एक सिलिन्डर ग्यास भर्न साढे १२ हजार !

A+ A A-

एक सिलिन्डर ग्यासको मूल्य कति पर्ला । जस्तोसुकै दुर्गम भए पनि तीन हजार, चार हजार वा पाँच हजारसम्म । तर एक सिलिन्डर ग्यास भर्न साढे १२ हजार रुपैयाँ ! हाम्रै नेपालमै ग्यास भर्न मात्रै यति धेरै मूल्य । सुन्दा अचम्म लाग्नसक्छ ।

हो हाम्रै नेपालको हुम्लामा सिलिन्डरसहित पनि होइन भर्न मात्रै १२ हजार ५ सय रुपैयाँ तिर्नपर्छ । सडक सञ्जालले नजोडिएको हुम्ला सदरमुकाम सिमकोटमा ग्यासको यति धेरै मूल्य हुँदा सर्वसाधारणले ग्यास प्रयोग गर्ने सामाथ्र्य राख्न सक्ने अवस्था छैन ।

भारी हिमपातपछि दाउरा अभाव हुँदा ग्यासको मूल्य आकाशिएको हो । खच्चडबाट ढुवानी भएको ग्यासको मूल्य यति धेरै भएको हो । सडक सञ्जालले छोएको मुगुको गमगढीमा एक सिलिण्डर ग्यासको रुपैयाँ मुगुको गमगढीबाट व्यापारीहरूले चार हजार रुपैयाँ किनेर हुम्लामा प्रतिसिलिण्डरको १२ हजार पाँच सय रुपैयाँमा बिक्री गर्ने गरेका छन् ।

सडक यातायात नजोडिएको हिमाली जिल्ला हुम्लामा ग्यासको बिक्री बढेको छ । लामो समयसम्म हिमपात भएको कारण दाउराको समस्या हुँदा महँगो ढुवानी भएर आएको ग्यासको बिक्री स्थानीय व्यापारीले महँगोमा बिक्री गर्ने गरेको सिमकोट बजारकी मधु बस्नेतले बताइन् ।

‘यसअघि आवश्यक परेको बेला मात्र ग्यास प्रयोग आएका थियौं,’ उनले भनिन्, ‘हिमपातपछि दाउराको समस्या हुँदा ग्यासको प्रयोग गर्ने गरेका छौं । त्यसको एक सिलिण्डडरको मुल्य साढे १२ हजार बढी मूल्य पर्छ ।’

हुम्लाको सिमकोट बजारका आधा दर्जन घरमा ग्यास चुल्हो बल्ने भए पनि हिमपातको कारण यसको प्रयोग गर्नेको संख्यामा बृद्धि भएको व्यापारी लोकेन्द्र शाहीले बताए । ‘त्यति नै संख्यामा अरु पनि अर्डर आएकोले मुगुबाट फेरि ग्यास सिलिण्डर ढुवानी गरेर ल्याउने तयारी भइरहेको छ,’ उनले भने, ‘जति महँगो भए पनि ग्यास बाल्नुको विकल्प छैन् । कि त भोकै बस्नुपर्‍यो ।’

दाउराको झन्झटबाट मुक्ति पाउन पनि ग्यास प्रयोग गर्नेको संख्या बढिरहेका बेला हिमपातको कारण दाउरा पाउनै छोडेपछि यसको प्रयोग गर्नेको संख्या दोब्बरले बृद्धि भएको शाहीले बताए । ‘ग्यास चुल्होको प्रयोग गर्ने कार्यालय, व्यापारी, होटेल व्यबसायी र व्यक्तिहरु रहेका छन्,’ उनले भने, ‘टाढाबाट सिलिण्डर ढुवानी गरेर ल्याउन कठिन भएपछि हुम्लामा ग्यास महँगो भएको हो ।’

प्रकाशित मिति: मंगलबार, माघ २१, २०७६ ०८:२५