अदालतकाे पत्र नआउँदै सटरमा चलाइयाे डोजर : व्यवसायी

A+ A A-

सर्वोच्चको आदेशलाई लत्याउँदै लुम्बिनी प्रादेशिक अस्पताल बुटवलका सटरहरूमा डोजर लगाएपछि सटर विवादको विषय नयाँ मोडमा पुगेको छ ।

अस्पताल विकास समितिले सटर खाली गराउन भन्दै बुधबार राति १२ बजेसम्मका लागि भनेर ४८ घण्टे पत्र व्यवसायीहरूलाई दिएको थियो । तर, ४८ घण्टा अगावै सर्वोच्चले दुवै पक्षलाई छलफलका लागि बोलाउने अन्तरिम आदेश दिएपछि अस्पताल विकास समितिले भने बिहीबार बिहानै डोजर चलाएर सटरहरू भत्काएको थियो ।

सर्वोच्चको निर्णयलाई नमानी व्यवसायीका सटरहरूमा डोजर चलेपछि व्यवसायीहरू पुनः सर्वोच्चको अवहेलानाविरुद्ध अदालतमा जाने तयारीमा रहेको बताइएको छ ।

प्रदेश नं. ५ सरकारले लुम्बिनी प्रादेशिक अस्पताललाई प्रदेशकै गौरवको आयोजनाको रूपमा अगाडि बढाउने भन्दै गत १९ कात्तिकमा नै सटर खाली गर्न व्यवसायीलाई अल्टिमेटम दिएको थियो । तर, २६ व्यवसायीहरूले भने ५ वर्षसम्म सम्झौता गरेको, सटरमा लगानी भइसकेको भन्दै अस्पताल र प्रदेश सरकारविरूद्ध करार सम्झौता परिपालनाको माग गर्दै मुद्दा दायर गरेका थिए ।

जिल्ला अदालतले त्यससम्बन्धी परेको रिट खारेज गरेपछि सटर भत्काउने बाटो खुलेको ठहर गर्दै अस्पताल प्रशासनले ४८ घण्टे अल्टिमेटम दिएको थियो । सो अवधि सकिएपछि बिहीबार बिहान डोजर चलाइएको हो ।

सटर व्यवसायीका तर्फबाट यज्ञप्रसाद सापकोटाले दायर गरेको रिटमा सर्वोच्च अदालतका न्यायाधीश पुरुषोत्तम भण्डारीको एकल इजलासले बुधबार दुवै पक्षलाई १ फागुन छलफलमा बोलाउने र त्यतिन्जेलसम्म सटरहरू खाली गराउने विषयको पत्र र यससम्बन्धमा भए–गरेका निर्णयहरू कार्यान्वयन नगर्नू, नगराउनू भन्दै अन्तरकालीन आदेश दिएको थियोे । सापकोटाका अनुसार अदालतको उक्त पत्र अस्पताल प्रशासनसम्म आइनपुग्दै बिहीबार सटरमा डोजर चलाइएको हो ।

अस्पतालका मेडिकल सुपरिटेन्डेट डाक्टर राजेन्द्र खनालले सर्वोच्चबाट रोक्न भन्ने आदेश अस्पतालमा आइनपुगेको भन्दै अब सटर भत्काइसकेपछि नमुना अस्पतालका रूपमा विकास गर्ने गरी काम अगाडि बढ्ने बताए । सटर भत्काएसँगै अस्पताल विकास समितिले तत्कालका लागि सटर खाली गरेर कम्पाउन्ड पर्खाल निर्माणको योजना अगाडि सारेको बताएको छ । अस्पतालमा ७३ वटा सटरहरू रहेका छन् । जसबाट अस्पतालले वार्षिक ९ करोड रूपैयाँ आम्दानी गर्दै आएको थियो ।

यता प्रदेश सरकारले भने अस्पतालको विकासकै लागि सटरहरू भत्काइएको बताएको छ । प्रदेश गौरवको आयोजनामा समावेश गरेर समग्र अस्पतालको गुरुयोजना निर्माणमा प्रदेश सरकार लागेको प्रदेश नं. ५ सरकारका प्रवक्ता बैजनाथ चौधरीले बताए । उनले अस्पतालले सटरबाट गर्ने आम्दानी प्रदेश सरकारले दिने र नमुना अस्पतालको रूपमा विकास गरिने योजनाअनुसार सरकार लागेको बताए ।