लेस्टरद्वारा वेस्टह्याम पराजित, युनाइटेड आफ्नै मैदानमा स्तब्ध

A+ A A-

इंग्लिस प्रियिमर लिगमा लेस्टर सिटी लगातार दुई खेलको पराजयपछि जितयात्रामा फर्किएको छ । गएराति भएको खेलमा लेस्टरले वेस्ट ह्याममाथि ४–१ को जित निकालेको हो ।

घरेलु मैदानमा भएको खेलको २४ औं मिनेटमा बार्नेसले गोल गर्दै लेस्टरलाई सुरुवाती अग्रता दिलाएका थिए । पहिलो हाफको अतिरिक्त समयको पाँचौं मिनेटमा रिकार्डो परेइराले गोल गर्दै अग्रता दोब्बर पारे ।

खेलको ५० औं मिनेटमा पाएको पेनाल्टीमा कप्तान मार्क नोबलले वेष्ट ह्यामका लागि एक गोल फर्काउँदै गोल अन्तर २–१ मा ल्याए ।

तर खेलको ८१ औं मिनेटमा पाएको पेनाल्टी र ८८ औं मिनेटमा अयोजे पेरेजले २ गोल गरेपछि लेस्टर फराकिलो जित निकाल्न सफल भयो ।

जितपछि तेस्रो स्थानको लेस्टरको २४ खेलबाट ४८ अंक भएको छ । उ दोस्रो स्थानको म्यानचेस्टर सिटी भन्दा तीन अंकले पछि परेको छ ।

जित निकाले पनि यो खेलमा लेस्टरका महत्वपूर्ण खेलाडी जेमी भार्डी पहिलो हाफमै चोटग्रस्त भएर मैदानबाट बाहिरिए । उनी जारी सिजनका सर्वाधिक गोलकर्ता हुन् ।

गएराति नै भएको अर्को खेलमा म्यान्चेस्टर युनाइटेड पराजित भएको छ । घरेलु मैदानमा भएको खेलमा युनाइटेड २–० ले पराजित भएको हो ।

बर्नलीले वल्ड ट्राफोर्डमा भएको प्रिमियर लिग अन्तर्गतको खेलमा जित निकालेको यो पहिलो पटक हो ।

बर्नलीका लागि ३९ औं मिनेटमा क्रिस वुडले गोल गरे । पहिलो हाफमा १–० को अग्रता लिएको बर्नलीका लागि ५६ औं मिनेटमा जे रोड्रिग्वेजले गोल गर्दै २–० को जित निश्चित गरेका हुन् ।

जितपछि बर्नली २४ खेलबाट ३० अंकसहित १३ औं स्थानमा पुगेको छ । पराजित भएको म्यानचेस्टर युनाइटेड ३४ अंकसहित पाँचौं स्थानमा छ ।

प्रकाशित मिति: बिहीबार, माघ ९, २०७६ ०७:४७