ज्यानमारा बन्दै हाइटेन्सन विद्युत् लाइन, स्थानान्तरण गर्न स्थानीयकै अवरोध

ज्यानमारा बन्दै हाइटेन्सन विद्युत् लाइन, स्थानान्तरण गर्न स्थानीयकै अवरोध

A+ A A-

विद्युत् प्रसारण लाइनले जोखिम निम्त्याएको भन्दै रूपन्देहीको तिलोत्तमा नगरपालिकाका स्थानीय बासिन्दाहरूले हाइटेन्सन प्रसारण लाइन अन्यत्र स्थानान्तरण गर्न माग गरेका छन् । उनीहरूले तिलोत्तमा नगरपालिकास्थित नयाँमिलदेखि पूर्व प्रेमनगरसम्म गएको प्रसारण लाइनले जोखिम निम्त्याउनुका साथै दुर्घटनासमेत गराएको भन्दै उक्त प्रसारण लाइन स्थानान्तरण गरी अन्यत्रबाट लैजान माग गरेका हुन ।

नयाँ मिलदेखि प्रेमनगरसम्म ३५ जनाभन्दा बढी व्यक्तिको जग्गामाथिबाट ११ सय केभीको प्रसारण लाइन गएको छ । वि.सं. २०३० सालतिर स्थानीयकै पहलमा प्रेमनगरतर्फ गएको प्रसारण लाइनमा विद्युत् कार्यालयले मर्मत सम्भार तथा विद्युतका पोलहरू नफेर्दा जोखिम निम्त्याएको छ ।

विद्युत लाइन लैजादा व्यक्तिगत जग्गाबाट नभई ३२ फिट तल मूल सडकछेउबाटै लैजान स्थानीय बासिन्दाहरूले माग गरेका छन् । प्रसारण लाइनमा पर्ने जग्गाधनीहरूले २६ चैत २०७१ मा प्रसारण लाइन अन्यत्रबाट लैजान विद्युत् प्राधिकरण भैरहवा वितरण केन्द्रमा निवेदन दिएका थिए ।

जग्गाधनीहरूले नगरपालिकामा समेत निवेदन दिएपछि नगरपालिकाले २७ चैत २०७१ मा नेपाल विद्युत् प्राधिकरण नयाँमिल शाखालाई हाइटेन्सन लाइन ३३ फुटे बाटोबाट लैजान स्थानान्तरणका लागि सिफारिस गरेको थियो । नगरपालिकाले सिफारिस गरेपश्चात् विद्युत प्राधिकरणले स्थानान्तरणका लागि पोलहरू लगे पनि केही निजी व्यक्तिहरूका कारण लाइन स्थानान्तरण हुन नसकेको स्थानीय मधु पाण्डेले जानकारी दिए ।

उनले भने, ‘विद्युत् कार्यालयले पुरानो बनिसकेका काठका पोलहरू समेत फेर्न चासो दिएको छैन, वर्षायाममा त झन् बढी नै जोखिम हुन्छ ।’

हाइटेन्सन लाइनकै कारण दुई वर्षअघि नयाँमिलका मानबहादुर जिसीको घरमा ह्युमपाइप गाड्दा एक जनाको मृत्यु भएको थियो । सोमबार मात्रै तिलोत्तमा नगरपालिका– ५, कैशालपथ मणिग्रामका पप्पु कुमालको निर्माणसम्बन्धी काम गर्दा करेन्ट लागेर मृत्यु भएको थियो ।

यता नेपाल विद्युत् प्राधिकरण मणिग्राम शाखाका प्रमुख कमर आलमले स्थानीयकै विरोधका लागि सो क्षेत्रको विद्युत् प्रसारण लाइन स्थानान्तरण गर्न नसकिएको बताए । जग्गाको बीचबाट गएको हाइटेन्सन लाइनलाई बाटोको छेउबाट लैजाने भने पनि बाटोछेउका जग्गाधनीहरूको विरोधले स्थानान्तरण हुन नसकेको उनको भनाइ छ ।

शाखाका प्रमुख आलमले भने, ‘त्यहाँ जीर्ण पोलहरू छन्, पोल फेर्नसमेत स्थानीयले दिदैनन्, जनताकै विरोधले हाइटेन्सन स्थानान्तरण गर्न नसकिएको हो ।’

नेपाल विद्युत् प्राधिकरण मणिग्राम शाखाले नयाँमिलदेखि प्रेमनगरसम्मको हाइटेन्सन लाइन सडक किनारमा स्थानान्तरण गर्ने योजनाअनुसार गतवर्ष नै बजेट छुट्याएर काम गर्न सुरू गरे पनि स्थानीयले अवरोध गरेपछि काम अघि नबढेको आलमले बताए ।

‘हामीले गिमार्ण स्कुलअगाडि पोलहरू, क्रेन लगेर एक÷दुईवटा खाडलसमेत खनेका थियौँ, तर स्थानीयको विवादले काम गर्न पाएनौँ,’ उनले भने, ‘स्थानीयको विवाद समाधान भयो भने हामी यसै वर्ष त्यहाँ काम गर्छौं ।’

विद्युत् कार्यालयले वडा कार्यालयसँग समन्वय गर्नसमेत आग्रह गरेको बताइएको छ ।

प्रकाशित मिति: मंगलबार, माघ २१, २०७६ १७:०८