कांग्रेसमा फोरम लोकतान्त्रिकबाट २४ जिल्लामा समायोजन

A+ A A-

नेपाली कांग्रेससँग एकीकरण घोषणा भएको २ वर्ष ४ महिनापछि विजयकुमार गच्छदार नेतृत्वको नेपाल लोकतान्त्रिक फोरमले पार्टी सङ्गठनमा सहमतिबमोजिम २४ जिल्लामा भागबण्डा पाएको छ ।

२९ असोज २०७४ मा भएको सहमतिअनुसार तत्कालीन लोकतान्त्रिक फोरमले मंगलबार कांग्रेसका विभिन्न सङ्गठनात्मक तहमा पाएको भागबण्डाबमोजिमका पदाधिकारी तथा सदस्यको नामावली बुझाएसँगै एकीकरण भएको हो ।

पार्टी केन्द्रीय कार्यालय सानेपामा गच्छदार समूहले महासमिति सदस्य २ सय, पर्यवेक्षक १ सय ४८, महाधिवेशन प्रतिनिधि ६ सय, २४ जिल्ला जिल्ला कार्यसमिति पदाधिकारी र सदस्य तथा ४६ वटा प्रतिनिधिसभा क्षेत्रीय कार्यसमिति पदाधिकारी र सदस्यको नामावली बुझाएको हो ।

समायोजनमा परेका पदाधिकारी तथा सदस्यको नामावली मंगलबार नै सम्बन्धित जिल्लामा पठाइएको पार्टी केन्द्रीय कार्यालयका मुख्यसचिव कृष्णप्रसाद पौडेलले जनाए ।

कांग्रेसले २० कात्तिक २०७५ मा उपसभापति विमलेन्द्र निधिको संयोजकत्वमा गठन गरेको समायोजन समितिले समायोजनको मोडालिटी र संख्या निर्धारण गरेको थियो ।

समितिले तत्कालीन लोकतान्त्रिक फोरमलाई केन्द्रीय कार्यसमितिमा उपसभापतिसहित ११ केन्द्रीय सदस्य दिने सहमति थियो । तर, गच्छदारले अझै पनि ११ जनाको नाम बुझाएका छैनन् ।

सहमतिअनुसार तत्कालीन फोरम लोकतान्त्रिकले मोरङ जिल्लामा उपसभापति र सहसचिवसहित १७ जनाको नाम बुझाइएको छ । मोरङमा उपसभापति भक्तिनाथ माझी र सहसचिवमा प्रदीपकुमार विश्वासको नाम सिफारिस गरिएको छ ।

गच्छदारको गृह जिल्ला सुनसरीमा हरिलाल मेहता उपसभापति र देवनारायण मेहता सहसचिवसहित १३ जना र कैलालीमा वीरुप्रसाद चौधरी उपसभापति र कलेशुराम चौधरी सहसचिवसहित १३ जनाको नाम सिफारिस गरिएको छ ।

त्यस्तै, बर्दियामा गोविन्दप्रसाद थारू उपसभापति र महादेव चौधरी सहसचिवसहित ७ जना, सप्तरीमा प्रभुनारायण चौधरी उपसभापति र दीपक गुप्ता सहसचिवसहित ७ जना, सर्लाहीमा रामवली राय उपसभापतिसहित ८ जनाको नाम बुझाइको छ ।

दाङमा हीरालाल चौधरी उपसभापतिसहित ८ जना, पर्सामा राजकुमार गुप्ता उपसभापतिसहित ८ जना, काभ्रेमा गोविन्दबहादुर थापासहित ८ जना, झापामा देवीप्रसाद राजवंशी उपसभापतिसहित ६ जनाको नाम बुझाइएको छ ।

रूपन्देहीमा सरिताकुमारी चौधरी उपसभापतिसहित ६ जना, बारामा अमिरीलाल पाल राउत उपसभापतिसहित ४ जना, बाँकेमा फुलाराम थारू उपसभापतिसहित ४ जनालाई जिल्ला कार्यसमितिमा राख्न सिफारिस गरिएको छ ।

ओखलढुंगामा शिवकुमार खड्का सहसचिवसहित ४ जना, सिरहामा बेचन महतो सहसचिवसहित ४ जना, धनुषामा नरेश यादव सहसचिवसहित ४ जना, रौतहटमा मनोज शर्मा सहसचिवसहित ४ जना, चितवनमा राजन कार्कीसहित ४ जना, कपिलवस्तुमा रामसमुज चौधरी सहसचिवसहित ४ जनाको नाम सिफारिस गरिएको छ ।

कञ्चनपुरमा पुस्कल चौधरी सहसचिवसहित ४ जना, उदयपुरमा विजयकुमार सिंह सहसचिवसहित ४ जना र महोत्तरीमा ललन सिंह सहसचिवसहित ३ जना जिल्ला कार्यसमितिमा राख्न सिफारिस गरिएको छ । काठमाडौं र पश्चिम नवलपरासीको हकमा आवश्यक परामर्श गरी निर्णय लिने सहमति बनेको थियो ।

प्रकाशित मिति: बुधबार, फागुन ७, २०७६ १९:०९