साउदी युवराजले गरे अर्बपति बेजोसको फोन ह्याक

A+ A A-

साउदी अरबका युवराज मोहम्मद बिन सलमानले पठाएको एक म्यासेजबाट संसारकै सबैभन्दा धनी व्यक्ति तथा अमेजनका प्रमुख जेफ बेजोसको मोबाइल फोन ह्याक भएको रिपोर्ट बाहिर आएको छ ।

बेलायती अखबार ‘द गार्जियन’ ले अज्ञात स्रोतको हवाला दिँदै सो रिपोर्ट प्रकाशित गरेको हो ।

अखबारले डिजिटल फरेन्सिक विश्लेषणले सन् २०१८ मा अमेजनका प्रमुखको फोनबाट चोरीको सुरुवात मोहम्मद बिन सलमानको निजी व्हाट्सएपबाट पठाइएको एक भाइरससहितको भिडियो फाइनबाट भएको देखिएको उल्लेख छ ।

गार्जियनले आफ्नो रिपोर्टमा अहिलेसम्म पनि फोनबाट के डाटा चोरी भएको थियो भन्ने उल्लेख गरेको छैन । तर यो रिपोर्ट बेजोस र उनकी पत्नी म्याकेन्जीको आश्चर्यजनक सम्बन्धविच्छेदको एक वर्षपछि आएको छ ।

बेजोसले आफ्नो विवाहको २५ वर्षपछि गत वर्ष सम्बन्धविच्छेद भएको थियो ।

अमेरिकी अखबार ‘नेसनल इन्क्वायरले जेफ बेजोस र पूर्वटेलिभिजन प्रस्तोता लरेन सान्चेजबीच विवाहेतर सम्बन्धको खुलासा गरेको थियो । अखबारले सिलसिलेवार रूपमा प्रस्तुत गरेको रिपोर्टमा बेजोसले लरेनलाई अन्तरंग म्यासेजसमेत पठाएको उल्लेख गरिएको थियो ।

बेजोसका सुरक्षा सल्लाहकार गेभिन डे बेकरले भने, ‘उनलाई विश्वास छ कि नेसनल इन्क्वायरर’ ले बेजोसको विवाहेत्तर सम्बन्धको खुलासा गर्नुभन्दा पहिले नै साउदी अरब सरकारले बेजोसको फोनमा निशाना बनाइसकेको थियो ।’ तर डे बेकरले आफ्नो दाबीलाई लिएर भरोसा गर्ने सक्ने कुनै प्रमाण भने पेस गरेनन् ।

डे बेकरले नेशनल इन्क्वायर्रको साउदीसँग व्यापारिक सम्बन्ध रहेको बताए । साथै, बेजोसको स्वामित्व रहेको वासिंगटन पोस्टले साउदी शासनको कडा आलोचक पत्रकार जमाल खसाेग्गीको हत्याको कभरेज गरेको थियो ।

त्यस कारण पनि अमेजनका संस्थापक रहेका बेजोसको छवि खराब गर्नका लागि पनि फोन ह्याक गराएको हुन सक्ने उनको दाबी छ ।

जमाल खसाेग्गीको हत्याको घटनामा अमेरिकी गुप्तचर निकायले गरेको अनुसन्धानमा युवराज मोहम्मद बिन सलमानको संलग्नता रहेको खुलासा गरिएको समाचार वासिंगटन पोस्टले छापेको थियो ।

प्रकाशित मिति: बुधबार, माघ ८, २०७६ १३:२६