कास्कीमा बढ्दो दुर्घटना : ६ महिनामा २७ को मृत्यु, ५० घाइते

A+ A A-

कास्कीमा सवारी दुर्घटनाको संख्या बढ्दै गएको छ । पछिल्लो समय पोखरा क्षेत्रमा बढ्दो सवारी चाप र साँघुरा जोखिमयुक्त सडकका कारण दुर्घटनामा वृद्धि भएको बताइएको छ ।

जिल्ला प्रहरी कार्यालय कास्कीको पछिल्लो ६ महिनाको तथ्याङ्कमा कास्कीमा सवारी दुर्घटनामा ज्यान गुमाउने संख्या गत वर्षको तुलनामा दोब्बर बढी देखिएको छ ।

पछिल्लो समय कास्कीका ग्रामीण सडकमा पनि दुर्घटना बढ्दै गएको छ । जोखिमयुक्त सडमा जथाभावी सवारी चलाउँदा दुर्घटना बढ्दो छ । ग्रामीण सडकको अवस्था जानकारी नराखी सवारी चलाउँदा दुर्घटना बढेको जिल्ला ट्राफिक प्रहरी कार्यालय कास्कीका प्रमुख सन्तोष रोकाले बताए ।

‘ग्रामीण सडकको अवस्था निकै नै दयनीय छ । त्यसमाथि चालकले सावधानी नअपनाउँदा धेरै दुर्घटना भएका छन्’, उनले भने, ‘पछिल्लो समय कास्कीमा राजमार्ग र शहरी क्षेत्रभन्दा ग्रामीण सडकमा दुर्घटना बढी भएका छन् ।’

आर्थिक वर्ष २०७६÷०७७ को पछिल्लो ६ महिनामा ६५ सवारी दुर्घटनामा २७ जनाले ज्यान गुमाएका छन् । ५० जना गम्भीर र २७ सामान्य घाइते भएका छन् । आव २०७५÷०७६ को साउनदेखि पुससम्मको तथ्याङ्कमा ४२ सवारी दुर्घटनामा ११ जनाले ज्यान गुमाएका थिए । ३५ जना गम्भीर र १२ जना साधारण घाइते भएको तथ्याङ्क छ ।

साढे २ करोड राजस्व सङ्कलन

चालू आर्थिक वर्षको पुस मसान्तसम्म ६ महिनामा ३३ हजार ३ सय ५१ सवारी चालकले ट्राफिक नियम उल्लङ्घन गरेका छन् । गत आर्थिक वर्षको ६ महिनामा सवारी साधन कारबाहीबाट २ करोड ५० लाख ९९ हजार रुपैयाँ राजस्व सङ्कलन गरिएको छ ।
मापसे कारबाहीमा १ हजार २ सय ९८ जना कारबाहीमा परेका छन् । उनीहरूबाट १२ लाख ९८ हजार रुपैयाँ राजस्व सङ्कलन भएको ट्राफिक प्रहरीले जनाएको छ ।

दुर्घटना घटाउन के गर्दै छ ट्रफिक प्रहरी ?

जिल्ला ट्राफिक कार्यालय कास्कीले पछिल्लो समय बढ्दो दुर्घटनालाई मध्यनजर गर्दै ट्राफिक कक्षा सञ्चालन गर्ने तयारी गरेको छ ।

जिल्ला ट्राफिक कार्यालय कास्कीका प्रमुख रोकाले बढ्दो सवारी दुर्घटना रोक्न ट्राफिक सचेतना कार्यक्रम सञ्चालन गर्ने तयारी थालिएको बताए ।

‘हामी दुर्घटना न्यूनीकरणको अभ्यास गरिरहेका छौँ तर सवारी चलाउने चालक नै गम्भीर भएको पाइँदैन’, उनले भने, ‘विशेष कक्षामार्फत् सचेतना जगाउने तयारी गरिरहेका छौँ ।’

उनले सवारी दुर्घटना मान्छेको जीवनसँग प्रत्यक्ष जोडिने भएकाले यस विषयमा सवारी चालकलाई सचेत गराउन प्रत्येक हप्ता २ वटा कक्षा सञ्चालन गरेर ५० जनालाई सचेतना तालिम दिने कार्यक्रम ल्याउन लागेको बताए ।

