कोरोनाको असर निर्माणाधीन गौतमबुद्ध अन्तर्राष्ट्रिय विमानस्थलमा पनि

A+ A A-

कोरोना भाइरसको प्रभाव रुपन्देहीको भैरहवामा निर्माणधीन गौतमबुद्ध अन्तर्राष्ट्रिय विमानस्थलमा पनि परेको छ । निर्माणको अन्तिम चरणमा पुगेको यो विमानस्थलमा चिनियाँ प्राविधिक र उपकरण कोरोना भाइरसका कारण नेपाल आउन नसकेकाले निर्माण कार्यमा असर परेको हो ।

विमानस्थलका आयोजना प्रमुख प्रवेश अधिकारीले चिनियाँ निर्माण कम्पनीले काम गरिरहेको र चीनबाटै उपकरण आउनुपर्नेमा कोरोनाका कारण उपकरण पनि आउन नसक्दा विमानस्थल निर्माणमा समस्या भएको बताए ।

उनले भने, ‘मुख्य संरचनाको काम सकिएको अवस्था हो, टर्निमलभित्र फिनिसिङ र धावन मार्गमा लाइट जडानको काम बाँकी छ । चीनबाट आयात गर्नुपर्ने लाइट र टर्मिनलभित्रका सामान रोकिँदा समस्या भएको हो ।’

राष्ट्रिय गौरवको आयोजना गौतमबुद्ध अन्तर्राष्ट्रिय विमानस्थलमा चिनियाँ निर्माण कम्पनी नर्थ वेस्ट सिभिल एभिएसनले निर्माणको काम गरिरहेको छ । पछिल्लो समय विमानस्थलमा चिनियाँ प्राविधिक र उपकरण कोरोना भाइरसको महामारीका कारण चीनमै रोकिएका छन् ।

अहिले १ सय ८५ जना कामदारले निर्माणको काम गरिरहेका छन् । आयोजनाका अनुसार ४० जनाको चिनियाँ कामदार टोली अहिले फिल्डमा हुनुपर्नेमा २० जना मात्र छन् । अहिले उपकरणसम्बन्धी वायरिङको काम गर्ने कामदार मात्र छन, एयर कन्डिसन र रनवे–लाइटसम्बन्धी प्राविधिकसहित २० जनाको टोली चीनमै रोकिएर बसेको छ ।

आयोजनाका अनुसार धावनमार्गका केही लाइट र ब्यागेज ह्यान्डलिङ सिस्टमका उपकरणहरू चीनमा ‘प्याक’ गरेर राखिएको छ तर कोरोनाले डिस्प्याच हुन सकेको छैन । यदि मार्च १५ भित्र कामदार र उपकरण आएनन् भने यसको प्रत्यक्ष असर विमानस्थल सञ्चालनमा पर्नेछ ।

३१ डिसेम्बर २०१४ देखि काम सुरु भएको यो आयोजनाको हालसम्म ८६ प्रतिशतभन्दा बढी भौतिक प्रगति भएको छ । ६ अर्ब ८२ करोडको लगानीमा सम्पन्न हुन लागेको आईसीबी–१ स्तरको सो विमानस्थल आयोजनामा एडीबीको ४०.५ प्रतिशत ऋण तथा १८ प्रतिशत अनुदान, ओपेक फन्ड फर इन्टरनेसनल डेभलपमेन्ट्सको ३०.५ प्रतिशत ऋण र नेपाल नागरिक उड्डयन प्राधिकरणको ११ प्रतिशत लगानी छ । त्यस्तै, आईसीबी–२ अन्तर्गत विमानस्थलमा जडान हुने उपकरणहरूका लागि पनि करिब ५० करोड लगानी छ ।

प्रकाशित मिति: आइतबार, फागुन ४, २०७६ १९:१२