फूलमाया

A+ A A-

आज शहरमा
हल्लीखल्ली छ चारैतिर
भेला छ, बैठक छ
तालिम छ र गोष्ठी पनि छ ।

सदियौँ पुराना अवशेषहरू मेटाउन
आत्मसम्मान र स्वाभिमानको जग बसाल्न
गाउँगाउँमा अन्तर्क्रिया छ
ठाउँठाउँमा सभा पनि छ ।

कतै बहस छ– नयाँ विचारको
कतै पैरवी छ– नयाँ व्यवहारको
कतै खबरदारी छ– आफ्नो पहिचानको
अनि फेरि
कतै हातेमालो छ– नयाँ सहकार्यको ।

आज शहरमा
जोश छ, जाँगर छ
आधा आकाश उन्मुक्तिको परिकल्पनामा छ
आधा धर्ती स्वतन्त्रताको बहारमा छ
ओहो ! अचम्मै छ !
आधा संसार समानताको अभियानमा छ ।

किन पाउँदैनौँ हामी
समान कामको समान ज्याला ?
किन भोग्नुपरिरहेको छ
हुँदै नभएका झूटा आरोपहरू ?
किन सहनुपर्छ हँ
स्वाभिमानमाथिका अपमानहरू ?
किन व्यहोर्नुपर्छ सधैँ
असङ्ख्य पीडाका घाउहरू ?

किन हाँस्नुपर्छ
अन्तरमन दुखाएर ?
किन बाँच्नुपर्छ हामीले
सिङ्गो मानिस हुनुको अस्तित्व लुकाएर ?

यिनै र यस्तैयस्तै
अनगिन्ती यक्ष प्रश्नहरूको
जवाफ खोजिरहेका छौँ हामी
खोजिरह्यौँ खोजिरह्यौँ
र, खोजिरहेका छौँ आज पनि
तर, भेटिएको छैन जवाफ
यी अनुत्तरित प्रश्नहरूको ।

यता, शहरमा हामी खोजिरहेका छौँ जवाफ
हामी खोजिरहेका छौँ अस्तित्वको पहिचान
हामी गरिरहेका छौँ
उपलब्धि र चुनौतीको समग्र लेखाजोखा ।

यतै कतै शहरमा
ज्यालामा ठगिएकै छन् फूलमतीहरू
घरमा कुटिएकै छन् फातिमाहरू
रोइरहेका छन् निर्दोष आत्माहरू
शहरका चोक, गल्ली र कोठीहरूमा निस्सासिँदै
अनमोल जीवनका एकएक पलहरू
विवशतामा गुजार्दै छन् फूलमायाहरू ।

सधैँजसो नै शहरमा
हलचल छ समानता र स्वाधीनताका लागि
बहस छ विचारको
सभा छ र भइरहेका छन् गोष्ठीहरू
रमाइलो छ
र, लाग्छ अब
छिट्टै केही हुनेवाला छ ।

तर, शहरको बीच सडकबाट
टाढाटाढा हुँदै गइरहेको
मान्छेहरूको विशाल जुलुस
निर्निमेष नियालिरहेकी छे
हातमा इँट्टाको साँचो समातेकी फूलमाया ।

र, अचम्भित छे फूलमाया
ओहो ! किन यति बिघ्न चिच्याइरहेछन् उनीहरू
केके जाति मागिरहेका छन्
बुझ्न खोजेर पनि केही बुझ्न नसकेर
अलमल्ल छे फूलमाया ।

प्रकाशित मिति: शनिबार, फागुन ३, २०७६ ०८:३५