३ पटक विश्वकप जितेका पेले घरबाहिर निस्किन मान्दैनन्

A+ A A-

‘कालो मोती’ भनेर चिनिने विश्व फुटबलका महान् खेलाडी हुन् पेले, अर्थात एड्सन अरान्ते दो नास्सिमेन्तो । उनलाई सबैले पेलेका नामले चिन्छन् । तर फुटबलका यी हस्ती यतिबेला बिरामी छन् । उनी विनासहारा हिँडडुल गर्न नसक्ने अवस्थामा छन् ।

छोरा इडिन्होकाले हिजोआज पेले घरबाहिर निस्किन पनि संकोच मान्ने गरेको बताएका छन् ।

तीन पटक विश्वकप विजेता तथा अहिलेसम्मकै सबैभन्दा उत्कृष्ट फुटबल खेलाडी मानिएका पेलेलाई गत वर्ष मूत्रनलीमा संक्रमण भएपछि अस्पताल लगिएको थियो ।

७९ वर्षीय पेलेलाई केही समययता कम्मरमा समस्या देखिएपछि हिँडडुल गर्न फ्रेमको सहारा आवश्यक पर्छ। सार्वजनिक समारोहमा सहभागी हुन उनले ह्वीलचेयर प्रयोग गर्न थालेका थिए।

‘उहाँ अचेल एकान्तप्रेमी अनि बाहिर निस्किँदा आफ्नो अवस्थाका कारण लजाउने हुनुभएको छ,’ छोरा इडिन्होले बताए ।

आफ्नो २१ वर्ष लामो फुटबल जीवनका क्रममा पेलेले १ हजार ३६३ खेलमा १ हजार २८१ गोल गरेर विश्व कीर्तिमान बनाएका थिए । सो अवधिमा उनले ब्राजिलका लागि ९१ खेलमा ७७ गोल गरेका थिए ।

तीनवटा विश्वकप जित्ने उनी एक मात्र खेलाडी हुन् । ब्राजिलले सन् १९५८, १९६२ र १९७० मा विश्वकप फुटबल जितेको थियो । उनले विश्वकपका कुल १४ वटा खेलमा १२ गोल गरेका छन् ।

उनलाई फिफाका ‘शताब्दी खेलाडी’ को उपाधि दिइएको थियो । आगामी जुनमा पेलेले आफ्नो अन्तिम विश्वकप फाइनल जितेको ५० वर्ष पुग्दै छ ।

मेक्सिकोमा भएको सो खेलमा सहभागी ब्राजिलको टोलीलाई कतिपयले हालसम्मकै उत्कृष्ट टोली भन्ने गर्छन् ।

पछिल्ला वर्षहरूमा उनको स्वास्थ्यमा विभिन्न समस्या देखा परेका छन् । सन् २०१५ मा उनको प्रोस्टेट अर्थात् पौरुषग्रन्थिको शल्यक्रिया गरिएको थियो । उनको मिर्गौलामा पनि समस्या देखिएको थियो ।

उनका छोरा इडिन्होले भने, ‘उहाँलाई अचेल संकोच लाग्छ, उहाँ बाहिर जान चाहनु हुन्न, देखिन चाहनु हुन्न। उहाँ कमजोर हुनुभएको छ।’

प्रकाशित मिति: मंगलबार, माघ २८, २०७६ ११:४४