माथिल्लो दोर्दी ‘ए’ जलविद्युत वैशाखभित्रै राष्ट्रिय प्रसारण लाइनमा

A+ A A-

लमजुङमा निर्माणाधीन २५ मेगावाट क्षमताको माथिल्लो दोर्दी ‘ए’ जलविद्युत आयोजनाको काम अन्तिम चरणमा पुगेको छ । सो आयोजनाको विद्युत उत्पादन गरी वैशाख पहिलो साता राष्ट्रिय प्रशारणमा जोड्ने तयारी भइरहेको लिबर्टी इनर्जी कम्पनी लिमिटेडले जानकारी दिएको छ ।

लमजुङको दोर्दी गाउँपालिका–६ र ७ स्थित ढोडेनी तथा फलेनीमा निर्माणाधीन आयोजनाको हालसम्म ९६ प्रतिशत निर्माण कार्य सम्पन्न लिबर्टीका प्रोजेक्ट म्यानेजर सुरेज जोशीले जानकारी दिए ।

विद्युत उत्पादका लागि आवश्यक सबै काम चैत मसान्तभित्र सम्पन्न हुने र नेपाल विद्युत प्राधिकरणले समयमै सबस्टेशन निर्माण सम्पन्न गरे बैशाखमा राष्ट्रिय प्रशारण लाइनमा २५ मेगावाट विजुली थपिने लिबर्टी ईनर्जी कम्पनीका सञ्चालक राम पाण्डेले बताए ।

नेपालीले विद्युत उत्पादनका लागि लगागी गरेको पहिलो आयोजना पनि दोर्दी ‘ए’ जलविद्युत भएको कम्पनीका सञ्चालक पाण्डेले जानकारी दिए ।

‘दोर्दी ‘ए’ जलविद्युत आयोजना निर्माणकार्य ९४ प्रतिशत सम्पन्न भएको छ । हेडरेस टनेल, संरचना निर्मार्ण र सर्ज सफ्ट निर्माणको काम पनि अन्तिम चरणमा पुगेको छ, उनले भने, ‘अहिले कन्ट्रक्सन पावर, प्रवेश मार्ग, कम्पनीको आवास तथा अफिस गृहलगायतका आधारभूत संरचनालगायतका काम शतप्रतिशत सम्पन्न भइसकेका छन्,’ सञ्चालक पाण्डेले भने, ‘नहर, पेनस्टक पाइपको लागि सिभिल निर्माण, स्वीचयार्ड संरचना निर्माणको कार्यपनि धमाधम भइरहेको छ । समयभित्र प्राधिकरणले आफ्नो तर्फबाट गर्नुपर्ने काम सम्पन्न हुने कुरामा कम्पनी विश्वास्त छ ।’

दोर्दी ‘ए’ जलविद्युत आयोजनाले सेयरको ८.२० प्रतिशत साधारण लगानी फिर्ता हुने अपेक्षा लिएको छ । आयोजनाबाट वार्षिक १४ करोडभन्दा केही धेरै युनिट बिजुली उत्पादन हुने कम्पनीले जनाएको छ ।

बिजुली उत्पादन भएपछि प्रभावित स्थानीय बासिन्दालाई १० र सर्वसाधारणलाई १५ गरी २५ प्रतिशत सेयर निष्कासन गर्ने कम्पनीले जनाएको छ । कम्पनीले नेपाल धितोपत्र बोर्डमा आवेदन पनि दिइसकेको समेत जानकारी दिएको छ ।

रन अफ द रिभरमा आधारित उक्त आयोजनाले १५ बैशाख २०७१ मा विद्युत उत्पादन अनुमति पाएको थियो । ४ अर्ब ६३ करोड ६० लाख ९५ हजार ९ सय २१ रुपैयाँ कूल लागत रहेको आयोजनाको प्रतिमेगावाट लागत १८.५४ करोड रुपैयाँ रहेको जनाइएको छ ।

दोर्दी ‘ए’ जलविद्युत आयोजना नेपाली लगानीको पहिलो जलविद्युत आयोजना समेत रहेको कम्पनीको दावी छ । नेपालीहरुको आपनो लगानीमा पहिलो पटक विद्युत उत्पादन भएर राष्ट्रिय प्रशारणमा जोडिने सञ्चालक पाण्डेको भनाइ छ ।

प्रकाशित मिति: मंगलबार, फागुन ६, २०७६ ०९:५०