देउवाको ४ वर्षे कार्यकाल : निर्वाचन गराउनु उपलब्धि, गुट अन्त्य गर्न नसक्नु कमजोरी

देउवाको ४ वर्षे कार्यकाल : निर्वाचन गराउनु उपलब्धि, गुट अन्त्य गर्न नसक्नु कमजोरी

A+ A A-

नेपाली कांग्रेसका नेताहरूले सभापति शेरबहादुर देउवाको ४ वर्षे कार्यकालमा सङ्गठनभित्रको गुट, उपगुटको अन्त्य गर्न नसक्नु कमजोरी भएको टिप्पणी गरेका छन् ।

नेताहरूले सभापति देउवाले संविधान कार्यान्वयनको लागि स्थानीय, प्रदेश र संघीय संसदको निर्वाचन गराउन सक्नुलाई उपलब्धी भएको दाबी गरेका छन् ।

‘मधेस आन्दोलनमा होमिएका मधेसकेन्द्रित दललाई तीनै तहको निर्वाचनमा भाग लिने वातावरण बनाएर संविधान कार्यान्वयनका निम्ति एउटा गहन जिम्मेवारी सभापति शेरबहादुर देउवा नेतृत्वको सरकारले पूरा गरेको छ’, सहमहामन्त्री डा. प्रकाशशरण महतले भने ।

देउवाको ४ वर्षे कार्यकालमा लामो समयदेखि महाधिवेशन हुन नसकेको नेपाल विद्यार्थी संघ, नेपाल महिला संघ, नेपाल तरुण दल, सांस्कृतिक संघको महाधिवेशन गर्नुलाई उपलब्धि मान्नुपर्ने डा. महतले दाबी गरे ।

नेता चन्द्र भण्डारीको विचारमा देउवाको ४ वर्षे कार्यकालमा पार्टी सङ्गठन र सरकार सभापतिले नभई गुट, उपगुट र समूहले भागबण्डाको आधारमा चलेको दाबी गरे । भने, ‘पार्टीलाई सक्षम बनाउनु र कार्यकर्तालाई समान अवसर दिनुभन्दा गुट, उपगुट र समूहलाई व्यवस्थापन गर्ने काम यस अवधिमा भयो ।’

पार्टी संस्थापन पक्षधर केन्द्रीय सदस्य मीन विश्वकर्माले जारी भएको संविधानलाई कार्यान्वय गर्न निर्धारित समयमा ३ तहकै निर्वाचन प्रतिकूलताका बीच सम्पन्न गर्न सक्नु र माओवादीलाई सरकारमा साथै लिएर मधेसकेन्द्रित दललाई चुनावमा भाग लिन बाध्य बनाउन देखाएको कुशलतालाई उपलब्धि मान्नुपर्ने दाबी गरे ।

‘सभापतिले पार्टीका देखिएको गुट, उपगुटलाई अन्त्य गर्ने चाहना राखे पनि त्यसमा चुक्नुभयो’, विश्वकर्माले भने, ‘तर, सहमतिबमोजिम पार्टी चलाउने क्षमता देखाउनुभयो ।’

सहमहामन्त्री डा. महतले पनि निर्धारित समयमा कतिपय विभागहरू गठन हुन नसक्नु, सबै असन्तुष्टलाई समेत समेटेर सहमतिको आधारमा पार्टी चलाउँछु भन्दा निर्धारित समयमा धेरै काम हुन नसकेको स्वीकार गरे ।

‘सभापतिले विधानलाई अक्षरशः पालना गर्न र कार्यान्वयन गर्ने उदारता देखाउँदा निर्णयहरू चुस्त र छिटो हुन सकेनन्’, डा. महतले भने, ‘संविधानबमोजिम पार्टीको सङ्गठनात्मक संरचनालाई समावेसी बनाउने काम भयो ।’

तर, केन्द्रीय सदस्य चन्द्र भण्डारीले भने विधानअनुसार पार्टी नचलाई गुट, उपगुटले भागबण्डा लगाएर टिकट बाँड्दा, प्रदेशको सीमाङ्कन गर्दा र समानुपातिक उम्मेदवारको नाम छनोट गर्दा पूर्वाग्रह राख्दा पार्टी सङ्गठन कमजोर भएको दाबी गरे ।

अर्का केन्द्रीय सदस्य गुरुराज घिमिरेले पनि पार्टी सङ्गठनलाई सभापतिले चलायमान, गतिशील बनाउन नसकेको तर्क गरे । ‘सबै भ्रातृ संस्थाको नियमित महधिवेशन गराउन सक्नुभएन, गुटबन्दी र भागबण्डाको अन्त्य गर्नुभन्दा त्यसमै रमाउनुभयो’, घिमिरेले भने ।

पार्टीमा झाङ्गिएको व्यक्तिवादी मानसिकताले पार्टीमा रहेका समस्या समाधान गर्न सभापति देउवाले चाहेर पनि परिणाम आउन नसकेको दाबी डा.महतको छ । उनले भने, ‘अब पार्टीलाई एक ढिक्का बनाएर १ वर्षभित्र सबै तहको अधिवेशन गरिसक्ने र सदस्यता विस्तार गर्ने अभियान सुरु भएको छ ।’

नेता चन्द्र भण्डारीले सभापति देउवा पार्टीको सभापति नभएर गुट र उपगुटको नेता भएको आरोप लगाए । भण्डारीको भनाइमा नेता घिमिरे पनि सहमत छन् । उनले भने, ‘पार्टीमा बढ्दै गएको गुटबन्दी र भागबण्डाको अन्त्य गर्न सभापति देउवा असफल हुनुभयो ।’

घिमिरेले योग्यता, क्षमता, योगदानको आधारमा पार्टीले नेता र कार्यकर्तालाई जिम्मेवारी नदिएर असमान व्यवहार पार्टी नेतृत्वले देखाएको आरोप लगाए ।

नेता विश्वकर्मा सभापति देउवाको ४ वर्षे कार्यकालमा पार्टीभित्र चर्को विग्रह र चुनौती भए पनि धैर्यपूर्वक पार लगाउनुलाई सफलता भएको दाबी गर्छन् ।

‘पार्टीभित्र समीक्षा, संवाद र सहमतिबाट अघि बढ्ने कार्यशैलीले परिणाम नदेखिएको हो’, उनले भने, ‘संविधानको भावनाबमोजिम पार्टीको विधानमा पदाधिकारी ८ सिटमा समावेसी कोटा राख्न सक्नु ठूलो उपलब्धि हो ।’

विधानबमोजिम सभापति देउवाको कार्यकाल आजैदेखि सकिएको हो । तर, विधानले कुनै खास कारणले निर्धारित समयमा महाधिवेशन हुन नसके सबै तह र पदाधिकारीको कार्यकाल १ वर्ष थप गर्न सक्ने अधिकार दिएको छ ।

गुट, उपगुट र समूहमा विभाजित कांग्रेसमा अझै पनि संस्थापन पक्षले देउवाको ४ वर्षे कार्यकाललाई उपलब्धिमूलक र सकारात्मक भएको टिप्पणी गर्ने गरेको छ भने असन्तुष्ट पक्षले यस अवधिमा देउवाले पार्टी सङ्गठनलाई कमजोर बनाएको र विधानलाई कार्यान्वयन गर्न चुकेको भनेर आलोचना गर्ने गरेको छ ।

प्रकाशित मिति: बिहीबार, फागुन १, २०७६ १८:४६