घर चिटिक्क पार्ने यी तरिका

A+ A A-

घर सजाउने रहर त कसलाई पो हुँदैन र ? घरलाई सफा, चिटिक्क, मिलेका फर्निचर, आकर्षक सजावट बनाउनु सबैको रहर हुन्छ । तर यो रहरलाई पूरा गर्न खर्च पनि हुन्छ । घर सजाउनका लागि समय र पैसा दुवै चाहिन्छ ।

समयको त हामी जसरी पनि व्यवस्थापन गर्न सक्छौं तर पैसा भने चाहेको समयमा नहुन पनि सक्छ । त्यसैले रहर भए पनि कति कामहरु हामी पूरा गर्न सक्दैनौं ।

त्यस्तैमा एक हो घरको सजावट । तर, यी कुराहरुमा ध्यान दिनुभयो भने घर सजाउने तपाईंको रहर पूरा गर्न सक्नुहुनेछ ।

घरको भित्तामा पेन्टिङ

आफ्नो घरको भित्तामा विभिन्न किसिमका डिजाइन बनाउन सक्नुहुन्छ । डिजाइन बनाउने भनेर घरको सबै भित्तामा बुट्टाहरु राख्नु हुँदैन । यसले कोठा झन् फोहोर देखिन्छ । त्यसैले घरको कुनै एक अथवा दुईवटा भित्ताहरुमा मात्र हल्का डिजाइन बनाउनुपर्छ । यसले तपाईंको घरलाई आकर्षक बनाउँछ ।

बत्तीको प्रयोग

घरमा आवश्यक अनुसार बत्ती राख्नुपर्छ । आवश्यकभन्दा बढी अथवा कम बत्तीले घरको सुन्दरतामा नकारात्मक असर पुर्‍याउँछ । तपाईं थाकेर आउँदा आराम गर्ने ठाउँको बत्तीले आँखालाई शान्ति दिने हुनुपर्छ । त्यसैले बत्तीको प्रयोग सोचेर गर्नुस् ।

पुराना फर्निचरको पुन: प्रयोग

घरमा भएका पुराना फर्नीचरलाई तपाईं पुन: प्रयोग गरेर पनि घरको सजावट गर्न सक्नुहुन्छ । जस्तै, तपाईंको स्टुल प्वाल परेको छ भने त्यसमाथि ट्रे राखेर त्यो प्वाललाई छोप्न सक्नुहुन्छ । ट्रेमाथि ल्याम्प, स्ट्यान्ड भएको घडी अथवा फुलदानी राखेर प्वाल परेको स्टुललाई पुनः प्रयोगमा ल्याउन सक्नुहुन्छ ।

प्लेटको प्रयोग

प्लेटको प्रयोग खाना खानुबाहेक घरको भित्ताहरु सजाउनका लागि पनि गर्न सक्छौं । घरमा भएका प्लेटहरुलाई स्ट्यान्ड अथवा स्टोरमा थन्काउनुभन्दा घरको खाली भित्तामा वायर प्लेट ह्याङ्गरको सहायताले टाँग्न सकिन्छ । तपाईंको सानो मेहनतले घरको खाली भित्ता सुन्दर र आकर्षक देखिन्छ ।

बिरुवाको प्रयोग

प्राकृतिक कुराले सबैलाई लोभ्याउँछ । घरमा विभिन्न किसिमका रुखविरुवाले सजावट गर्न सकिन्छ, जसले घरलाई आकर्षक त देखाउँछ नै तपाईंको स्वस्थको लागि पनि लाभदायक हुन्छ ।

प्रकाशित मिति: बुधबार, माघ १५, २०७६ १८:१५