विकास र समृद्धिप्रतिको जनचाहना प्रदेश सरकारले पूरा गर्नुपर्छ: प्रदेश प्रमुख

विकास र समृद्धिप्रतिको जनचाहना प्रदेश सरकारले पूरा गर्नुपर्छ: प्रदेश प्रमुख

A+ A A-

गण्डकी प्रदेश प्रमुख अमिक शेरचनले विकास र समृद्धिप्रतिको जनचाहनालाई पूरा गर्दै अगाडि बढ्न प्रदेश सरकारलाई आग्रह गरेका छन्। प्रदेश सरकार स्थापनाको दोस्रो वार्षिकोत्सव समारोहमा बोल्दै उनले संघीयता निर्माणसँगै जनअपेक्षा धेरै भएको र सो अपेक्षाअनुसारका पूर्वाधार निर्माण र सुशासनमा ध्यान दिन प्रदेश सरकारलाई आग्रह गरे ।

गण्डकी प्रदेशको सुशासन र व्यवस्थापन पक्षलाई अझ राम्रो बनाउन सकिएमा विश्वसामु नमुना प्रदेशका रूपमा चिनाउन सकिने प्रदेश प्रमुख शेचरनले बताए । प्राकृतिक स्रोतसाधनको उपयोग गर्न नसक्दा प्रदेशलाई नकारात्मक असर परेको समेत उनको भनाइ थियो ।

उनले संघीयता कार्यान्वयनमा चुनौती देखा परेकाले सफल व्यवस्थापन गर्न सबै राजनीतिक दलहरूबीच राष्ट्रिय एकता आवश्यकता देखिएको उनले बताए ।

प्रदेश प्रमुख शेरचनले भने, ‘गण्डकी प्रदेश सम्भावना नै सम्भावना बोकेको खानी हो । प्राकृतिक स्रोत र साधनको अधिकतम उपयोग गरेर नमुना प्रदेश बनाउनेतर्फ सबै अग्रसर हुनुपर्छ ।’

गण्डकी प्रदेशका मुख्यमन्त्री पृथ्वीसुब्बा गुरुङले २ वर्षको अथक प्रयासले प्रदेश सरकार सही बाटोमा हिँडिरहेको दाबी गरे । प्रदेशको समग्र विकासलाई लक्षित गरी पञ्चवर्षीय योजना बनाइसकेको उनले बताए । प्रदेशमा आर्थिक अनुशासन, पारदर्शिता, सुशासन कायम गराउने कुरामा सरकार प्रतिवद्ध रहेको उनले बताए ।

प्रदेशभित्र सडक पूर्वाधार विकासका काम तीव्र रुपमा अघि बढेको उनले जिकिर थियो ।

मुुख्यमन्त्री गुरुङले भने, ‘खानेपानी र विद्युतजस्ता अत्यावश्यकीय सेवालाई घरघरमा पुर्‍याउने गरी काम अगाडि बढाइएको छ । सरकारको घोषित कार्यक्रमअन्तर्गत प्रदेशका ८५ वटै स्थानीय तहमा उद्याेग ग्राम स्थापना गर्ने योजनाअनुसार गरिएको अध्ययनमा ५१ वटा स्थानीय तहमा उद्याेग ग्रामका लागि सम्भावना देखिएको छ, आगामी ५ वर्षभित्र उद्याेग ग्राम स्थापना गरिनेछ ।’

मुुख्यमन्त्री गुरुङले अब कसैलाई दोष देखाएर आफूहरू उम्कन नमिल्ने बताउंँदै प्रदेशलाई पूर्ण रूपमा सफल बनाएरै छाडिने प्रतिबद्धता व्यक्त गरे । प्रदेश सरकार गठनको पहिलो दिनदेखि विभिन्न दुःख कस्ट खेपेको बताउँदै उनले अब भने धेरै हिसाबले प्रदेश सरकार सक्षम र आत्मनिर्भरतातर्फ उन्मुख भएको दाबी गरे ।

साझा अधिकारको सवालमा स्थानीय र संघीय सरकारको बीचमा पर्‍र्याप्त मात्रामा छलफल आवश्यक भएको बताउँदै मुख्यमन्त्री गुरुङले यसमा संघीय सरकारले समयमै कानुन बनाउनुपर्नेमा जोड दिए ।

प्रमुख प्रतिपक्ष दलका नेता कृष्णचन्द्र नेपालीले सरकारले घोषणा गरेका कार्यक्रम जनताले महसुस गर्ने गरी कार्यान्वयन गर्न आग्रह गरे । ‘सरकारले प्रत्येक वर्ष धेरै राम्रा र मीठा कार्यक्रम ल्याएको छ तर कति योजना कार्यान्वयन भए र कति हुन बाँकी छन्, मूल्याङ्कन गरियोस्,’ उनले भने, ‘हामीले आलोचना गर्नुभन्दा पनि जनताले मसुस हुने गरी प्रदेश सरकारले काम गर्नुपर्छ ।’

संघीय सरकारले केही बढी अधिकार राख्न खोजेकाले त्यसको विरुद्ध मुख्यमन्त्रीले आवाज उठाउँदा आफूहरूले समेत सहयोग गर्दै आएको नेता नेपालीले बताए ।

प्रकाशित मिति: आइतबार, फागुन ४, २०७६ १६:२७