विप्लव नेतृत्वकाे नेकपा फेरि सक्रिय हुँदै, फागुन १ मा शक्ति प्रदर्शनको तयारी

विप्लव नेतृत्वकाे नेकपा फेरि सक्रिय हुँदै, फागुन १ मा शक्ति प्रदर्शनको तयारी

A+ A A-

नेत्रविक्रम चन्द ‘विप्लव’ नेतृत्वको प्रतिबन्धित नेपाल कम्युनिस्ट पार्टी फेरि सक्रिय हुन थालेको छ । १२ जेठमा उपत्यकाको सुकेधारा र घट्टेकुलोमा भएको विस्फोटनमा आफ्नै कार्यकर्ता गुमाएपछि केही निष्क्रिय देखिएको सो पार्टीको गतिविधि माघ लागेदेखि नै सक्रिय हुन थालेको हो ।

१ माघमा वनस्थलीका शोभाकान्त ढकालको घरमा बम विस्फोट गराएको विप्लव समूहले आइतबार राति एकै पटक मकवानपुर, चितवन, सिन्धुली र रामेछापका एनसेल टावरमा समेत आगजनी गरेको छ ।

त्यसरी नै सोमबार विराटनगरस्थित नेसनल मेडिकल कलेजका सञ्चालक बसरुद्दिन अन्सारीको घरमा बम राख्ने पनि विप्लव समूहका कार्यकर्ता नै रहेको सुरक्षा निकायहरूको दाबी छ ।

वनस्थलीका ढकाल बालुवाटारस्थित ललिता निवासको जग्गा प्रकरणमा मुछिएका व्यक्ति हुन् । १ माघयतादेखि नै उपत्यकालगायतका विभिन्न जिल्लामा शृंखलाबद्ध तरिकाले बम विस्फोट र आगजनीका घटनाले विप्लव केही सक्रिय हुन खोजेको अनुमान सुरक्षा निकायहरूको छ ।

तर, गृहमन्त्री रामबहरादुर थापाले भने विप्लव समूह कमजोर भएको दाबी गरेका छन् । विप्लव समूहबाट बढी प्रभावित प्रदेश कर्णालीको सुर्खेतमा शनिबार भएको सुरक्षा गोष्ठीमा विप्लव समूह कमजोर भएको भन्दै अब आतंकित पार्ने खालको कुनै गतिविधि गर्न नसक्ने दाबी गरेका थिए ।

उनको जवाफ आएको एक दिन नबित्दै आइतबार विभिन्न जिल्लामा गरेको एनसेल टावरमाथिको आगजनी र सोमबार विराटनगरमा राखेको बमले दिएको विप्लव समूहको भनाइ छ ।

सरकारले विप्लव नेकपा विभिन्न ध्वंसात्मक गतिविधिमा संलग्न रहेको भन्दै करिब एक वर्षअघि २८ फागुनमा उसका गतिविधिमा प्रतिबन्ध लगाएको थियो । त्यसपछि सरकारप्रति आक्रामक रूपमा प्रस्तुत भएको विप्लव नेकपाले ठाउँठाउँमा बम विस्फोट र नेपाल बन्दको आह्वान गर्दै आएको छ ।

यसबीचमा विप्लवका ८ जना कार्यकताले ज्यानसमेत गुमाएका छन् । १ हजार बढी नेता, कार्यकर्ता प्रहरी थुना र कारागार चलान भएका छन् । प्रहरीतर्फसमेत १ जनाको क्षति भएको छ । विप्लव समूहको गोली लागेर भोजपुरमा १ जना प्रहरी जवानको ज्यान गएको हो ।

शक्ति सञ्चय गर्दै अगाडि बढ्ने रणनीति

हजारौं कार्यकर्ता र सयौं नेता पक्राउ परेपछि विप्लव समूह केही कमजोर भएको छ । आफ्ना नेता, कार्यकर्ता छुटाउन विप्लव समूह यसअघि केही नरम भएर सरकारसँग वार्ताको तयारीमा पनि लागेको थियो । तर, सरकारले विप्लवका कार्यकर्ता रिहा गर्न नमानेपछि वार्ताको वातावरण बिग्रिएको विप्लव समूहको भनाइ छ ।

त्यसयता भने विप्लव समूह शक्ति सञ्चय गर्दै आक्रामक ढंगले उत्रिने योजनामा रहेको अनुमान विप्लवबारे जानकार केही उच्च सुरक्षा अधिकारीहरू बताउँछन् ।

यसका लागि भित्री रूपमा विप्लव समूह चन्दा संकलनमा समेत सक्रिय रहेको प्रहरीको बुझाइ छ । त्यस्तै, हतियारबारे ज्ञान भएका जनशक्तिलाई पनि विप्लवले सक्रिय पारेको अनुमान छ । यसका लागि उनीहरूले चुरे आसपासको जंगललाई रोज्ने गरेको सूचना सुरक्षा निकायसँग छ ।

१ फागुनको ‘टार्गेट’

विप्लव समूहले १ फागुनमा शक्ति प्रदर्शन गर्ने तयारी गरेको सूचनासमेत प्रहरीलाई पुगेको छ । तत्कालीन पुष्पकमल दाहाल (प्रचण्ड) नेतृत्वले सुरु गरेको १० वर्षे जनयुद्ध १ फागुन २०५२ बाट सुरु भएको थियो ।

त्यसको महत्त्वपूर्ण सदस्य विप्लवसमेत थिए । त्यही दिनलाई विप्लवले पनि जनयुद्ध दिवसका रूपमा मनाउँदै आएको छ । प्रचण्ड नेतृत्वले गोरखा, सिन्धुली रुकुमलगायत ४ जिल्लामा आक्रमण गरेर युद्ध सुरु गरेको थियो । सोही दिनलाई ऐतिहासिक दिन भन्दै विप्लव समूहले आफ्नो शक्ति प्रदर्शन गर्न लागेको हो ।

‘१ फागुनमा विप्लव समूहले उपत्यकालगायत देशका अन्य शहरहरूमा शक्ति प्रदर्शन गर्ने योजना बनाएको सूचना सुरक्षा निकायमा छ’, एक सुरक्षा अधिकारीले भने, ‘त्यो योजना सफल हुन दिँदैनौं ।’

विप्लवले १ फागुनमा शक्ति प्रदर्शन गर्ने सूचना पाएसँगै उपत्यकालगायत सबै जिल्लाका प्रहरी र अन्य सुरक्षा संयन्त्रलाई समेत सरकारले सक्रिय पारेको छ । शक्ति प्रदर्शन गर्ने सूचना पाएको सुरक्षा निकाय उनीहरूले के गर्न सक्छन् ? भन्ने विश्लेषणमा समेत जुटेका छन् ।

त्यसका लागि विप्लवको गतिविधिको सूचना संकलनमा नेपाली सेनाको इटेन्लिजेन्स (डीजीएमआई), राष्ट्रिय अनुसन्धान विभाग र सशस्त्र प्रहरी बलसमेत सक्रिय भएर लागेका छन् । सुरक्षा निकायलाई प्राप्त सूचनाअनुसार विप्लव पश्चिम नेपालमा बसेर पार्टीको गतिविधि चलाउँदै आएका छन् ।