दशाैँ राष्ट्रिय खेलकुद प्रतियोगिता कर्णालीमा

दसौं राष्ट्रिय खेलकुद प्रतियोगिताका लागि निर्माण हुने बहुउद्देश्यीय रंगशालाको डीपीआर

A+ A A-

दशाैँ राष्ट्रिय खेलकुद प्रतियोगिता कर्णाली प्रदेशमा गर्ने तयारी सुरु भएको छ । प्रदेश राजधानी वीरेन्द्रनगरमा बहुउद्देश्यीय रंगशाला निर्माणको डीपीआर तयार भएको छ । राष्ट्रिय खेलकुद परिषद्ले दशाैँ राष्ट्रिय खेलकुदका लागि रंगशाला, कभर्ड हल र स्वीमिङ पुलसहितको बहुउद्देश्यीय रंगशाला निर्माणको डीपीआर तयार पारेको हो ।

डीपीआरमा हालको वीरेन्द्रनगर–८ को खजुरा रहेको रंगशालामा कभर्ड हल, फुटबल रंगशाला र स्वीमिङ पुल निर्माण गर्ने गरी डीपीआर तयार पारिएको राष्ट्रिय खेलकुद परिषद्का इन्जिनियर विश्वामित्र संज्यालले बताए ।

‘रंगशाला १५ हजार दर्शकले एकैसाथ हेर्न सक्नेछन् । कभर्ड हलमा एउटा खेलमा ३ हजार दर्शक अट्ने क्षमताको निर्माण हुनेछ,’ उनले भने, ‘कणाली प्रदेशमा बन्न लागेको बहुउद्देश्यीय रंगशाला नेपालकै पहिलो नमुना रंगशाला हो ।’ बहुउद्देश्यीय रंगशाला ९ विगाह जमिनमा बन्ने र त्यसका लागि सबै पूर्वाधार २ वर्षमा नै निर्माण गरिसक्ने लक्ष्य राखिएको इन्जिनियर संज्यालले जानकारी दिए ।

दशाैँ राष्ट्रिय खेलकुदका लागि कर्णालीमा संरचना निर्माण गर्न प्रदेश सरकार, स्थानीय सरकारसँग सहकार्य गरेर भौतिक संरचना निर्माण गरिने इन्जिनियर संज्यालको भनाइ छ । दशाैँ राष्ट्रिय खेलकुद प्रतियोगिता कर्णाली प्रदेशमा नै गर्ने गरी प्रदेश सरकारले तयारी थालेको कर्णाली प्रदेशका सामाजिक विकासमन्त्री दल रावलले बताए ।

‘हामीले दशाैँ राष्ट्रिय खेलकुद कर्णालीमा नै हुनुपर्छ भनेर खेलकुद मन्त्रालय र परिषद्लाई भनिरहेका छौं,’ उनले भने । ’नवौं राष्ट्रिय खेलकुद २०७७ सालमा गण्डकी प्रदेशमा हुने र दशाैँ राष्ट्रिय खेलकुद २०७९ सालमा कर्णाली प्रदेशमा नै गर्ने गरी अहिलेदेखि नै तयारी थालेको राष्ट्रिय खेलकुद परिषद्का सदस्य सचिव रमेश सिलवालले बताए ।

तीन अर्बका संरचना निर्माण हुँदै

दशाैँ राष्ट्रिय खेलकुदका लागि कर्णाली प्रदेशमा ३ अर्बका संरचना निर्माण गर्ने राष्ट्रिय खेलकुद परिषद्ले जनाएको छ । कर्णाली प्रदेशको जुम्ला, सुर्खेत, दैलेख, सल्यान र रुकुमपश्चिमको चौरजहारीमा दशाैँ खेलकुदका लागि ३ अर्बका संरचना निर्माण हुनेछन् । दशाैँ राष्ट्रिय खेलकुदमा २५ देखि ३० वटा खेलकुद समेटिने र त्यसका लागि खेलकुद परिषद्ले मात्र ३ अर्ब रुपैयाँ खर्च लाग्ने खेलकुद परिषद्का सदस्य सचिव रमेश सिलवालले जानकारी दिए ।

‘अहिले त कर्णालीमा चेस खेल्नका लागि पनि संरचना छैन्,’ उनले भने, ‘खेलकुदका लागि सबै संचरना नयाँ बनाउनुपर्ने भएको छ ।’ कर्णाली खेदकुदका संरचनाको अध्ययन तथा अवलोकन गरिएको र अध्ययन अवलोकनमा कतै पनि खेलकुदका लागि संरचना नबनेको सदस्य सचिव सिलवालले बताए ।

भूगोल र ठाउँका आधारमा खेलकुदका ठूला संरचना निर्माण हुने, जिल्ला सदरमुकाम र स्थानीय तहहरूले दशाैँ राष्ट्रिय खेलकुदका संरचना निर्माण गर्न आवश्यक रहेको राष्ट्रिय खेलकुद परिषद्ले जनाएको छ ।

व्यवस्थापन खर्च १ अर्ब

दशाैँ खेलकुदका लागि १ अर्ब व्यवस्थापन खर्च लाग्ने राष्ट्रिय खेलकुद परिषद्ले जनाएको छ । खेलाडी, प्रशिक्षक, खेल खेलाउनका लागि सामग्रीमा १ अर्ब रुपैयाँ खर्च हुने बताइएको छ ।

रंगशाला निर्माणका लागि कर्णाली प्रदेशको सामाजिक विकास मन्त्रालयले १ करोड रकम विनियोजन गरेको छ । कर्णाली प्रदेश सरकारले रंगशाला निर्माणमा छुट्याएको १ करोड रुपैयाँलाई खेलकुुद परिषद्ले निर्माण गर्ने रंगशालाको एउटा भागको काम गर्ने साझेदारी गर्र्ने सामाजिक विकासमन्त्री रावलले बताए ।

‘खेलकुद परिषद्ले रंगशाला निर्माण गर्ने भएपछि रंगशालाको एक भागमा काम गर्नेगरी तत्काल ठेक्का प्रक्रियामा जान थालेका छौं,’ उनले भने, ‘हामीले बहुवर्षीय योजना बनाएर रंगशालाको निर्माण गर्ने लक्ष्य राखेका छौं ।’

दशाैँ राष्ट्रिय खेलकुदमा उच्च हिमाली क्षेत्रमा हुने हाइअल्टिच्युटका खेलहरू समेटिने राष्ट्रिय खेलकुद परिषद्ले जनाएको छ । कर्णालीका हुम्ला, डोल्पा, मुगु जिल्लाकाे भूगाेल हाइअल्टिच्युटका खेल खेल्न उपयुक्त भएका कारणले हाइअल्टिच्युटका खेल दशाैँ राष्ट्रिय खेलकुदमा समेटिने भएका छन् ।

हाइअल्टिच्युट म्याराथुन, हाइकिङलगायतका खेलहरू हाइअल्टिच्युटमा हुने भएकाले दशाैँ राष्ट्रिय खेलकुदमा खेलाइने सदस्य सचिव सिलवालले बताए ।

प्रकाशित मिति: बुधबार, माघ २२, २०७६ १२:१०