नेविसंघ पदाधिकारी : ३४ कटेका र कलेज छाडेका

A+ A A-

प्रमुख प्रतिपक्षी दल नेपाली कांग्रेसको मेरुदण्ड र कार्यकर्ता उत्पादन गर्ने संगठनको रूपमा चिनिएको भ्रातृ संस्था नेपाल विद्यार्थी संघको पदाधिकारीमा नियुक्त सबै पदाधिकारी ३४ वर्ष उमेर कटेका र विद्यार्थी जीवनबाट अवकास पाएकाहरू छन् ।

कांग्रेस सभापति शेरबहादुर देउवाले १६ माघमा ५ दशक हिउँद खाएका सुनसरीका राजिव ढुङ्गानालाई नेविसंघको अध्यक्षमा नियुक्त गरे । उनी कुनै कलेज वा शैक्षिक संस्थामा अध्ययन पनि गर्दैनन् । नेविसंघको विधानबमोजिम उनी नेविसंघको सदस्य पनि छैनन् र हुन पनि पाउँदैनन् ।

तत्कालीन अध्यक्ष नैनसिंह महरलाई २९ माघ २०७५ मा राजीनामा दिन बाध्य पारिएपछि १ वर्षसम्म पूर्ण निष्क्रिय भएको नेविसंघलाई ब्यूँताउन सभापति देउवाले १६ माघमा विद्यार्थी जीवनबाट अवकास लिएका ढुङ्गानासहति २ जनालाई महामन्त्रीमा नियुक्त गरे ।

माउ पार्टी नेपाली कांग्रेसमा देखिएको गुटबन्दीको छाया भ्रातृ संस्था नेविसंघमा पनि देखिएको छ । यसले गर्दा नेताहरूकै सहमतिमा तदर्थ समिति गठन गर्दा विधान मिचेर सबै पदाधिकारी ३२ वर्ष उमेर काटेकाबाटै चयन गरियो ।

पार्टी र भ्रातृ संस्थालाई विधान र नियमसङ्गत ढंगले चलाउनुपर्छ र युवा पुस्तामा नेतृत्व हस्तान्तरण गर्नुपर्छ भनेर सुझाव र उपदेश दिने कांग्रेसका पदाधिकारीसहितका शीर्ष नेताले सहमतिको नाममा भ्रातृ संस्थाको विधानलाई नै उल्लङ्घन गरेका छन् ।

कांग्रेस केन्द्रीय कार्यसमितिको २१ भदौ २०७५ मा बसेको बैठकमा पार्टी सभापति शेरबहादुर देउवाले वरिष्ठ नेता रामचन्द्र पौडेल, नेता कृष्णप्रसाद सिटौलालगायतले ‘नोट अफ डिसेन्ट’ लेख्दासमेत बहुमतको आधारमा नेविसंघको विधानमा संशोधन गरी संघको सदस्य हुन ३२ वर्षे उमेर कट्न नहुने व्यवस्था गरिएको थियो ।

त्रिभुवन विश्वविद्यालयले स्वतन्त्र विद्यार्थी युनियनको पदाधिकारी वा सदस्यमा उम्मेदवार बन्न र भोट हाल्न २८ वर्ष उमेर नकटेको हुनुपर्ने व्यवस्था गरेको छ । तर, कांग्रेसले स्ववियु निर्वाचनमा सहभागी हुन नपाउने ३२ वर्ष उमेरसम्मका विद्यार्थीलाई नेविसंघको सदस्य बन्न पाउने प्रावधान राखेको थियो ।

पार्टीले आफैँ बनाएको विधानविपरीत १ अध्यक्ष, २ उपाध्यक्ष र ७ महामन्त्री सबै ३२ वर्ष उमेर कटेका छन् । पार्टी प्रवक्ताले नेविसंघको १२औँ महाधिवेशनको प्रयोजनका लागि मात्र ३२ वर्षे उमेर हद लगाएको भन्दै केन्द्रीय समितिमा त्यो लागू नहुने तर्क गरेका छन् ।

सभापति देउवाले पार्टी नेताहरू रामचन्द्र पौडेल र कृष्णप्रसाद सिटौला समूहको सिफारिसमा गरी हालसम्म १० जना पदाधिकारी नियुक्त गरेका छन् । नियुक्ति पाएका सबै पदाधिकारी ३२ वर्ष उमेर कटेका भएपछि नेविसंघका पूर्वनेताहरूले समेत असन्तुष्टि जनाएका छन् ।

अध्यक्ष ढुङ्गाना उमेरले ५० कटेका हुन् भने उनले अध्ययन छाडेको २ दशक भइसकेको छ । उनी सुनसरी कांग्रेसका महाधिवेशन प्रतिनिधि हुन् भने काठमाडौंमा सुमेरु सेक्युरिटिजको सञ्चालक समिति सदस्य पनि हुन् ।

उपसभापतिमा नियुक्त झापाकी तुलसा पन्तको उमेर ४३ वर्ष हो । उनी विगतमा पद्मकन्या क्याम्पसमा अध्ययन गर्थिन् । विद्यार्थी जीवनबाट अवकास पाएकी पन्त होस्टेल सञ्चालन गरेर बस्छिन् ।

