पढ्दै कृषि पेसामा रमाएका श्याम पाल

A+ A A-

रुपन्देही जिल्लाको शुद्धोधन गाउँपालिका–७, सिसवाका श्याम पाल सानैदेखि कृषि पेसामा आकर्षित थिए । पढ्ने बेलामा पनि कृषि कर्ममा ध्यान दिएका पाल अहिले कलेज पढ्दै पनि र कृषि पेसा पनि गर्दै आफ्नाे पढाइ खर्चका अलावा घर चलाउने खर्चसमेत कमाउन थालेका छन् । १२ कक्षामा पढ्दै गरेका पालले अहिले कृषि पेसाबाट वार्षिक झण्डै १० लाख रुपैयाँ आम्दानी गर्न थालेका छन् ।

कक्षा १२ मा पढ्दै गरेका पालले कृषिलाई मुख्य पेसा बनाएका छन् । बिहान कलेज जाने र दिउँसो कृषि फर्ममा रमाउने पालले अहिले बारीमा लटरम्म टमाटर फलाएका छन् । फार्मविना नै कृषि कर्ममा लागेका पाल अहिले १२ कक्षामा पढ्दै छन् । कृषि पेसामै रहेका आफ्ना ठूलो बुबालाई सघाउँदै पाल करिब १० वर्षको उमेरदेखि व्यावसायिक कृषिमा लागेको बताउँछन् ।

विद्या मन्दिर कलेजमा पढ्दै गरेका उनले आफ्नै एक विगाह खेतमा कृषि उत्पादन गर्दै आएका छन् । १० कट्ठामा टमाटर, ५ कट्ठामा केरा र ५ कट्ठामा बन्दाको खेती गरेका छन् ।

१८ वर्षीय युवा कृषक पाल आफ्नो पेसाप्रति खुसी भए पनि यो वर्षको खेतीबाट सोचेजस्तो आम्दानी नभएकोमा भने दुःखी छन् । बेमौसमी पानीका कारण रोग लागेपछि १० कट्ठा जमिनमा लगाएको टमाटर कुहिएकाले सोचेजस्तो आम्दानी हुन सकेन ।

केरा र बन्दाबाट केही आम्दानी भए पनि बेमौसमी पानीले टमाटरमा लगाएको लगानी फर्काउन समस्या परेको बताउँछन् कृषक पाल । आफ्ना ठूलोबुबासँग कृषि पेसामा लागेको पाल परिवारको मुख्य आयस्रोत नै कृषि हो ।

सरकारी निकायबाट गाउँमा आएको कृषि कार्यक्रमबाट वञ्चित भए पनि कृषिबाट आम्दानी गर्न सकिन्छ भन्नेमा पाल परिवार ढुक्क छ । सरकारले कृषकहरूलाई अनुदान, सस्तो ब्याजमा ऋण र बिउमल दिन्छ भन्ने सुनिए पनि अहिलेसम्म कुनै अनुदान लिएको छैन कृषक पाल परिवारले ।

गाउँमा आएको कृषि कार्यक्रमबाट कुनै सहयोग लिन नसकिएको र नेताहरूका आफ्ना मान्छेलाई मात्र सहयोग मिलेको उनको भनाइ छ । दुःख गरेर उत्पादन गरिएको टमाटर र विभिन्न प्रकारका तरकारीको बजार मूल्य पाउन नसकेकोमा भने उनी गुनासो गर्छन् । भन्छन्, ‘कृषकबाट सस्तोमा लिएर उपभोक्तालाई महँगो मूल्यमा बिक्री गर्ने बिचौलियाहरूको हालीमुहाली अझै कायमै छ ।’

प्रकाशित मिति: बुधबार, फागुन ७, २०७६ १६:२५