‘बढ्दो सवारी दुर्घटनाप्रति हामी निकै चिन्तित छौँ’, उनले भने, ‘विभिन्न संघसंस्थासँग समन्वय गरेर हप्तामा २ कक्षा दिएर २५ जनाको दरले ५० जनालाई सचेतना कार्यक्रम गर्नेछौँ ।’

सार्वजनिक र निजी चालक, सवारीधनी, बोर्डिङ स्कुलका बस चालक सबैलाई सचेतना तालिम कक्षामा सहभागी गराइने उनको भनाइ छ ।

धेरै दुर्घटना पुसमा

कास्कीमा सबैभन्दा धेरै दुर्घटना पुस महिनामा भएका छन् । पुसमा १५ वटा गम्भीर प्रकृतिका दुर्घटना भएको प्रहरीले जनाएको छ ।

पुस महिनामा दुर्घटनामा परी ८ जनाको ज्यान गएको छ । पुसमा भएका दुर्घटनामा १३ जना गम्भीर घाइते भएका छन् । त्यसैगरी, मङ्सिरमा ९, कात्तिकमा १४, असोजमा ९, भदौमा ८ र साउनमा ७ वटा सवारी दुर्घटना भएका ट्राफिक प्रहरीले जनाएको छ ।

४ चालक कारागार चलान

लापरबाही गरी सवारी चलाएर दुर्घटना गराउने ४ जना सवारी चालक कारागार चलान भएका छन् । प्रहरीले दर्ता गरेको ज्यान मुद्दामा जिल्ला अदालत कास्कीले उनीहरूलाई पुर्पक्षका लागि कारागार चलानको आदेश दिएको हो ।

कारागार चलान हुनेमा २ जना सवारी चालक अनुमतिपत्र नलिई सवारी साधन चलाएर दुर्घटना गराउने चालक छन् । अन्य २ चालकलाई लापरबाही ढंगले सवारी चलाएर दुर्घटना गराएको अभियोगमा कारागार चलान गरिएको जिल्ला प्रहरी कार्यालय कास्कीले जनाएको छ ।

दाङको तुलसीपुर– ११ घर भएका २१ वर्षीय ग१च ९६९९ नम्बरको कार चालक किशोर भण्डारी र ना४५प ५६९४ नम्बरको मोटरसाइकल चालक कृष्ण विश्वकर्मालाई जेल चलान गरिएको छ ।

त्यसैगरी बालोदय माविको ग१क २४९९ नम्बरको बसका चालक सुनसरी धरान नगरपालिका– १९ का ४३ वर्षीय रविन राई र ग१७प ३५४७ नम्बरको स्कुटर चालक पोखराका २५ वर्षीय सजन विकलाई कारागार चलान गरिएको जिल्ला प्रहरी कार्यालय कास्कीका प्रहरी नायव उपरीक्षक राजकुमार केसीले जानकारी दिए ।

कारागार चलान हुने भण्डारी र कृष्ण विकको चालक अनुमतिपत्र नभएको प्रहरीले जनाएको छ । भण्डारीले चलाएको कारको ठक्करबाट ६ पुसमा पोखरा– ६ डिहिगो पाटनमा २२ वर्षीय रेक्स आलेको मृत्यु भएको थियो ।

कृष्ण विश्वकर्माले चलाएको मोटरसाइकलको ठक्करबाट ७ पुसमा पोखरा– ३० अर्घौचोकका ८१ वर्षीय भानुभक्त तिवारीको मृत्यु भएको थियो ।

राईले चलाएको स्कुल बसबाट खसेर पोखरा– १७ बस्ने २६ वर्षीया सरिता पौडेल सुवेदीको ८ पुसमा मृत्यु भएको थियो । यस्तै, सजन विकले मादक पदार्थ सेवन गरी चलाएको स्कुटरको ठक्करबाट पोखराको पृथ्वीचोकमा अमृत घिमिरे गम्भीर घाइते भएका थिए ।

प्रकाशित मिति: बिहीबार, माघ ९, २०७६ १८:५०