लुम्बिनी सिड कम्पनीले पायाे बिउ प्रशोधन कारखाना प्रमाणित नम्बर

A+ A A-

२०५९ साल भदौ महिनामा स्थापना भएको लुम्बिनी सिड कम्पनीले नेपालमै सबैभन्दा बढी हाइब्रिड मकैको बिउ उत्पादन गर्न सफल भएको छ । बिउ उत्पादन, प्रशोधन, भण्डारण र बजारीकरणमा काम गर्दै आएको कम्पनीले नेपाल सरकारबाट बिउ प्रशोधन कारखाना प्रमाणित नम्बरसमेत प्राप्त गरिसकेको छ ।

तराई क्षेत्रको रुपन्देहीको तिलोत्तमा नगरपालिका– ७, जहदा भलवारी र पहाडी क्षेत्र अर्घाखाँची जिल्लाको छत्रदेव गाउँपालिका–४, मथुरामा कम्पनीले बिउ उत्पादनको कार्य गर्दै आएको छ । कम्पनीको बिउ उत्पादन कार्यमा तराईमा कुल १२ सय र पहाडी क्षेत्रमा ६ सय किसान प्रत्यक्ष रूपमा संलग्न रहेको कम्पनीले जनाएको छ ।

कम्पनीले निर्माण गरेको अत्याधुनिक प्रयोशालाबाट परीक्षण भई प्रमाणीकरणको चरणमा ६ वटा नयाँ हाइब्रिड जातका बिउ बजारमा ल्याएको छ । कम्पनीका अध्यक्ष तथा कृषिविज्ञ सुवासराज उपाध्यायका अनुसार हाइब्रिड कमैको ३ वटा मौसममा चेक गरी ३ वटाको १, १ वटा जात कम्पनीको नाममा दर्ता भएको छ ।

कम्पनीले मायादेवी गाउँपालिका– ७, मतकोलवा हाइब्रिड कमैको सफल परीक्षण गरिसकेको छ । जसमा मेक्सिकन, कोलम्बियाका, एटीएमए हैदरावाद र नेपाली हाइब्रिड मकै–रामपुर हाइब्रिड–१० को सफल परीक्षण गरेको हो ।

सफल परीक्षण भएका बिउका विशेषताहरू

– मेक्सिकनः पहेँलो, सेतो, जिक बढी भएको जात
– कोलम्बियाः पहेँलो, सेतो, बढी प्रोटिन भएको जात,
– एचटीएमए हैदरावादः बढी तापक्रम सहने जात ।

तिनीहरुको भालेपोथी उपलब्ध र हाइब्रिड (एफ १) बिउ कम्पनीले तयार गरी बजारमा ल्याएको छ । नेपाली हाइब्रिड मकै – रामपुर हाइब्रिड– १० को परीक्षण सफल बिउबाट ८.०–१० मेट/हे. उत्पादन प्राप्त गर्न सकिने कृषिविज्ञ तथा कम्पनीका अध्यक्ष उपाध्ययाले जानकारी दिए ।

यस्तै, कम्पनीले नेपाली हाइब्रिड धान हर्दिनाथ हाइब्रिड–१ को पनि सफल परीक्षण गरेको छ । हाइब्रिड तरकारीको परीक्षण (प्याज, फुलगोबी र टमाटर) अन्तर्गत टमाटरका ६ वटा ईए जातमा बिउ उत्पादनको कार्य रुकुम पश्चिममा सुरु भएको छ ।

यस्तै, कम्पनीले जातीय सम्वद्र्धनमा धानबालीमा ९ वटा नेपाली उत्कृष्ट ओपी जातका– १५०० बालाबाट १ मेट शुद्ध बिउ पुनः बिउ उत्पादनका लागि तयार गरेको छ भने गहुँ बालीमा ११ वटा नेपाली ओपी जातका ५ हजार बालाबाट २.० मेट शुद्ध बिउ पुनः बिउ उत्पादन गरेको छ ।

यस्तै, कम्पनीले धान बालीमा १४ जना कृषकलाई ५ प्रतिशत छुट गरी ६ प्रतिशत ब्याजदरमा कम्पनीको सिफारिसमा १० लाख ऋण प्रभाव गर्न सफल भएको छ भने सस्तो ब्याजमा ऋण उपलब्ध भएका कृषकको बिउ बाली बीमा पनि गरेको छ ।

लुम्बिनी सिड कम्पनीका प्रबन्ध सञ्चालक भीमनारायण चौधरीका अनुसार जातीय विकास र सम्वर्द्धन, रोजेको, खोजेको जात उपभोक्तालाई उपलब्धता गराउने, उच्च गुणस्तरीय बिउको उत्पादन गर्ने कार्य कम्पनीले गर्दै आएको छ ।

कम्पनीले बढी उत्पादन दिने गुणस्तरीय बिउ समयमा प्रतिस्पर्धी मूल्यमा उपलब्ध गराउँदै आएको छ । विदेशी हाइब्रिड बिउलाई विस्थापित गरी नेपाली हाइब्रिड बिउ उत्पादन व्यापक गरी निर्यात गर्ने कम्पनीको मुख्य उद्देश्य रहेको कम्पनीको दाबी छ ।

प्रकाशित मिति: मंगलबार, माघ १४, २०७६ १९:३०