट निःशुल्क छुट्ने गर्छ ।

सिद्धबाबा मन्दिर व्यवस्थापन समितिका अध्यक्ष दलबहादुर गुरुङले भक्तजनलाई सहज होस् भनी २६ लाख ९० हजार रुपैयाँको लागतमा बस खरिद गरिएको बताए । मन्दिरमा वार्षिक २ लाखभन्दा बढी भक्तजनले दर्शन गर्ने गरेको उनी बताउँछन् ।

प्रकाशित मिति: बिहीबार, फागुन ८, २०७६ १३:१६