अढाइ करोड धरौटी राखेका ३ म्यानपावरले ठगे ४ करोड

A+ A A-

वैदेशिक रोजगारीका नाममा हुने ठगी नियन्त्रण गर्न सरकारले कडाइ गरे पनि श्रमिक ठगिने क्रम भने रोकिएको छैन ।

खाडीका देश र मलेसिया मात्रै होइन, रोजगारीका लागि युरोप र अमेरिकी देश पठाइदिने भन्दै कतिपय म्यानपावर कम्पनीले श्रमिकबाट पैसा असुल्ने गरेका छन् । नियामक वैदेशिक रोजगार विभागमा म्यानपावरले ठगेको भन्दै दैनिक उजुरी लिएर आउनेको घुइँचो लाग्ने गरेको छ ।

वैदेशिक रोजगारीमा श्रमिक आपूर्ति गर्न लाइसेन्स लिएका म्यानपावर कम्पनीले श्रमिकबाट करोडभन्दा धेरै रकम ठगी गरेका हुन् । कामदार भिसामा युरोपेली मुलुकहरू पोर्चुगल, माल्टा, बेल्जियम, जर्मनी, एसियाका जापान, कोरिया तथा अफ्रिकाका विभिन्न मुलुक पठाइदिने भनेर म्यानपावर र एजेन्टले श्रमिकबाट रकम असुल्ने क्रम बढ्दो छ ।

काठमाडौंको बी एण्ड बी एचआर प्रालि (१४१८) म्यानपावर कम्पनीले घाना, जापान, पोर्चुगल, मोरिसस र खाडीका देश पठाइदिने भन्दै ७० जनाभन्दा बढी युवाको २ करोड २१ लाख रुपैयाँ ठगी गरेको उजुरी आएको विभागको मुद्दा शाखाले जनाएको छ ।

यो म्यानपावरका सञ्चालक ४ जना रहेको विभागले जनाएको छ । पीडित भनिएकाहरूले विभागमा दिएको उजुरीअनुसार, अजय तामाङ, मेघराज दाहाल, डिल्लीराम दाहाल र अजयकुमार मगरले रोजगारीको प्रलोभन देखाई पैसा असुलेका हुन् ।

म्यानपावरका सञ्चालकहरूले प्रतिव्यक्ति ३ लाख रुपैयाँसम्म असुलेको प्रमाण विभागलाई प्राप्त भएको मुद्दा शाखाका एक अधिकारीले जानकारी दिए ।

यसैगरी, काठमाडौंकै दीपज्योती ओभरर्सिज प्रालि (६५२)विरुद्ध पनि विभागमा उजुरी परेको छ । जापान, क्यानडा र अफ्रिकी देश पठाइदिने भन्दै वैदेशिक रोजगारीमा जान चाहने व्यक्तिहरूको उक्त म्यानपावरले १ करोडभन्दा बढी रकम ठगी गरेको उजुरीमा उल्लेख छ ।

यो म्यानपावर कम्पनी सम्झना बस्नेतले सञ्चालन गरिरहेकी छन् । उनले करिब ४० जनाबाट प्रतिव्यक्ति २ लाख लिएको उजुरी परेको विभागले जनाएको छ । पैसा फिर्ता माग्दा बस्नेतले हप्कीदप्की गर्ने तथा धम्की दिने गरेको पीडितहरूले बताएका छन् ।

यसैगरी, कालीकोट ओभरर्सिजले पोचुर्गल र अफ्रिकी देशमा राम्रो काम छ भन्दै ३० भन्दा बढी युवाबाट १ करोड १० लाख रुपैयाँ ठगी गरेको उजुरी दर्ता भएको विभागले जनाएको छ । यो म्यानपावरविरुद्ध ७० भन्दा बढी उजुरी विभागमा दर्ता छन् ।

यी तीन म्यानपावर कम्पनीले अन्य युवाको पनि पैसा ठगी गरेको हुन सक्ने विभागको अनुमान छ । कतिपय पीडित भने धाकधम्की र लोकलाजका कारण उजुरी गर्दैनन् ।

धरौटीभन्दा बढी ठगी

म्यानपावरले विभागमा ५० लाख नगद र १ करोड ५० लाख रुपैयाँ बैंक ग्यारेन्टी गरी २ करोड धरौटी राखेका छन् । तर, यी म्यानपावरले राखेको धरौटी रकमले ठगिएका पीडितलाई बिगो भराउन नपुग्ने विभागले जनाएको छ । अब धरौटी रकमबाट बिगो तिर्ने नपुत्यसले नपुगे सञ्चालकको जयजेथाबाट भए पनि ती कम्पनीबाट पीडितलाई क्षतिपूर्ति भराउने विभागको तयारी छ ।

विभागका सूचना अधिकारी भोला गुरागाईं वैदेशिक रोजगारीको प्रलोभन देखाएर ठग्ने र प्रलोभनमा पर्ने दुवै पक्षमा समस्या देखिएको बताउँछन् ।

‘रोजगारीका लागि विदेश जाने योजना बनाएका व्यक्तिले कसरी जाने, कहाँ जाने, कस्तो काममा जाने भन्ने विषयको जानकारी नलिँदा ठगिन्छन् । ठग्ने उद्देश्य राखेका म्यानपावर यस्तै व्यक्तिको खोजीमा हुन्छन्,’ उनले भने, ‘रोजगारीमा जानुअघि सम्बन्धित निकायसँग जानकारी लिन विभागले रोजगारीको खोजीमा रहेका युवालाई पटक–पटक सूचनामार्फत सूचित गराउँदै आएको छ तर श्रमिकले वास्ता गर्दैनन् ।’

म्यानपावरबाट ठगिएको भन्दै मासिक ७० जनाभन्दा बढी पीडित विभाग धाउने गरेका छन् । एजेन्टबाट ठगीएमा पीडितहरूले झन् धेरै दुःख पाउने गरेका छन् । किनकि, एजेन्टका बारेमा उनीहरू बेखर हुन्छन् । वैदेशिक रोजगार ऐनमा यसरी ठूलो रकम ठगी गर्ने म्यानपावरलाई खारेज गर्न सक्ने कानुनी व्यवस्था छ । तर, विभागले धेरै रकम ठगी गर्ने म्यानपावरलाई खारेज गर्न सकेको छैन ।

प्रकाशित मिति: बिहीबार, माघ १६, २०७६ १३:१६