फोन नम्बर मागे १ लाख २५ हजार, युवती जिस्क्याए १ लाख १० हजार जरिमाना

A+ A A-

पूर्वी लमजुङको दोर्दी गाउँपालिका पुग्नुभयो भने वडा नम्बर ६ र ७ मा तपाईं सतर्क हुनुपर्नेछ । किनकि वडाका स्थानीय चेलीबेटी जिस्क्याए मात्र तपाईंले महँगो मूल्य चुकाउनुपर्नेछ ।

यो स्थानीय तहको कुनै नियम भने होइन । यो त गाउँलेले आफ्ना चेलीबेटीको सुरक्षाका लागि बनाएको कडा नियम मात्र हो । गाउँमा बस्ने कचहरी यति प्रभावशाली छ कि यस कचहरीले गल्ती गर्ने व्यक्तिका लागि तोकेको जरिमाना नतिरी सुखै छैन ।

कस्तो हो नियम ?

वडामा केही घटना भयो भने कचहरी बस्ने चलन छ । केही समस्या परेको खण्डमा गाँउहरूले कचहरी राखेर मुद्दा मिलाउँछन् । यी वडामा बाहिरबाट काम विशेषले अथवा पाहुना गएका कसैले गाउँका छोरीचेली जिस्क्यायो भने महँगो आर्थिक जरिमाना तिर्नुपर्ने गाउँहरूको नियम छ ।

यस्ता छन् कारबाही

दोर्दीका वडा नम्बर ६ र ७ का छोरीचेली जिस्क्याएबापत सरकारी जागिरदेखि प्राइभेट कम्पनीका कर्मचारीले महँगो आर्थिक जरिमाना तिरेको विगत छ ।

केहीअघि स्थानीय ब्यारेकका एक जना सिपाहीँले केटी जिस्काएबापत आर्थिक जरिमाना तिरेका छन् । उनी मात्र होइन, स्थानीय दोर्दी जलविद्युत् आयोजनामा काम गर्ने एक इज्जिनियर पनि सो गाउँको कचहरीको फेला परे ।

यस्ता छन् घटना

गाउँमा राम्री युवती देखेर आयोजनामा काम गर्ने ती इज्जिनियरले फोन नम्बर लेखेर घरको झ्यालबाट एउटा सानो कागजको टुक्रो फालिदिएछन् ।

युवती फोन नम्बरसहितको चिट बोकेर कचहरीमा पुगिन् । कागजको चिट झ्यालबाट फालेबापत कचहरीले इन्जिनियरलाई १ लाख २५ हजार रुपैयाँ जरिमाना तिरायो ।

स्थानीयले जरिमाना तिराएपछि ती इन्जिनियर काम नै छोडेर भागेको आयोजनामा कार्यरत एक श्रमिक बताउँछन् ।

दोर्दी गाउँपालिका वडा नम्बर ७ मा आर्मीको एउटा गण छ । त्यहाँ कार्यरत दुई जना जवानले गोठमा गएर एउटी युवती जिस्क्याए । जिस्क्याएको भन्दै कचहरीले उनीहरूलाई १ लाख १० हजार जरिमाना तिरायो ।

जरिमानाको शृङ्खला यतिमै सीमित छैन ।

स्थानीयका अनुसार जलविद्युत् आयोजनामा काम गर्न गएका एक जना श्रमिकले एक जना युवतीलाई आँखा झिम्क्याएछन् ।

आँखा झिक्याएबापत ती श्रमिकले युवतीलाई २ हजार ५ सय रुपैयाँ आर्थिक जरिमाना तिराए । ती कामदार पनि त्यसपछि त्यो गाउँ नै छोडेर भागे ।

यसरी तिराइन्छ जरिमाना

दोर्दी गाउँपालिकाका नम्बर ६ र ७ मा ढोडेनी तथा फलेनी गाउँ छन् । यी गाउँमा गुरुङ र घले समुदायको बसोबास छ । यहाँ विगतदेखि नै गाँउमा झैझगडा भयो भने कचहरी बसेर मिलाउने परम्परा रहेको एक स्थानियवासी बताउँछन् । विगतमा मुखिया अथवा मान्यजनले गाउँमा भएका समस्या मिलाउने गरेको ती स्थानीयवासीले बताए ।

गाउँमा धेरै छोरीचेली जिस्क्याउने क्रम बढेपछि एक जना भारतीय पूर्वलाहुरेले आर्थिक जरिमाना तिराउने नियम सुरू गरेका थिए । यो क्रम हाल बढेको स्थानीयवासी बताउँछन् ।

‘यो क्रम पछिल्लो समय बढ्दै गएको छ,’ स्थानीय एक जनप्रतिनिधि भन्छन्, ‘दोर्दी गाँउपालिकाका वडा नम्बर ६ र ७ का ढोडेनी तथा फलेनी गाउँमा अभद्र व्यवहार गर्नेलाई आर्थिक जरिमाना तिराउँदै पीडितलाई नै त्यो पैसा भराउने नियम छ ।’

‘यहाँका स्थानीय युवतीलाई झुक्किएर पनि नजिस्काउनु महँगो छ जरिमाना,’ स्थानीय एक जनप्रतिनिधि भन्छन्, ‘युवतीलाई आँखा झिम्काएको २ हजारदेखि ४ हजार रुपैयाँसम्म जरिमाना हुन्छ, कतिपय त जरिमाना तिरेर भागेका पनि छन् ।’

यसरी आर्थिक जरिमाना गराउँदा समाजमा विकृति रोकिने गाउँलेको बुझाइ छ । बाहिरबाट आएका पनि केटी जिस्काउँदा जरिमाना तिर्नुपर्छ भन्ने डरले सचेत हुने गरेको ती जनप्रतिनिधि बताउँछन् ।

सुन्नुहाेस अडियाे