राष्ट्रियसभा निर्वाचन : १८ सदस्यका लागि मतदान आज

A+ A A-

राष्ट्रियसभाका एक तिहाई सदस्यको निर्वाचनअन्तर्गत बिहीबार बिहान १० बजेदेखि अपराह्न ४ बजेसम्म मतदान हुँदै छ । सातवटै प्रदेशबाट गरी १८ जना राष्ट्रियसभा सदस्यमा निर्वाचित हुनेछन् ।

निर्वाचनमा ५ सय ५० प्रदेशसभा सदस्य (सातै प्रदेश) र १ हजार ५ सय ६ स्थानीय तहका प्रमुख, उपप्रमुख गरी २ हजार ५६ मतदाता छन् । निर्वाचनमा प्रदेशसभा सदस्यको मतभार ४८ र स्थानीय तहका प्रमुख, उपप्रमुखको मतभार १८ हुनेछ ।

प्रमुख निर्वाचन आयुक्त दिनेशकुमार थपलियाले राष्ट्रियसभा सदस्य निर्वाचनअन्तर्गत मतदानका लागि सम्पूर्ण तयारी पूरा भएको जानकारी दिए ।

‘मतपत्र, निर्वाचन सामग्री, कर्मचारीलगायत सबै मतदान केन्द्र र मतदान स्थल पुगिसकेका छन्,’ प्रमुख आयुक्त थपलियाले भने, ‘ढुक्क भएर मताधिकार प्रयोग गर्न मतदातालाई आग्रह गर्छु ।’

आयोगले स्वच्छ, निष्पक्ष र धाँधलीरहित रुपमा निर्वाचन सम्पन्न गराउन आचारसंहिताको पूर्ण पालना गर्न राजनीतिक दल, उम्मेदवार र सरोकारवाला सबैलाई आग्रह गरेको छ ।

आयोगले राष्ट्रियसभा सदस्य निर्वाचनका लागि प्रदेश १ मा मोरङको विराटनगर, प्रदेश २ मा धनुषाको जनकपुर, वागमती प्रदेशको ललितपुरको जाउलाखेल, गण्डकी प्रदेशको कास्कीको पोखरा, प्रदेश ५ को दाङको घोराही, कर्णाली प्रदेशको सुर्खेतको वीरेन्द्रनगर र सुदूरपश्चिम प्रदेशको डोटीको सिलगढीमा निर्वाचन अधिकृतको कार्यालय स्थापना गरेको छ ।

निर्वाचन कार्यतालिकाअनुसार बिहीबार बिहान १० बजेदेखि अपराह्न ४ बजेसम्म मतदान हुने र मतपेटिका मतदान अधिकृतबाट निर्वाचन अधिकृतको कार्यालयमा प्राप्त भएपछि गणना सुरु गरिनेछ ।

निर्वाचनमा प्रदेशसभा सदस्यले मतदान गर्ने प्रयोजनका लागि सेतो कागजमा हरियो रङको मसीले विवरण र निर्वाचन चिह्न तथा स्थानीय तहका सदस्यले मतदान गर्ने प्रयोजनका लागि सेतो कागजमा रातो रङको मसीले विवरण र निर्वाचन चिह्न उल्लेख गरी ६ हजार २ सय ६० थान मतपत्र छपाइ निर्वाचन हुने समूह र मतदाताको आधारमा मतदान केन्द्रमा पठाइएको आयोगले जनाएको छ ।

राष्ट्रियसभामा रिक्त हुने १९ सिटमध्ये १८ जना बहुमतीय प्रणालीबाट चयन हुने आयोगले जनाएको छ । १८ सिटका लागि विभिन्न दलका गरी ४५ जना उम्मेदवार छन् । १ सिटमा सरकारको सिफारिसमा राष्ट्रपतिले मनोनीत गर्नेछन् ।

निर्वाचन हुने १८ पदमध्ये महिला समूहबाट ७, दलितबाट २, अपांग र अल्पसंख्यकबाट २ र खुलातर्फ ७ जना छन्।

तीसमध्ये प्रदेश १ बाट महिला, दलित र अन्य समूह गरी ३, प्रदेश २ बाट महिला, दलित र अपांगता वा अल्पसंख्यक भएका र अन्य समूह गरी ४ जना, वागमती प्रदेशबाट महिला र अन्य समूह गरी २, गण्डकी प्रदेशबाट महिला र अन्य समूह गरी २, प्रदेश ५ बाट महिला, अपांगता वा अल्पसंख्यक भएका समुदाय र अन्य गरी ३, कर्णाली प्रदेशबाट महिला र अन्य समूह गरी २ र सुुदूरपश्चिम प्रदेशबाट महिला र अन्य समूह गरी २ जना निवार्चित हुनेछन् ।

५९ सदस्यीय राष्ट्रियसभामा ५६ निर्वाचित र ३ जना सरकारको सिफारिसमा राष्ट्रपतिबाट मनोनीत हुने व्यवस्था छ । अहिले राष्ट्रियसभा सत्तारुढ नेपाल कम्युनिस्ट पार्टी (नेकपा) का ४२, प्रमुख प्रतिपक्षी दल कांग्रेसका १३, समाजवादी पार्टी र राष्ट्रिय जनता पार्टीका २/२ जना सदस्य छन् ।

प्रकाशित मिति: बिहीबार, माघ ९, २०७६ ०७:१५