को बन्दै छ २ दिनपछि २७औँ प्रहरी प्रमुख ?, एआईजीमा पनि रोचक प्रतिस्पर्धा

A+ A A-

२ दिनपछि नेपाल प्रहरी प्रमुख फेरिँदै छन् । ३० वर्षे प्रहरी सेवा अवधिका कारण हालका प्रहरी प्रमुख प्रहरी महानिरीक्षक (आईजीपी) सर्वेन्द्र खनाल २९ माघमा अवकाश लिएर घर जान लागेका हुन् ।

तर, २ दिन मात्रै बाँकी रहँदा पनि भावी आईजीपी को बन्ने भने अझै टुंगो लागेको छैन । आईजीपी खनालसँगै उनका ब्याचीहरू अतिरिक्त प्रहरी महानिरीक्षक (एआईजी) र प्रहरी नायव महानिरीक्षक (डीआईजी)हरू पनि २ दिनपछि घर जान लागेका छन् ।

उनीहरूले २९ माघ २०४६ बाट प्रहरी निरीक्षक पदबाट सेवा सुरु गरेका थिए । आईजीपीका लागि प्रदेश– १ प्रहरी प्रमुख डीआईजी ठाकुरप्रसाद ज्ञवाली, सुदूरपश्चिम प्रहरी प्रमुख डीआईजी तारणीप्रसाद लम्साल र आईजीपी खनालकै सचिवालयका डिआईजी सूर्य उपाध्याय दाबेदार छन् ।

यसमध्ये प्रमुख दाबेदार ज्ञवाली हुन् । उनी कार्यसम्पादन मूल्याङ्कनमा पहिलो नम्बरमा छन् । यसअघि खनाललाई समेत सरकारले कार्यसम्पादन मूल्याङ्कनको आधारमा १ नम्बरमा रहेको भन्दै आईजीपीमा नियुक्त गरेको थियो ।

खनाललाई आईजीपी नियुक्त गरेपछि अर्का डीआईजी रमेश खरेलले भने राजीनामा दिएका थिए । वरिष्ठ प्रहरी उपरीक्षक (एसएसपी)सम्म आफू कार्यसम्पादनमा पहिलो नम्बरमा रहेको भन्दैै आईजीपीको दाबी गरेका खरेलले खनाल आईजीपी भएपछि राजीनामा दिएका थिए । अब बन्ने आईजीपी नेपाल प्रहरीका २७औँ प्रहरी प्रमुख हुनेछन् । खनाल २६औँ आईजीपी हुन् ।

२९ माघमा नियुक्त हुने आईजीपीको पदावधि भने ५ महिनाको मात्र हुनेछ । तीनै जनाले २५ असार २०४७ देखि प्रहरी निरीक्षकबाट सेवा सुरु गरेका थिए । उनीहरू आईजीपी खनालकै वैकल्पिक ब्याची हुन् । उनीहरूले पनि ३० वर्षे सेवा अवधिका कारण असारमा अवकाश पाउनेछन् ।

रोचक प्रतिस्पर्धा एआईजीमा

आईजीपीसँगै एआईजीहरू पुष्कर कार्की, ठूले राई र धीरु बस्न्यातले पनि अवकाश पाउँदै छन् । त्यसैले एआईजी बढुवाको प्रतिस्पर्धा रोचक छ । २९ माघमा हुने आईजीपीको पदावधि जम्मा ५ महिना मात्र हुने भएपछि एआईजीको प्रतिस्पर्धा रोचक बनेको हो ।

उसो त, ३ जना एआईजीका लागि ७ जना डीआईजी प्रतिस्पर्धामा रहेका छन् । एआईजी दौडमा आईजीपीको दौडबाट बाहिरिने २ डीआईजीसहित विशेष ब्युरोका प्रमुख डीआईजी हरिबहादुर पाल, प्रहरी प्रवक्ता डीआईजी शैलेश थापा क्षेत्री, प्रहरीको केन्द्रीय अनुसन्धान ब्युरो (सीआईबी) प्रमुख निरज शाही, प्रदेश २ प्रमुख प्रद्युम्न कार्की र महानगरीय प्रहरी कार्यालयको प्रमुख डीआईजी विश्वराज पोखरेल एआईजीका दाबेदार हुन् ।

यी हुन् अवकाश पाउने डीआईजीदेखि आईजीपीसम्म

सर्वेन्द्र खनाल, प्रहरी प्रमुख (आईजीपी)
पुष्कर कार्की (एआईजी)
ठूले राई (एआईजी)
धीरु बस्न्यात (एआईजी)

यसैगरी डीआईजीहरू मनोज न्यौपाने, शेरबहादुर बस्नेत, केदार रिजाल, नारायणसिंह खड्का, पूर्णचन्द्र जोशी, कमल जीटी, दानसिंह बोहरा, हरिभक्त प्रजापति, रामप्रसाद श्रेष्ठ, पिताम्बर अधिकारी, विनोद शर्मा घिमिरे, विकास श्रेष्ठ, दीपक थापा, सुरेशविक्रम शाह, महेशविक्रम शाह, महेन्द्र पोखरेल, सुरज केसी, दिनेश अमात्य छन् ।

प्रकाशित मिति: आइतबार, माघ २६, २०७६ १४:०३