अहमदको हत्यामा संलग्न दुल्लामिँया काँकडभिट्टा नाकाबाट पक्राउ

A+ A A-

बंगलादेशका नागरिक मोहिद्दिन अहमदको हत्यामा संलग्न उनका साथी नौं दिनपछि भारत भाग्दै गर्दा काँकडभिट्टा नाकाबाट पक्राउ परेका छन् । महनगरीय प्रहरी परिसरबाट खटिएको टोलीले दुल्लामिँया नाम गरेका अहमदका साथीलाई हत्यामा संलग्न भएको आरोपमा पक्राउ गरेको हो ।

बुधबार राति झापाको काँकडभिट्टा नाका हुँदै भारत जाँदै गरेको अवस्थामा नियन्त्रणमा लिइएको महानगरीय प्रहरी परिसर काठमाडौंले जनाएको छ । पक्राउ परेका दुल्लामिँयालाई आजै काठमाडौं ल्याएर सार्वजनिक गरिने प्रहरीले बताएको छ ।

काठमाडौं क्यासिनाको नियमित ग्राहक ४५ वर्षीया मोहिद्दिन अमहद ढाँकाबाटै जुवा खेल्न काठमाडौं आउँथे । ६ माघमा पछिल्लो पटक उनी जुवा खेल्न काठमाडौं आएका थिए ।

उनी सँधै सोल्टीमोडस्थित होटल ग्राण्ड भिल्लामै बस्थे । सात गते क्यासिनो जाने योजना बनाएका अहमदले एक्लै भएको महशुस गरी बंगलादेशबाटै उनका साथी दुल्लामियाँलाई बोलाएका थिए । तर उनले भोलीपल्ट क्यासिनो जान बनाएको योजना भने सफल हुन सकेन । सात गते दिउँसो उनको हत्या भयो ।

जसलाई काठमाडौं बोलाएर क्यासिनोमा रमाइलो गर्ने योजना बनाएका थिए । उनै साथीले अहमदको हत्या गरे । हत्या गरेपछि दुल्लामिँया फरार भएका थिए । तर होटलले भने ८ गते मात्र प्रहरीलाई खबर गरेको थियो ।

दुल्लामिँयाले ह्वीस्कीको बोतलले टाउँको र घाँटीमा हानेर हत्या गरेको प्रहरीले जनाएको छ । सीसीटिभी फुटेजका आधारमा अनुसन्धान गरिरहेको प्रहरीले उनी भारत भाग्न लागेको जानकारी पाएपछि सीमा नाकामा सुरक्षा व्यवस्था कडा पारेको थियो । पक्राउ परेका मिँयालाई आजै काठमाडौं ल्याएर सार्वजनिक गर्ने प्रहरीले तयारी गरेको छ ।

प्रकाशित मिति: बिहीबार, माघ १६, २०७६ ०७:५१