नेविसंघ महामन्त्रीका दाबेदार आंशिक प्राध्यापक !

A+ A A-

नेपाली कांग्रेसका सभापति शेरबहादुर देउवाले पार्टीको भ्रातृ संस्था नेविसंघमा विधानविपरीत सहमतिका आधारमा भन्दै ५० वर्ष उमेर पुगेका सुनसरीका राजीव ढुंगानालाई अध्यक्ष बनाएपछि असन्तुष्ट नेताहरू झन् रूष्ट बनेका छन् ।

नेविसंघको विधानमा ३२ वर्ष उमेर नकाटेको विद्यार्थीले मात्र नेविसंघको सदस्यता लिन पाउँछन् । तर, सभापति देउवाले विधान विपरीत झण्डै १८ वर्ष बढी उमेर भएका ढुंगानालाई अध्यक्ष बनाएपछि असन्तुष्ट नेताहरू रामचन्द्र पौडेल र कृष्णप्रसाद सिटौलाले नेविसंघमा आफ्नोतर्फबाट नाम तत्काल नपठाउने भएका छन् ।

२०२६ सालमा जन्मेका ढुंगानालाई अध्यक्ष बनाउन पार्टी प्रवक्ता विश्वप्रकाश शर्मा र केन्द्रीय सदस्य तथा नेपाल दलित संघका अध्यक्ष मीन विश्वकर्माले जोरबल गरेका थिए । असन्तुष्ट नेता सिटौलाले विधानविपरीत ५० वर्ष उमेर पुगेका पार्टी महाधिवेशन प्रतिनिधि ढुंगानालाई नियुक्ति गरेको भन्दै असन्तुष्टि जनाएका हुन् ।

यता नेता रामचन्द्र पौडेल र पूर्वमहामन्त्री प्रकाशमान सिंहले मनोज वैद्यलाई महामन्त्री बनाएकोमा रूष्ट भएका छन् । काठमाडौं नेविसंघ अध्यक्ष वैद्य पदमा निर्वाचित हुँदा पूर्वमहामन्त्री सिंहको समूहमा थिए ।

विधानमा महामन्त्री दुई जना मात्र हुने व्यवस्था छ । तर, सभापति देउवाले धेरै नेताका आकांक्षीलाई खुसी बनाउने उद्देश्यले ९ जना महामन्त्री बनाउने सहमति हुनुपर्ने बल गरेका थिए । जसअनुसार देउवाले आफूले ३ जना, पौडेलाई ३ जना, सिटौलालाई २ र उपसभापति विजयकुमार गच्छदार समूहकालाई १ गरी ९ जना महामन्त्री बनाउने सहमति भएको थियो ।

नेविसंघको तदर्थ समितिमा पर्न पार्टी शीर्षनेतासँग ४० वर्ष उमेर कटेका युवाहरूले आकांक्षा देखाएका छन् । नेविसंघमा अध्यक्षपछि प्रभावशाली पदको रूपमा रहेको महामन्त्रीमा धेरैले आकांक्षा देखाएका छन् । यसरी महामन्त्रीको दाबी गर्नेहरूमा केही आंशिक प्राध्यापकहरूसमेत रहेका छन् ।

सिटौला पक्षमा महामन्त्रीमा खासै विवाद देखिँदैन तर संस्थापन र पौडेल समूहमा आकांक्षीको व्यवस्थापनमा कठिन देखिएको छ । केन्द्रीय कार्यसमितिको बैठकले नेविसंघको नयाँ केन्द्रीय समिति घोषणा गर्ने योजना भए पनि सबै पदाधिकारी र सदस्यको नाम उपलब्ध हुन नसकेपछि घोषणा हुन सकेको थिएन ।

संस्थापन पक्षबाट महामन्त्रीको आकांक्षीमा शुभराम बस्नेत, सञ्जय यादव, डुुजाङ शेर्पा, मनिष सिजापति, प्रेमराज जोशी, पुष्पबहादुर शाहीलगायत रहेका छन् । कुँवर र वैद्य महामन्त्रीमा नियुक्त भइसकेका छन् ।

काठमाडौँ नेविसंघका अध्यक्षसमेत रहेका वैद्य हाल पौडेल समूहका नेता प्रकाशमान सिंहको गुट परित्याग गरी संस्थापन पक्षमा गएका थिए भने शेर्पा सिटौला समूह छाडेर झण्डै १० महिनाअघि संस्थापन पक्षतिर लागेका थिए ।

यता पौडेल समूहबाट हिमालदत्त श्रेष्ठ, विष्णु पौडेल, दीपक भट्टराई, मनहरी श्रेष्ठ, मोति भण्डारी, यूपी लामिछाने, लीलावल्लव दाहाल, विनयराम भट्ट, उर्मिला थपलिया, सागर परियार, नीलकण्ठ रिजाल, प्रकाश महर्जनले महामन्त्रीमा दाबी गरेका छन् ।

सिटौला पक्षबाट युवराज पाण्डे र बलदेव तिमल्सिना महामन्त्री हुने लगभग पक्का भएको छ ।

संस्थापन र पौडेल समूहमा ३/३ जनाको नाममा सहमति जुटाउन नेताहरूलाई फलामको चिउरा जस्तै भएको छ । संस्थापन पक्ष र पौडेल समूहमा रहेका उपगुट र प्रभावशाली नेताका कारण पदाधिकारीमा दाबी गर्नेको संख्या बढी भएको हो ।

संस्थापन पक्षले सहमतिको नाममा सबै विद्यार्थीलाई खुसी पार्ने रणनीति अपनाउन थालेको छ । पौडेल पक्षमा भने नेतैपिच्छेका महामन्त्रीका आकांक्षी देखिएका छन् ।

नेविसंघमा पौडेल पक्ष नै सधैं हावी हुने गरेको आकांक्षीहरूलाई व्यवस्थापन गर्न गाह्रो देखिएको स्रोतले जनायो । पौडेल समूहबाट दाबी गरिरहेका दीपक भट्टराई र विनयराम भट्ट त्रिचन्द्र क्याम्पसबाटै राजनीति गरी हाल सोही क्याम्पसका आंशिक प्राध्यापनसमेत गर्छन् । उनीहरूसँगै अन्य आकांक्षीहरू हाल कलेजका विद्यार्थी रहेका र ४० वर्ष उमेर कटेका बढी छन् ।

स्ववियू निर्वाचनमा असर पर्न सक्ने गरी समिति आएमा नेविसंघ र पार्टीलाई नै ठूलो घाटा हुने हुँदा त्यतातर्फ ध्यान दिनसमेत विद्यार्थीहरूले नेतृत्वलाई सचेत गराएका छन् ।

त्रिचन्द्र कलेजमा विष्णु पौडेल, शंकरदेव कलेजमा शुभराम बस्नेत, पशुपति कलेजमा मनोज वैद्य, पद्यकन्यामा महेश्वरी कँुवर, पाटन क्याम्पसमा अनिल खनालविना स्ववियू चुनाव जित्न नसकिने पनि कतिपय नेताले निष्कर्ष निकालेका छन् ।

प्रकाशित मिति: बिहीबार, माघ १६, २०७६ १८:११