९ अर्ब खर्चेर गण्डकी सरकारले ल्याउँदै छ २ सय ५० चिनियाँ गाई

A+ A A-

गण्डकी प्रदेश सरकारले पब्लिक लिमिटेड कम्पनी बनाएर चिनियाँ गाई खरिद गर्ने भएको छ । प्रदेशलाई दूधमा आत्मनिर्भर बनाउने उद्देश्यले प्रदेश सरकारले चिनियाँ गाई ल्याएर विभिन्न ठाउँहरूमा गाई फार्म सञ्चालन गर्ने योजना अगाडि बढाएको छ ।

११ करोड लगानीमध्ये सरकारले ५१ प्रतिशत सेयर राख्ने र बाँकी ४९ प्रतिशत सर्वसाधारण कृषकलाई सहभागी गराउने गरी योजना अगाडि बढाएको छ । सरकारले ‘गण्डकी काउ फार्म एण्ड रिसर्च सेन्टर’ प्रालि कम्पनी खोलेर चिनियाँ गाई ल्याएर प्रदेशका विभिन्न स्थानमा गाई फार्म सञ्चालन गर्ने योजना अगाडि बढाएको गण्डकी प्रदेशका भौतिक योजनामन्त्री एवं सरकारका प्रवक्ता रामशरण बस्नेतले जानकारी दिए ।

सरकारले सर्वसाधारणका लागि छुट्याएको ४९ प्रतिशत सेयरको छिट्टै आवेदन खुला गरिने उनले बताए । ‘कम्पनीमार्फत आवेदन गरिने सेयर पब्लिक सेयर हुनेछ । सरकारले लगानी गर्ने ५१ प्रतिशत सेयर रकम भूमि व्यवस्था कृषि तथा सहकारी मन्त्रालयको नाममा आर्थिक मामिला तथा योजना मन्त्रालयले निकासा गर्नेछ’, उनले भने ।

सरकारले दुग्ध विकास बोर्डमार्फत आवश्यक प्रक्रिया अगाडि बढाउनेछ । बोर्डमा सरकारले डा. गृष्म न्यौपानेलाई सदस्यसचिव नियुक्त गरिसकेको छ । फार्म सञ्चालनमा समेत सरकारले किसानलाई सेयरहोल्डर बनाउने गरी कार्ययोजना बनाएको छ । फार्ममा उत्पादन भई बढी भएका गाई चिनियाँ सरकारले नै लैजाने समझदारी भएको भूमि व्यवस्था, कृषि तथा सहकारीमन्त्री लेखबहादुर थापाले बताए ।

‘चीनले दूधको सट्टा दुग्धजन्य पदार्थ नेपालबाट लिनेछ,’ थापाले भने, ‘दूधबाट पनि दुग्धजन्य परिकार बनाएर बिक्री गरिनेछ ।’ उत्पादित दूध खपत नभएर मिल्क होलिडे हुने अवस्था आएमा प्रदेशले त्यसको विकल्पमा पाउडर उद्योग खोल्नेछ । मन्त्री थापाका अनुसार खपत नभएकाे दूधबाट चिज, छुर्पीलगायतका दुग्धजन्य पदार्थ बनाइनेछ ।

मोडेल फार्म र उद्योगबाट सुरुमा नै कम्तिमा १ हजार ५ सय जनाले रोजगारी पाउने मन्त्री थापाले बताए । गर्भाधानबाट जन्मिएका बाच्छाबाच्छीहरू कृषकलाई वितरण गर्ने योजना रहेको उनको भनाइ छ । प्रदेश सरकारको यस योजनामा चिनियाँ सहयोग रहनेछ । चाइना एकेडेमी अफ एग्रिकल्चर मोडर्नाइजेसन साइन्स (सीएएएमएस) ले गण्डकी प्रदेशसहित प्रदेश नम्बर २ र ३ मा १० हजार उन्नत जातको होलिष्ट गाई अनुदानमा दिनेछ ।

गण्डकी प्रदेशले चालू आर्थिक वर्षको नीति तथा कार्यक्रममार्फत उन्नत जातका गाईमार्फत दूधमा आत्मनिर्भर बन्ने लक्ष्य लिएको छ । सोही लक्ष्यअनुसार चिनियाँ कम्पनीसँग सम्झौतापत्रमा हस्ताक्षर भएको थियो । गण्डकीमा ४ हजार गाई ल्याउने योजना भए पनि पहिलो चरणमा साढे २ सय मात्र गाई ल्याइने मन्त्री थापाले बताए ।

सुरुमा साढे २ सय गाई परीक्षणस्वरुप भित्र्याइने भए पनि प्रदेशमा ४ हजारसम्म गाई ल्याउने सरकारको योजना छ । तीन प्रदेशमा ३२ अर्ब र गण्डकी प्रदेशमा मात्रै ९ अर्बको लगानीमा यस परियोजना सञ्चालन हुनेछ ।

प्रकाशित मिति: आइतबार, माघ १२, २०७६ ११:५८