पाँचतारे होटलभन्दा महँगा काठमाडौंका अस्पताल

A+ A A-

देश संघीयतामा गएको एक दशकभन्दा बढी भएको छ । विकासको गति भने उपत्यका केन्द्रित नै छ । शिक्षा, स्वास्थ्य, होटलदेखि सपिङ मलहरूसमेत काठमाडौं केन्द्रित बनेका छन् ।

प्रदेश राजधानीहरू नाम मात्रका राजधानी भएका छन् । लगानीकर्ताले आफ्नो लगानीको सुनिश्चितता काठमाडौंबाहिर नदेख्दा सबै भौतिक संरचनाहरू काठमाडौं केन्द्रित बन्ने गरेको कतिपय व्यवसायीहरू बताउँछन् ।

अझ उपत्यकाबाहेक अन्य कुनै पनि प्रदेशहरूमा ठूला र सुविधासम्पन्न अस्पतालहरू बनेका छैनन् । यसका कारण सामान्य गर्भवती हुँदासमेत महिलाहरू काठमाडौं नै आउनुपर्ने बाध्यता छ ।

काठमाडौंमा साना, ठूला दर्जनौँ अस्पतालहरू छन् । यसमध्ये एक दर्जनभन्दा बढी अन्तर्राष्ट्रिय मान्यताप्राप्त अस्पताल छन् । उनीहरूको दिने सेवा सुविधासमेत त्यहीअनुसारको छ । तर, ती अस्पताल आमसर्वसाधारणको पहुँचभन्दा टाढा छन् ।

काठमाडौंका पाँच अस्पतालको बेड चार्जको मूल्य मात्रै एक रातको २ हजारदेखि ३७ हजार रुपैयाँसम्म रहेको पाइन्छ, जुन उपत्यकामा रहेका पाँचतारे होटलको एक रातको मूल्यबराबर हो ।

यी हुन् उपत्यकाका सबैभन्दा महँगा पाँच अस्पताल

ह्याम्स अस्पताल : गत वर्षदेखि अन्तर्राष्ट्रियस्तरको सेवा सुविधासहित सञ्चालनमा आएको ह्याम्स अस्पताल उपत्यकाका महँगा अस्पतालमध्येको एक हो ।

२१ वर्षअघि एड्भान्स उपचारका लागि स्थापना गरेकोे उक्त अस्पताल गत वर्षदेखि अन्तर्राष्ट्रियस्तरको सेवासहित सञ्चालनमा आएको हो ।

उक्त अस्पतालमा डा. भगवान कोइराला, अर्जुन कार्की, प्रकाश सायमीलगायतका चर्चित विशेषज्ञ डाक्टरहरूसहित सम्मिलित छन् ।

धुम्बाराहीस्थित १५ रोपनी जग्गामा बनेको ह्याम्स अस्पतालमा हेलिप्याडको समेत व्यवस्था छ । ठूलो लगानी र अन्तर्राष्ट्रियस्तरको प्रविधि भित्र्याएर सुरु गरिएको ह्याम्स अस्पतालमा विभिन्न रोगको उपचार हुने गरेको छ ।

बिरामीलाई भर्ना भएपछि आर्थिक हैसियतअनुसारका फरकफरक मूल्यको बेड चार्ज तिरेर बस्ने व्यवस्था छ । अस्पतालमा सामान्य बेडदेखि क्याबिन, डिलक्स र स्वीट रुम रहेका छन् ।

ह्याम्स अस्पतालका अनुसार सामान्य बेडको २ हजार ५ सयदेखि क्वाबिनको ६ हजार ५ सय तथा डिलक्स र स्वीटको १५ हजारदेखि ३५ हजार रुपैयाँसम्मका रहेका छन् ।

मेडिसिटी अन्तर्राष्ट्रिय अस्पताल : ललितपुरको नख्खुस्थित ३० रोपनी क्षेत्रफलमा बनेको मेडिसिटी अन्तर्राष्ट्रिय अस्पताल पनि उपत्यकाको महँगो अस्पताल हो । मेडिसिटी अस्पतालमा अत्याधुनिक भवन र हेलिप्याडको व्यवस्था छ ।

