रोग प्रतिरक्षा प्रणालीमा नयाँ खोज, क्यान्सर उपचारमा आशा

A+ A A-

वैज्ञानिकहरूले मानव शरीरको रोग प्रतिरक्षा प्रणालीको नयाँ पत्ता लागेको हिस्सा प्रयोग गरी क्यान्सर रोगको उपचार गर्न सकिने दाबी गरेका छन् ।

कार्डिफ विश्वविद्यालयका वैज्ञानिकहरूले प्रोस्टेट, स्तन, फोक्सो र अन्य सबै खाले क्यान्सरको उपचार गर्ने विधिको प्रयोगशालमा परीक्षण गरेका हुन् ।

क्यान्सरका बिरामीहरूमा यसको परीक्षण नगरिए पनि वैज्ञानिकहरूले यसले क्यान्सरको उपचारमा ठूलो सम्भावना थपेको बताएका छन् ।

नेचर इम्युनोलोजी नामक जर्नलमा प्रकाशित अध्ययनको नतिजाका आधारमा वैज्ञानिकहरूले यो सुरूवाती चरणमा भए पनि निकै उत्साहजनक देखिएको दाबी गरेका छन् ।

वैज्ञानिकहरू ट्युमरविरूद्ध प्रतिरक्षा प्रणालीको प्राकृतिक आक्रमण गराउन परम्परागत ढाँचाभन्दा फरक र यसअघि पत्ता नलागेका विधिको खोजी गरिरहेका थिए ।

उनीहरूले मानिसको रगतभित्र टी–सेल नामक कोष फेला पारेका हुन् । त्यो प्रतिरक्षा प्रणाली सक्रिय पार्ने कोष हो । जसले शरीरभित्र कुनै खतरा भएकोबारे थाहा पाउने गर्छ भने शरीरमा क्यान्सर फैलाउन सक्ने कोषहरूलाई समेत आक्रमण गर्छ ।

अनुसन्धानकर्ता प्राध्यापक एन्ड्रयू सेवेलको भनाइ उदृत गर्दै बीबीसीले लेखेको छ, ‘अब सबैखाले बिरामीलाई उपचार गर्न सकिने मौका हाम्रोसामु छ । यसअघि कसैले पनि यस्तो हुन सक्छ भनी सोचेका थिएनन् ।’

अनुसन्धानकर्ताहरूका अनुसार रगतमा हुने टी–सेल नामक कोष प्रयोग गरी विभिन्न प्रकारका क्यान्सरलाई आक्रमण गर्न सकिन्छ ।

उनीहरूका अनुसार टी–सेललाई एमआर १ भनिने शरीरमा प्रत्येक कोषको सतहमा रहने भागसँग अन्तर्क्रिया गराएर क्यान्सर कोषमा रहेको विकारबारे थाहा पाउन सकिन्छ ।

क्यान्सर भएको बिरामीबाट रगतको नमुना लिएपछि त्यसलाई आनुवंशिक रूपमा बदल्नुपर्छ र त्यसले क्यान्सर पत्ता लगाउँछ ।

त्यसपछि प्रयोगशालामा त्यस्ता कोषहरू धेरै परिमाणमा उत्पादन गरेर बिरामीको शरीरभित्र पठाउनुपर्छ ।

अहिलेसम्म त्यो अनुसन्धान जनावरहरूमा मात्र गरिएको छ । त्यसलाई मानवमा परीक्षण गर्नुअघिका सुरक्षा जाँच हुन बाँकी छ । अझै अध्ययन गर्न बाँकी भए पनि वैज्ञानिकहरूले यो नयाँ प्रयोगबाट सबैखाले क्यान्सर निको पार्न सकिने विश्वास व्यक्त गरेका छन् ।

प्रकाशित मिति: मंगलबार, माघ ७, २०७६ ०७:४८