'कर्णाली प्रदेशलाई कुन तत्वले चलाइरहेको छ ?'

A+ A A-

कर्णाली प्र्रदेशको पाँचौं हिउँदे अधिवेशनमा पहिलो बैठकमा प्रतिपक्षी दलका सांसद मात्र नभएर सत्तापक्षका सांसदले समेत सरकारको काम कार्बाहीप्रति असन्तुष्टि जनाएका छन् । वर्षे अधिवेशन सकिएको ६ महिनापछि शुरु भएको हिउँदे अधिवेशनमा सरकारले बजेट खर्च गर्न नसकेको, विकास निर्माणका योजनामा ढिलाइ गरेकोलगायतका विष्यमा प्रतिपक्षीसहित सत्ता पक्षका नेताहरूले प्रदेश सरकारको आचोचना गरेका हुन् ।

प्रदेश सरकारलाई विकास निर्माणका चुस्त हुन नसकेको, विकास खर्च न्यून रहेको, सरकारले कमिसनको खेलमा लागेको सांसदहरूको आरोप थियो ।

संसदको पाँचौं बैठकमा नेपाली कांग्रेस संसदीय दलका नेता जीवनबहादुर शाहीले सरकारका मन्त्रीहरू अहिले विकास निर्माणभन्दा घरघडेरी जग्गा खरिदबिक्रीमा लागेको आरोप लगाए । ‘आम जनताको जनप्रतिनिध हाै‌ कि होइनौँ, भन्न लाज लागेको छ’, उनले भने, ‘म सुन्दैछु, अहिले मन्त्रीहरू घरघडेरी किन्दै हुनुहुन्छ रे ! जग्गा खरिद बिक्रीमा लाग्नु भएको छ रे ! यो कुरा के साँचो हो कि हैन् ?’

संसदीय दलका नेता शाहीले सरकारले अनुदान दिएका योजनाको छानबिन गरेर गल्ती गर्नेलाई कार्बाही गर्न माग गरे । ‘प्रदेश सरकारले दिएका योजनामा कार्यक्रम तथा अनुदान नाम दिएका योजनाको एउटा पनि काम भएको छैन् । हाइटेक नर्सरी बनाउन भनिएको थियो, त्यो खोइ ?’ उनले प्रश्न गरे, ‘जनता सडक कार्यक्रमको प्रभावकारिता के हो ?
लामो समयदेखि संसदीय समिति चयन नभएकोमा पनि सांसद शाहीले सरकारको आलोचना गरे । ‘मिनी संसदका समितिका अध्यक्ष चयन गर्न सकेका छैनौं,’ उनले भने, ‘विकास निर्माण कुनै कुरामा जागरण नै देखिएको छैन् ।’

सरकारले कुनै नागरिक पनि औषधी नपाएर मर्नु पर्दैन भनेका बेला हुम्लामा सामान्य भाइरलका कारणले १६ जनाको ज्यान गएको उनले बताए । ‘सरकारले भन्थ्यो–औषधी नपाएर कोही मर्दैन । तर, मानिस धमाधम मरिरहेका छन्’, उनले भने, ‘सरकारले यसमा ध्यान दिएको छैन् ।’
सरकारका योजनामा बिचौलिया हाबी भएको र यसको नियन्त्रण गरिनुपर्नेमा सांसद शाहीले जोड दिए ।

चालु आर्थिक वर्षमा न्यून बजेट खर्च भएकोले कर्णाली प्रदेशको विकास गति न्यून रहेको सांसद शाहीको भनाइ छ । ‘हामी सबैको मुहार भनेको सुर्खेत हो । सुर्खेतलाई चिटिक्क बनाउनुपर्छ । सुर्खेतमा बन्न सकेको छैन्’, उनले भने, ‘प्रदेश सरकारको बजेट ३ प्रतिशत मात्र खर्च भएको छ ।’
नेपाल कम्युनिस्ट पार्टी(नेकपा) संसदीय दलका उपनेता यमलाल कँडेलले सरकारका हरेक गतिविधिको निगरानी गर्ने प्रतिपक्ष दल कमजोर अवस्थामा रहेको बताए । ‘प्रतिपक्षको हालत यस्तो अवस्थामा छ भने मैले भन्नुपर्ने अवस्था के होला र ?’ उनले भने, ‘सरकार, सदन, सांसदको प्रभावकारी भूमिका रहेको देख्दिनँ ।’

सरकार सञ्चालन प्रभावकारी नभएको र सरकारलाई कुन तत्वले चलाइरहेको छ भन्दै राष्ट्रिय प्रजातन्त्र पार्टी(राप्रपा) संसदीय दलकी नेता शोसिला शाही प्रश्न गरिन् ।

संददको अर्को बैठक १ फागुन बिहिबार ३ बजे फेरि बस्ने गरी स्थगित गरिएको छ ।

प्रकाशित मिति: शुक्रबार, माघ २४, २०७६ २०:५५