क्यासिनोका नियमित ग्राहक मोहिद्दिनको होटल ग्राण्ड भिल्लामा हत्या

A+ A A-

बंगलादेशको राजधानी ढाकाका ४५ वर्षीय मोहिद्दिन अहमद काठमाडौँका क्यासिनोका नियमित ग्राहक थिए । उनी क्यासिनोमा जुवा खेल्ल ढाकाबाट सधैँजसो काठमाडौँ आउने गर्थे ।

ढाकामै ओसियन ट्राभर्स सञ्चालन गरेका मोहिद्दिन एक हप्ताअघि अर्थात् ६ माघमा पनि काठमाडौँ आए । आउनुको उद्देश्य थियो क्यासिनो पसेर जुवा खेल्ने ।

ढाका विमानस्थल हुँदै मोहिद्दिन हिमालयन एयरलाइन्सको फ्लाइटबाट ६ माघको साँझ काठमाडौँस्थित त्रिभुवन अन्तर्राष्ट्रिय विमानस्थल ओर्लिए । विमानस्थलमा ट्याक्सी बुक गरे । सिधै सोल्टीमोडस्थित होटल ग्राण्ड भिल्ला पुगे । ग्राण्ड भिल्लाका उनी नियमित ग्राहक थिए ।

काठमाडौँका क्यासिनोमा जुवा खेल्न आउँदा उनी त्यहीँ बस्थे । यसपटक पुगेकै राति ६ माघमा क्यासिनो छिर्न नपाएका उनी भोलिपल्ट अर्थात् ७ माघमा क्यासिनो जाने योजनामा थिए ।

क्यासिनो खेल्नकै लागि यो पालि बंगलादेशबाट उनले एक जना दुल्लामियाँ नामका साथीसमेत ल्याएका थिए । होटलमा उनै मियाँको नामबाट १ सय १४ नम्बरको कोठा बुक गरिएको थियो ।

क्यासिनो छिर्नु अघिनै हत्या

क्यासिनोमा जुवा खेल्ने उद्देश्यले काठमाडौँ आइपुगेका मोहिद्दिनलाई अर्कै नियतिले कुरिरहेको थियो । अर्थात्, कसैले उनको हत्या गर्ने योजना बनाइसकेको थियो । उनलाई यो कुरा थाहै थिएन ।

सोल्टीमोडस्थित ग्राण्ड भिल्ला होटलको १ सय १४ नम्बर कोठामा कसैले उनको हत्या गर्याे । ६ माघमा काठमाडौँ आइपुगेका उनको ७ माघको दिउँसो हत्या भएको खुलेको महानगरीय प्रहरी वृत्त कालिमाटीका प्रमुख प्रहरी नायव उपरीक्षक (डीसएपी) रुगम कुवँरले जानकारी दिए

कुँवरका अनुसार उनको हत्या उनीसँगै आएका उनका साथी दुल्लामियाँले गरेका हुन् ।

‘मोहिद्दिनको हत्या उनकै साथी दुल्लामियाँले ह्वीस्कीको बोतलले टाउको र घाँटीमा हानेर गरेको खुलेको छ,’ डीएसपी कुवँरले भने, ‘हत्या भएको सूचना ढिलो गरी पाउँदा दुल्लामियाँ हत्यापछि वीरगञ्जहुँदै भारत भागिसकेका छन् ।’

होटलका सञ्चालकले मोहिद्दिनको हत्या भएको सूचना ८ माघमा मात्रै प्रहरीलाई गरेका थिए ।

सूचना पाउनासाथ अनुसन्धान थालेको प्रहरीले पछि थाहा पायो, हत्यामा मोहिद्दिनकै साथीको हात छ । यद्यपि, हत्यापछि दुल्लामियाँ सोल्टीमोड हुँदै वाफल, कलंकीबाट वीरजंग जाने बस चढेर भारत भागेको सीसीटीभी फुटेजले देखाएको छ ।

यसअघि मोहिद्दिनबारे अनुसन्धान गर्न प्रहरी विभिन्न क्यासिनो पुगेको थियो । अनुसन्धानका क्रममा प्रहरीले उनी मल्ल होटलको क्यासिनो बेलिज, होटल ¥याडिसनको ¥याड र सोल्टी होटलको महाजोङ क्यासिनोको नियमित ग्राहक भएको पत्ता लगायो ।

हत्यारा फरार रहेका कारण किन हत्या गरे भन्ने विषयबारे केही नखुलेको डीएसपी कुँवरको भनाइ छ । मोहिद्दिनको हत्यापछि उनको साथबाट प्रहरीले ७ हजार नेपाली रुपैयाँ र २४ डलर मात्र फेला पारेको छ ।

मोहिद्दिनको शव प्रहरीले पोस्टमार्टमपछि नेपालस्थित बंलादेशको दूतावासमार्फत उनका आफन्तलाई बुझाइसकेको छ ।

प्रकाशित मिति: बुधबार, माघ १५, २०७६ १९:०४