सुर्खेतमा ६ महिनामै ७ सय ४८ मुद्दा दर्ता, सबैभन्दा बढी सम्बन्धविच्छेदका

A+ A A-

सुर्खेत जिल्लामा सम्बन्धविच्छेदका मुद्दा नै सबैभन्दा बढी दर्ता भएको पाइएको छ । जिल्ला अदालत सुर्खेतकाे अर्धवार्षिक तथ्यांकअनुसार सुर्खेतमा आर्थिक वर्ष (आव) २०७६/०७७ काे ६ महिनाको अवधिमा मात्र सम्बन्धविच्छेदका २ सय २१ वटा मुद्दा दर्ता भएका छन् ।

जिल्ला अदालत सुर्खेतका अनुसार चालू आवको साउनदेखि पुस महिनासम्ममा कुल ७ सय ४८ मुद्दा दर्ता भएकोमा सोमध्ये सम्बन्धविच्छेदका मुद्दा मात्र २ सय २१ वटा दर्ता भएको पाइएको हो ।

चालू आवको पुससम्ममा दर्ता भएका कुल मुद्दामध्ये जबर्जस्ती करणीका ६०, सम्बन्धविच्छेदका २ सय २१, लागुऔषधका ३०, बुहविवाहका ११, बालविवाहका १, घरेलु हिंसाका ३४, आत्महत्या दुरुत्साहनका ६, सवारी ज्यान दुर्घटनाका १४ र कर्तव्य ज्यानका १५ वटा रहेको जिल्ला अदालत सुर्खेतको तथ्यांकमा उल्लेख छ ।

जिल्ला अदालत सुर्खेतको तथ्यांकअनुसार साउनदेखि यता दर्ता भएका मुद्दाहरूमध्ये साउनमा १ सय ६९, भदौमा १ सय ४३, असोजमा ६४, कात्तिकमा १ सय ३५, मंसिरमा १ सय ४० र पुसमा ९७ मुद्दा दर्ता भएका छन् ।

तथ्यांकअनुसार दर्ता भएका मुद्दामध्ये सबैभन्दा बढी सम्बन्धविच्छेदका २ सय २१ र सबैभन्दा कम बालविवाहसम्बन्धी एकवटा मुद्दा रहेको पाइएको छ ।

सम्बन्धविच्छेदसम्बन्धी मुद्दामध्ये १ सय ६२ जना महिलाले र ५९ जना पुरुषले सम्बन्धविच्छेद गरी पाऊँ भनी मुद्दा दर्ता गरेको जिल्ला अदालत सुर्खेतका स्रेस्तेदार भूपाल भण्डारीले जानकारी दिए । उनले भने, ‘महिलाले बढी सम्बन्धविच्छेद गर्न मुद्दा दर्ता गरेका छन् । सम्बन्धविच्छेदका कुल मुद्दामध्ये ७० फर्छ्याेट भइसकेको र अरु फर्छ्याेट हुन बाँकी रहेका छन् ।’

अदालतका अनुसार घरेलु हिंसाका ३४ मुद्दा दर्ता भएकोमा महिलाले २५ र पुरुषले ९ मुद्दा दर्ता गरेका छन् । अदातलमा आएका कतिपय मुद्दामा होस्टस्टाइल हुने गरेको सुर्खेत जिल्ला अदालतका न्यायाधीश डा. राजेन्द्रकुुमार अर्यालले बताए ।

उनले भने, ‘अदालतमा आउने जघन्य अपराधका मुद्दामा पनि अहिले होस्टस्टाइल हुने गरेको छ । जबर्जस्ती करणीदेखि, ज्यान मुद्दा, सम्बन्धविच्छेदलगायतका सबै मुद्दा ९० प्रतिशत होस्टस्टाइल हुने गरेका छन् ।’

न्यायाधीश डा. अर्यालका अनुुुसार सम्बन्धविच्छेदका कारणले समाजमा नकारात्मक असर परेको छ । उनले सम्बन्ध विच्छेदका कारण बाबुआमाबाट अलग भएका बच्चाहरू झोंक्किने, रिसालु, झगाडालु र अपराध कर्ममा बढी लाग्ने गरेको पाइएको बताए ।

न्यायाधीश डा. अर्यालले भने, ‘यस्ता बच्चाहरू बलात्कार, लागुऔषध तथा हत्याका घटनामा धेरै संग्लन रहेका छन् ।’ आमाबुबाको माया नपाएका कारण नै उनीहरू अपराध कर्ममा जाने गरेको अर्यालको भनाइ छ ।

प्रकाशित मिति: शुक्रबार, माघ १०, २०७६ १८:५०