अर्का उपसभापति मुक्तिराज पौडेल ३७ वर्षका भए । ३ वर्षअघि नेविसंघ केन्द्रीय महाधिवेशनमा पदाधिकारीमा उम्मेदवार भएर पराजित भएपछि क्यानडा बस्दै आएका थिए उनी । भैरहवामा अध्ययन गरेका पौडेल पनि विद्यार्थी जीवनबाट अवकास लिएर बुटवल हस्पिटल प्रालिको प्रबन्ध निर्देशक भएर व्यवसाय गरिरहेका छन् ।

नेविसंघको महामन्त्रीमा नियुक्त बलदेव तिम्सिना पशुपति बहुमुखी क्याम्पसमा अध्ययन छाडेको झण्डै एक दशक भयो । ४१ वर्ष उमेर कटेका तिम्सिना कांग्रेस सिन्धुपाल्चोकका नेता र पार्टीका महाधिवेशन प्रतिनिधि हुन् ।

स्याङ्जाका युवराज पाण्डे उमेरले ४० वर्षका भए । उनी विगतमा त्रिभुवन विश्वविद्यालय कीर्तिपुरमा अध्ययन गर्थे । पाण्डे स्याङ्जामा पार्टी राजनीति गर्छन् ।

नेविसंघको ११औँ महाधिवेशनमा महामन्त्रीमा उम्मेदवार बनी पराजित भएका दीपक भट्टराई विगतमा त्रिचन्द्र कलेजमा अध्ययन गर्थे । हाल त्रिचन्द्र कलेजमै अध्यापन गराइरहेका भट्टराई ४१ वर्षका भए ।

नेविसंघमा २ दशकदेखि क्रियाशील उर्मिला थपलिया उमेरले ३९ वर्षकी भइन् । डेढ दशकअघि नेपाल विश्वभाषा क्याम्पसमा अध्ययन गरेकी थिइन् उनले । उनी पनि धादिङबाट कांग्रेसको राजनीतिमा क्रियाशील छन् ।

कांग्रेसको मकवानपुर जिल्ला कार्यसमितिको सभापतिमा २०७२ मा उम्मेदवार बनी पराजित भएका ५० वर्षीय प्रभातकुमार दाहाल महामन्त्रीमा नियुक्त भएका छन् । उनले विद्यार्थी जीवनबाट अवकास लिएको २ दशक बितिसकेको छ ।

‘क’ वर्गको निर्माण व्यवसाय सञ्चालन गरेर बसेका दाहाल कांग्रेसको जिल्ला राजनीतिमा व्यस्त भएकै बेला पार्टीका असन्तुष्ट नेता प्रकाशमान सिंहको कोटामा महामन्त्रीमा सिफारिस भएका हुन् ।

३४ वर्ष मात्र उमेर पुगेका र भर्खरै मात्र पशुपति बहुमुखी क्याम्पसबाट अध्ययन छाडेका नेविसंघ काठमाडौंका अध्यक्ष भइरहेको बेला मनोज वैद्य महामन्त्री बन्ने भाग्यमानी बने । उनी सभापति शेरबहादुर देउवावको रोजाइमा महामन्त्री हुन पाएका हुन् ।

महामन्त्रीमा देउवाले नियुक्त गरेकी पाल्पाकी महेश्वरी कुँवर उमेरले ३४ वर्षकी मात्र हुन् । कुँवर पार्टीका सबै नेतासँग सुसम्बन्ध भएकी विद्यार्थी नेतृ हुन् । कुँवर हाल पनि पद्मकन्या क्याम्पसकी विद्यार्थी हुन् ।

नेविसंघको विधानमा अध्यक्षबाहेक महामन्त्री २ जना हुने व्यवस्था छ तर शीर्ष नेताहरूको सहमति भन्दै महामन्त्रीमा ९ जना र उपाध्यक्ष तथा सहमहामन्त्रीमा ६/६ जना नियुक्त गर्ने तयारी हुँदै छ ।

१ सय २७ सदस्यीय नेविसंघ केन्द्रीय तदर्थ समिति गठनका लागि संस्थापन देउवा पक्ष, असन्तुष्ट रामचन्द्र पौडेल पक्ष र कृष्णप्रसाद सिटौला पक्षलाई समितिमा बस्ने विद्यार्थीको नाम सिफारिस गर्नका लागि भागबण्डा गर्ने सहमति भएको थियो ।

नेविसंघमा देउवाले २ महामन्त्री, २ उपसभापति र २ सहमहामन्त्री सिफारिस गर्न बाँकी छ भने पौडेल पक्षले २ उपसभापति र सिटौलाले २ सहमहामन्त्रीकाको नाम सिफारिस गर्न बाँकी छ । केन्द्रीय सदस्यहरूको नामावली भने नेताहरूले अझै बुझाएका छैनन् ।

महर नेतृत्वको केन्द्रीय समितिले २० भन्दा बढी जिल्लाको अधिवेशन सम्पन्न गरिसकेको छ । ती अधिवेशनमा ३२ वर्ष उमेर नकटेकाले मात्र नेविसंघको सदस्यता पाएका थिए भने अधिवेशनमा भाग लिने पनि ३२ वर्षमुनिकै थिए ।

विधानबमोजिम पदाधिकारीमा नियुक्त अध्यक्ष, उपाध्यक्ष र महामन्त्री कसैले पनि नेविसंघको सदस्यता लिन पाउँदैनन् ।

प्रकाशित मिति: सोमबार, माघ २०, २०७६ १७:४५