गैरआवासीय नेपाली संघ (एनआरएनए)का संस्थापक अध्यक्ष डा.उपेन्द्र महतोको ठूलो लगानीमा दुई वर्षअघिदेखि सञ्चालनमा आएको अन्तर्राष्ट्रियस्तरको सुविधासम्पन्न नेपाल मेडिसिटी अस्पतालले ओपीडी र दुईवटा शल्यक्रिया कक्षबाट सेवा सुरु गरेको थियो ।

मेडिसिटी अस्पतालमा सामान्य बिरामी भर्नाको चार्ज ४ हजार १ सयदेखि क्याबिनको १० हजार ३ सय र डिलक्स बेडरुमको २६ हजार रुपैयाँ रहेको छ । यसबाहेक औषधि र डाक्टर चार्ज भने छुट्टै तिर्नुपर्ने हुन्छ ।

ग्राण्डी अन्तर्राष्ट्रिय अस्पताल : धापासीस्थित २३ रोपनी जग्गामा निर्माण भएको ग्राण्डी अन्तर्राष्ट्रिय अस्पताल पनि उपत्यकाको महँगो अस्पतालमा पर्छ । थाइल्यान्डको समिति भेज हस्पिटल र नेपालको सीई कन्स्ट्रक्सनको संयुक्त लगानीमा ३ वर्षअघि बनेको हो ।

१४ तलाको सुविधासम्पन्न अस्पतालमा हेलिप्याडसमेत रहेको छ, जसमा ८ वटा शल्यक्रिया कोठा रहेका छन् । ग्राण्डी अस्पतालमा सामान्य बिरामी भर्नाको चार्ज ३ हजार ६ सयदेखि क्याबिनको २९ हजार २ सय र डिलक्स स्वीट बेडरुमको ३७ हजार २ सयसम्म रहेको छ । यसबाहेक औषधि र डाक्टर चार्ज छुट्टै तिनुपर्ने हुन्छ ।

बयोधा अस्पताल : बल्खु चोकमा रहेको बयोधा अस्पताल पनि उपत्यकाको महँगो अस्पतालमध्येको एक हो । हेलिप्याडसहितको व्यवस्था भएको अस्पतालमा विभिन्न रोगको उपचार हुने गरेको छ ।

बयोधा अस्पतालमा पनि बिरामीका लागि सामान्य बेड रुमदेखि स्वीट रुमहरू बनाइएका छन् । काठमाडौंमा सबैभन्दा पहिले हेलिप्याडको व्यवस्था भएको बयोधामा सामान्य बिरामीको बेड चार्ज २ हजारदेखि डिलक्स र स्वीट रुमको चार्ज १५ हजार रुपैयाँ तोकिएको छ । त्यसबाहेक अन्य औषधि र डाक्डर चार्ज छुट्टै लाग्छ ।

नर्भिक अन्तर्राष्ट्रिय अस्पताल : थापाथलीको मुख्य चोकमा रहेको नर्भिक अन्तर्राष्ट्रिय अस्पताल पनि महँगो अस्पतालमा पर्नेमध्ये एक हो । तर, माथि उल्लेखित अस्पतालको तुलनामा नर्भिक केही सस्तो देखिन्छ ।

उसो त, नर्भिक अस्पतालमा हेलिप्याडको व्यवस्था पनि छैन । अस्पतालमा विभिन्न रोगको भने उपचार हुने गरेको छ । नर्भिकमा सामान्य बेड चार्ज ३ हजारदेखि क्याबिनको ११ हजार र स्वीट रुमको १५ हजार रुपैयाँ रहेको छ । यसबाहेक औषधि र डाक्टरको चार्ज छुट्टै रहेको छ ।

किन महँगो हुन्छ अस्पतालको क्याबिन ?

विभिन्न अस्पतालका अनुसार क्याबिन र डिलक्स रुममा अधिकांश उच्च तहका व्यापारीदेखि नेता बस्ने गरेका छन् । क्याबिन र डिलक्स रुममा बस्नेहरूको दिनको बेड चार्जबाहेक औषधि र डाक्टरको चार्ज भने छुट्टै हुन्छ ।

क्याबिनमा भर्ना हुने बिरामीले खाना पकाउने किचनदेखि फ्रिज, टीभी, एसी छुट्टै बाथ रुम, फोन सेट, कुरुवालाई सुत्ने छुट्टै बेडको समेत व्यवस्था गरिएका कारण सामान्य बेडभन्दा महँगो हुने गरेको हो ।

प्रकाशित मिति: सोमबार, माघ ६, २०७६ १८:२२