अनि हात हल्लाउँदै मुस्कुराए महरा..

A+ A A-

कटराइजको कालो पाइन्ट । सेतो सटमा चेक कोट । शिरमा पाल्पाली ढाका टोपी । गलाभरी हजारी फूलको माला र खादा । अनुहारमा खुसीको चमक ।

यो वर्णन पूर्वसभामुख कृष्णबहादुर महराको हो ।

जब उनी जिल्ला अदालत काठमाडौंका न्यायाधीश अम्बर पौडेलको इजलासले निर्दोष ठहर गर्दै सोमबार डिल्लीबजार कारागारबाट जेलमुक्त हुँदै थिए ।

कारागारबाट उनी रातो रङको बा१८च ४०० नम्बरको हुण्डाईको निजी कारमा हात हल्लाउँदै बाहिरिएका थिए । उनको स्वगतका लागि कारागारको मूल गेटसम्मै नेकपाका कार्यकर्ता लामबद्ध थिए ।

भीड नियन्त्रण गर्न प्रहरीलाई हम्मेहम्मे नै परेको थियो । महराको स्वागतका लागि नेकपाका नेता हिमाल शर्मा अग्रपङ्क्तिमा थिए ।महरा १ सय ३ दिन डिल्लीबजार सदरखोरमा बसेर सोमबार घर फर्किएका हुन् । महरा जेलमुक्त हुँदा आफूमाथि लागेको आरोपको विषयमा भने केही प्रतिक्रिया दिएनन् । तर, कारागार प्रशासनलाई भने धन्यवाद भने ।

‘१ सय ३ दिन भएछ, घर जस्तो लाग्यो । म आएदेखि नै डायरीमा लेख्ने गर्थें । कारागार प्रशासनको व्यवहार र अन्य कैदीलाई पनि धन्यवाद’, महराले भने ।

उनीमाथि संसद सचिवालयकी महिला कर्मचारी रोशनी शाहीमाथि यौन दुर्व्यवहारको आरोप लागेको थियो । सोही आरोपमा उनी पुर्पक्षका लागि जेल चलान भएका थिए ।

आइतबार नै सकिएको उनको बहसको सोमबार मात्रै सुनुवाइ भएको हो । उसो त आइतबार जेलमुक्त हुने आसमा थिए तर अन्तिम समयमा सुनुवाइ नसकिएपछि उनको मुद्दाको सुुनुवाइ सोमबार मात्र भएको हो ।

महरा सोमबार बिहान साढे १० बजे नै अदालत पुगेका थिए । उनलाई अदालतबाट भने प्रहरीले बा२झ ३९७८ नम्बरको जाली भएको भ्यानमा राखेर अदालत पुर्‍याएको थियो ।

कैदीले गरे बिदाई

महरालाई डिल्लीबजार कारागारका कैदी बन्दीले सामूहिक बिदाई गरेका थिए । उनीसँगै कारागारको ‘क’ ब्लकमा बस्दै आएका पूर्व प्रहरी महानिरीक्षक (आईजीपी) रमेश चन्द ठकुरी र सशस्त्र प्रहरी बलका पूर्व प्रहरी नायव महानिरीक्षक (डीआईजी) रञ्जन कोइरालाले फूलको माला र खादा लगाएर बिदाई गरेका थिए ।

त्यसरी नै ‘ख’ ब्लकमा रहेका सांसद रेशम चौधरीले पनि उनलाई त्यसैगरी खादा र माला लगाएर बिदाई गरेका थिए ।

प्रचण्ड र नेपालको फोन

जिल्ला अदालतले महरालाई छाड्ने आदेश गरेलगत्तै सुरुमा उनलाई नेकपाका अध्यक्ष पुष्कमल दाहाल ‘प्रचण्ड’ र अर्का नेता माधवकुमार नेपाललले फोन गरेका थिए ।

उनीहरू दुवै जनाले सुरुमै बधाई मात्र दिए, बाँकी कुरा केही पनि बोलेनन् । महराले उत्तरमा धन्यवाद भन्दै ‘आज त भ्याइँदैन होला, एक–दुई दिनमै भेट्न आउँछु’ भने ।

महरा जेल हुँदा भने उनीहरू कोही पनि कारागार भेट्न पुगेका थिएनन् । केही दिनअघि बाबुराम भट्टराई र मोहन वैद्य भने कारागार नै पुगेर महरालाई भेटेका थिए ।

प्रकाशित मिति: सोमबार, फागुन ५, २०७६ १८:३७