रामेश्वरको मन्त्री पदमा अष्टलक्ष्मी बाधक !

A+ A A-

बुधबार बागमती प्रदेशका नेपाल कम्युनिस्ट पार्टी संसदीय दलका मुख्य सचेतक रामेश्वर फुयाँल चर्चामा रहे । कारण थियो– फुयाँल भौतिक योजना तथा विकासमन्त्री बन्ने ।

मुख्यमन्त्री कार्यालयले दिउँसो फुयाँलको शपथग्रहण भनेर सार्वजनिक गर्‍यो । ‘फुयाँल मन्त्रीमा नियुक्त’ भन्ने समाचार एकाएक भाइरल बन्यो ।

त्यति मात्र होइन, मुख्यमन्त्री कार्यालयले फुयाँल चढ्ने झण्डावाल गाडी पनि तयारी अवस्थामा राखेको थियो । गाडी मन्त्रीको प्रतीक्षामा थियो, फुयाँल शपथको ।

शपथका लागि फुयाँल दौरा सुरुवाल लगाएर बसेका थिए ।

त्यसपछि सामाजिक सञ्जालमा उनको फोटो राखेर नेता, कार्यकर्ता र शुभचिन्तकले बधाई तथा शुभकामना दिन थाले । अन्तिम समयमा उनको शपथग्रहण नै रोकियो । शुभचिन्तकको खुसी धेरै समय टिक्न सकेन ।

अष्टलक्ष्मी बाधक !

मंगलबार प्रदेश कमिटीको बैठकमा मुख्यमन्त्री डोरमणि पौडेलले फुयाँललाई मन्त्री बनाउने प्रस्ताव ल्याएका थिए । तर, प्रदेश कमिटीका बहुमत सदस्य फुयाँललाई मन्त्री बनाउन नहुने पक्षमा उभिए ।

‘प्रदेश इन्चार्ज अष्टलक्ष्मी शाक्यले एक, दुई, तीन रामेश्वरलाई मन्त्री बनाउनु हुँदैन भन्नुभयो,’ प्रदेश कमिटीका एक सदस्यले भने, ‘त्यसपछि रामेश्वरज्यूको शपथग्रहण कार्यक्रम नै बिथोलियोे ।’

‘प्रदेश कमिटीका केही सदस्यले फुयाँललाई मन्त्री बनाउन नहुने भनेपछि मुख्यमन्त्रीज्यू रिसाउनुभयो,’ उनले भने, ‘मन्त्रिमण्डल विस्तार गर्ने नगर्ने मैले हो भनेर बैठकमा मुख्यमन्त्रीज्यूले भन्नुभयो ।’

मुख्यमन्त्री पौडेलले पार्टी अध्यक्ष पुष्पकमल दाहाल (प्रचण्ड)लाई फोन गरेर फुयाँललाई मन्त्री बनाउन लागेको जानकारी गराएका थिए ।

फुयाँललाई मन्त्री बनाउन प्रचण्ड पनि सहमत भएको एक सदस्यले बताए ।

त्यसपछि मुख्यमन्त्रीले फुयाँललाई मन्त्री बनाउने प्रस्ताव गरेका हुन् ।

यसअघि भौतिक योजना तथा विकासमन्त्री ललितपुरलाई दिने भनिएको थियो । तर, ललितपुरका नेकपा नेता भिडेपछि फुयाँललाई मन्त्री बनाउन मुख्यमन्त्री पौडेल राजी भएका हुन् ।

मन्त्रीको योग्य उम्मेदवार म नै हुँः फुयाँल

सचेतक फुयाँलले शपथग्रहण रोकिएपछि शिलापत्रसँग कुरा गर्दै मन्त्रीका लागि योग्य उम्मेदवार आफू नै रहेको बताए ।

‘२०७० सालदेखि चुनाव जितेर आएको छु । मन्त्रीको योग्य उम्मेदवार पनि हुँ । तर, कहिले मौका पाउने भन्ने कुरा पार्टीको निर्णयको कुरा हो,’ उनले भने ।

शपथग्रहण किन रोकियो ? भन्ने प्रश्नमा सचेतक फुयाँलले भने, ‘कसले, किन र के कारणले शपथग्रहण रोकियो, त्यो मलाई थाहा छैन । मुख्यमन्त्रीको कार्यालयलाई थाहा होला । यति बजे शपथग्रहण भन्ने पनि मलाई थाहा थिएन । मुख्यमन्त्रीज्यूले मलाई प्रस्ताव गर्नुभएको भन्ने सुनेको छु । अरु विषयमा केही थाहा छैन ।’

अध्यक्ष प्रचण्ड र प्रधानमन्त्री केपी ओलीले आफूलाई मन्त्री हुनबाट नरोकेको समेत उनले बताए ।

‘यो सवालमा अध्यक्ष प्रचण्ड र प्रधानमन्त्री केपी ओलीका कारण रोकिएको हो भन्ने लाग्दैन,’ उनले भने, ‘प्रदेश कमिटीका केही नेता लागेका छन् भन्नेसम्म सुनेको छु ।’

फुयाँल काठमाडौं– ३ बाट प्रदेशसभामा निर्वाचित सांसद हुन् ।

मुख्यमन्त्री पौडेलले केशव स्थापितलाई बर्खास्त गरेपछि बागमती प्रदेशको भौतिक योजना तथा विकास मन्त्रालय खाली छ।

प्रकाशित मिति: बिहीबार, फागुन १, २०७६ १७:१६